Uyghur we tibetler jenwede xitaygha qarshi daghdughuluq birleshme namayish ötküzdi

Uyghur we tibetlerning jenwede xitaygha qarshi élip barghan birleshme namayishidin bir körünüsh

Namayishchilar axirida xatire resimge chüshmekte

Namayishchilar meydanlarda bayanatlar anglimaqta

Uyghur we tibetlerning jenwede xitaygha qarshi élip barghan birleshme namayishidin bir körünüsh

Uyghur we tébetlerning nechche waqtin béri pilan qilghan birleshme namayishi, 2016 - yili 16 - séntebir jenwe shehride ghelbilik élip bérildi.

16 - Séntebir jüme küni shu yer waqti 11:00 de mingdin artuq Uyghur, tibet we ularni qollighuchi yawropaliq pa'aliyetchiler, siyasetchiler we qandash türkler shiwétsariyening jenwe shehiride jem bolup, birleshme namayish élip bardi.

Namayishchilar türlük pilakat - lozinkilar we bayraqlarni kötürüp, b d t ning jenwediki ish béjirish orni aldidiki meydan'ghiche kocha aylinip mangdi shundaqla özlirining xitay hökümitige bolghan naraziliqini yangratti.

D u q bilen xelq'ara tibet herikitining hemkarliqida teshkillen'gen bu namayishqa yawropada yashawatqan herqaysi döletlerdiki Uyghur we tébet aktipliri, yawropaliq herxil irqqa tewe qollighuchilardin teshkil tapqan mingdin artuq kishi qatnashti. Pa'aliyet ishtirakchiliri b d t binasining aldidiki meydan'gha yétip kélip bargah qurdi we sep tüzüp, jarangliq shu'arliri we tesirlik xitabliri bilen xitay hökümitining Uyghur, tibet rayonliridiki kishilik hoquq depsendichilikini eyiplidi.

D u q ning re'isi rabiye qadir xanim, tibet teshkilatlirining wekilliri, yawropa parlaméntining Uyghur, tibetlerni qollaydighan bezi ezaliri we yawropadiki kishilik hoquq teshkilatlirining mes'ulliri b d t binasining aldida puqralargha qoralliq zorawanliq qilishning simwoli bolghan sunuq orunduq yénida qurulghan munberde nutuq sözlep, xitayning kishilik hoquq xatirisi we uning Uyghur, tibet rayonliridiki siyasiy, diniy basturushlirini pash qildi.

Ular xitay hökümitidek bir déktatur hökümetning b d t kishilik hoquq kéngishige eza bolush salahiyitining yoqliqini ilgiri sürüp, b d t din, xitayning basturush siyasitini toxtitish heqqide xitaygha bésim qilishni telep qildi.

Melum bolishiche, del mushu waqitta birleshken döletler teshkilatining 33 - nöwetlik kishilik hoquq kéngishi yighini échiliwatqan bolup, Uyghur we tébettin ibaret xitay hökümitining biwaste ziyankeshlikige uchrawatqan dewagerlerning, öz qollighuchiliri bilen bu yerde namayish pa'aliyiti ötküzüshi tarixiy ehmiyetke ige bir pa'aliyet dep qaralmaqta.

Shu yer waqti etigen 11:00 din chüshtin kéyin sa'et 15:30 ge qeder dawam qilghan bu namayish axirlashqandin kéyin Uyghurlar we ularni qollighuchilar ayrim toplushup, rabiye qadir xanimning xoshlishish nutqini anglidi we birlikte resimge chüshti.

Bu qétimliq namayishqa gollandiye, gérmaniye, bélgiye, fransiye qatarliq ellerdin kelgen köpligen Uyghurlar namayishqa qatnashti. 15 - Séntebir kech sa'et 20:00 bilen bu pa'aliyetke atlan'ghan gollandiyediki Uyghurlar 17 - séntebir seher gollandiyege qaytip keldi.