Lükchün, xoten weqeliridin kéyin d u q xelq'ara metbu'atlarning qiziqish nuqtisigha aylandi

Lükchün we xoten weqeliri yüz bergendin kéyin, gherb elliridiki köpligen axbarat wasitilirining qiziqish nishani d u q bolghan. Xitay axbaratidin gumanlan'ghan gherblikler Uyghur élide yüz bergen weqelerning heqiqiy mahiyitini bilish we d u q ning weqege qarita inkasini anglash üchün qurultay rehberlirini ziyaret qilishqa köp ehmiyet bergen.

D u q rehberlirining bergen melumatlirigha asaslan'ghanda, 5-iyul küni chet'eldiki Uyghurlar merkezliship olturaqlashqan 15 tin artuq dölette 5-iyul ürümchi weqesining 4 yilliqini xatirilesh pa'aliyetliri ötküzülidighan bolup, bu pa'aliyetler üchün uzundin béri teyyarliq qilip kelgen d u q rehberliri lükchün we xoten weqeliri yüz bergendin kéyin jiddiy téléfon yighinlirini ötküzüp, xatirilesh pa'aliyetlirining kölimi we mezmunini yenimu kéngeytishni qarar qilghan.

Biz d u q ijra'iye komitéti re'isi dolqun eysa ependini ziyaret qilip, aldi bilen néme üchün lükchün weqesini dölet ichide sir tutup kelgen xitay hökümitining xoten weqesidin bashlap uchurlarni ashkarilashqa bashlighanliqi toghrisidiki so'alimizgha jawab alduq.

D u q ijra'iye komitéti re'isi dolqun eysa ependining bildürüshiche, lükchün we xoten weqeliri yüz bergendin kéyin, gherblik köpligen axbarat organliri d u q ning her qaysi döletlerdiki rehberlirini izdep, xitay terep élan qilghan melumatning rast-yalghanliqini, d u q ning Uyghur wetinide yüz bergen weqelerge qarita pozitsiyisini bilishke tirishqan. U sözide, yalghuz axbarat wasitilirinila emes, her qaysi el hökümetlirinimu Uyghur élide yüz bergen weqelerge a'it matériyallar bilen teminleshke tirishiwatqanliqini eskertti.

Dolqun eysa ependi ziyaritimiz esnasida yene 7-ayning 2-küni xitay jama'et xewpsizlik nazariti 11 Uyghur üstidin chiqarghan tutush buyruqi heqqide toxtilip ötti. U xitay hökümitining tutush buyruqi chiqarmaymu Uyghurlarni xalighanche zerbe bériwatqanliqini bildürdi.