Qirghizistan Uyghurliri barawet kéchisini qur'an tilawet bilen bashlidi

11-We 12 ‏-may küni qirghizistan musulmanliri barawet kéchisini mubareklidi. Bu kéche ulugh ramizan éyining aldida yeni 15 -tün, miladi kaléndari boyiche 11-, 12 -may tünige toghra kélidu.

Uyghurlar zich olturaqlashqan nowopokrowka yézisidiki meschitning imam xatipi ihtiyar hajim abdullin bu heqte muhemmet peyghemberning hedislirini misal keltürüp berdi.

Bishkek, qarabalta, toqmaq sheherliridiki we bashqa yézilardiki Uyghur jama'iti mubarek kéchining hidayitige érishish üchün ibadetke turushti.

“Ittipaq” jem'iyitining ezasi, jama'et ichide tonulghan hörmetlik aqsaqal rehimjan hajim: “Barat kéchiside, deslep pütün musulmanlar ümmitige nimet-hidayet soraymiz, pütün musulmanlarning gunahlirining meghpiret bolushini soraymiz, andin özimiz üchün tilawetlerni soraymiz” dédi.

Shundaqla rehimjan hajim Uyghurlarni musulman bolghinigha shükür qilish we edep we exlaq toghrisida sözlep ötti.

Bu küni erler meschitlerde jama'et bilen bille ibadet qilsa, ayallar öyliride baliliri, qérindashliri we uruq-tughqanliri bilen bille ibadet etmekte.

“Ittipaq” jem'iyitining ezasi, ayallar kéngishining sabiq re'isi reshidem emetxanowa barat kéchiside, yash waqtidin tartip tünep we bala-newrilirige musulmanchiliqni ögitip kéliwatqanliqini sözlep ötti.

Toqmaq shehiridiki birinchi bolup qurulghan shakirxan töre namidiki meschitning xatipi imirjan qasimof: “Shaban éyida pend-nesihetler ten we qelblerni paklanduridu” dédi.