Токйода җәнубий моңғулийә қурултийи қурулғанлиқи җакарланмақчи

Чәтәлләрдә паалийәт елип бериватқан җәнубий моңғулийә кишилик һоқуқ тәшкилатлири 11-айниң 9-күнидин 12-күнигә қәдәр токйоға җәм болуп, җәнубий моңғулийә қурултийи қурулғанлиқини дуняға җакарлайдикән.

Японийәдә паалийәт елип бериватқан кишилик һоқуқ тәшкилатлиридин җәнубий моңғулийә әркинлик бирләшмисиниң тор бетидә көрситилишичә, мушу айниң 10-күни чәтәлләрдә паалийәт елип бериватқан бир қисим җәнубий моңғулийә тәшкилатлири токйода бирликтә йиғин чақирип җәнубий моңғулийә қурултийи қурулғанлиқини җакарлайдикән.

Бу һәқтә зияритимизни қобул қилған японийәдики җәнубий моңғулийә қурултийи қуруш тәйярлиқ комитетиниң мәсуллиридин олхунуд дайчин бу һәқтә тохтилип: “чәтәлләрдә паалийәт елип бериватқан бир қисим җәнубий моңғулийә кишилик һоқуқ тәшкилатлири мушу айниң-9-күнидин12-күнигичә қәдәр токйода йиғин чақирип, җәнубий моңғулийә қурултийи қурулғанлиқини дуняға җакарлаймиз. Қурултийимизниң мәркизи токйода болиду” деди.

Олхунуд дайчин сөзидә: “қурултийимизниң қурулушидики асаслиқ мәқсәт, хитай компартийәси ички моңғул аптоном райони дәп атаватқан җәнубий моңғулийәликләрниң ана вәтини болған җәнубий моңғулийәдики моңғулларниң азаб-оқубәтлирини, гүзәл вәтинимизниң тағ-дәря, яйлақлириниң хитай көчмәнлири тәрипидин талан-тараҗ қилинип еғир екологийәлик бузғунчилиқларниң йүз бериватқанлиқини дуняға аңлитиш, чәтәлләрдә вәтән даваси елип бериватқан бир қисим тәшкилатлиримиз бирлишип пәқәтла бир тәшкилатниң рәһбәрликидә бир яқидин баш чиқирип, хитай компартийәсигә болған қаршилиқ һәрикәтлиримизни күчләндүрүш вә иттипақлишиш. Биз мана мушу мәқсәттә җәнубий моңғулийә қурултийини қурдуқ” деди.

Японийәдә узундин буян җәнубий моңғул кишилик һоқуқ тәшкилатлири билән һәмкарлишип паалийәт елип бериватқан уйғур кишилик һоқуқ тәшкилатлиридин японийә уйғур җәмийитиниң рәиси илһам маһмутниң билдүрүшичә, җәнубий моңғулийә қурултийини қуруш үчүн икки йил аввал японийәдики җәнубий моңғулийә кишилик һоқуқ тәшкилатлири түрлүк тәйярлиқ хизмәтлирини башлиған вә бу тәшкилатлар тарқақ һаләттә паалийәт беришқа хатимә бериш, өз-ара иттипақлишишни нишан қилишни шоар қилиш асасида мәзкур қурултайни қуруп чиққан болуп, җәнубий моңғулийә қурултийиниң қурулуши наһайити зор әһмийәткә игә һесаблинидикән.

Җәнубий моңғулийә қурултийи қуруш тәйярлиқ комитетиниң мәсули олхунуд дайчин сөзидә йәнә, җәнубий моңғулийә қурултийиниң қурулушиға дуня уйғур қурултийи вә шундақла тибәт сәргәрдан һөкүмитиниң түрткә болғанлиқини тилға елип: “дунядики уйғур вә тибәтләрниң өз алдиға қурған тәшкилатлири бизниңму өз алдимизға қурултай қурушимизға сәвәбчи болди. Шуңа биз бу қетимқи қурултийимизға дуня уйғур қурултийи, тибәт сәргәрдан һөкүмитидин вәкилләрниң қатнишишини тәләп қилип тәклип йоллидуқ” деди.

Токйода чақирилидиған җәнубий моңғулийә қурулитийиға дуня уйғур қурултийидин вәкил болуп қатнишидиған японийә уйғур бирлики тәшкилатиниң рәиси турмуһәммәт һашимниң илгири сүрүшичә, мәзкур қурултайниң қурулуши японийәдә елип берилидиған хитайға қарши кишилик һоқуқ паалийәтлирини күчләндүрүштә толиму муһим әһмийәткә игә һесаблинидикән.

Җәнубий моңғулийә қурултийи тәйярлиқ комитетидин игилишимизчә, бу қетимқи токйода чақирилидиған қурултайға явропа әллири, америка, тәйвән вә вә моңғулийә қатарлиқ җайлардин бир қисим нопузлуқ вәкилләр қатнишидикән шундақла қурултай җәрянида нөвәттә җәнубий моңғулийәдә сақлиниватқан кишилик һоқуқ мәсилилири үстидә илмий муһакимиләр елип берилидикән.

Японийәдики бир қисим җәнубий моңғул кишилик һоқуқ паалийәтчилириниң ашкарилишичә, ички моңғул аптоном районидики қанун даирилири мәзкур қурултайға қатнишидиған вә қурултайни ечишиға ярдәмләрдә болуватқан чәтәлләрдики җәнубий моңғулийәликләрниң вәтини ичидики аилә ‏тавабиатлириға түрлүк тәһдит вә бесимларни қилишқа башлиған.

Юқириқи аваз улинишидин тәпсилатини аңлаң.