Dangliq naxshichi möminjan ablikim almatada konsért körsetti

Ixtiyariy muxbirimiz oyghan
2016.11.25
Share on WhatsApp
Share on WhatsApp
mominjan-ablikim-almata-qazaqistan-2016.jpg Naxshichi möminjan ablikim sehnide
RFA/Oyghan


22-Noyabirda almata shehirining jumhuriyet sariyida Uyghur élining dangliq naxshichisi möminjan ablikimning yekke konsérti bolup ötti. Qazaqistandiki talantliq sen'etkarlarning biri shatliq xudayqulof rehberlikidiki “Shatliq show” filim ishlesh merkizining uyushturushi bilen ötken bu konsértqa sheher we nahiyelerdin bolup yüzligen tamashibinlar keldi.

Igilishimizche, kéyinki yillarda qazaqistandiki quddus ghojamyarof namidiki jumhuriyetlik dölet Uyghur muzikiliq komédiye tiyatiri, shundaqla Uyghurlarning her xil sen'et guruppiliri, ataqliq naxshichiliri bilen Uyghur élining sen'et ömekliri, dangliq artistliri otturisidiki alaqe barghanséri qoyuqlashmaqta. Mushu yilning may éyida Uyghur élining sen'et yurti artistliri qazaqistanda bir nechche kün bolup, memliket paytexti astanida we Uyghurlar zich olturaqlashqan almata shehiride “Menggülük meshrep” konsértliq programmisini körsitip ketken idi. Möminjan ablikim bolsa, bolupmu qazaqistan Uyghur yashliri arisida alahide abroy-ataqqa ige bolghan naxshichilarning biridur.

Konsértni kirish söz bilen achqan sh. Xudayqulof tamashibinlarni qazaqistan u'umhuriyiti musteqilliqining 25 yilliqi bilen qizghin tebriklep, ulargha semimiy tilekler éytti we konsért qatnashquchilirini tonushturdi.

Radiyomiz ziyaritini qobul qilghan “Shatliq show” filim ishlesh merkizining mudiri shatliq xudayqulof mezkur konsértni uyushturush sewebi heqqide toxtilip, mundaq dédi: “Bu konsértni uyushturushimizning sewebi qazaqistan jumhuriyiti musteqilliqining 25 yilliqigha béghishlap, mushu oyumizni mubareklep kelgen shinjang Uyghur aptonom rayoni we asiya cholpini möminjan ablikimni özimiz söygenliktin, yashlirimizning telipi bilen qazaqistan'gha teklip qilduq. Möminjan ablikimgha da'imliq utuq tileymiz. U özining tirishchanliqi bilen “Türkiye ansambili” bilen üch dölet arisida bu konsértni ötküzüwatidu. Uning da'imliq mushundaq chong sehnilerdin körünüshini tileymiz.”

Sh. Xudayqulofning éytishiche, mezkur konsértqa shundaqla Uyghur aptonom rayonluq döletlik birinchi derijilik artis, talantliq naxshichi, möminjanning ustazi hem kichik dadisi abdulla abduréhim, uning qérindashliridin birinchi derijilik dangliq kompozitor ablehet ablikim, shundaqla yash naxshichilardin merdan ablikim qatnashti. Buningdin tashqiri, uninggha türkiye éstrada muzika sehnisining talantliq sazendilirimu teklip qilin'ghan idi.

Ziyaritimizni qobul qilghan qazaqistan jumhuriyitining xizmet körsetken artisi réhan'gül mexpirowa mezkur konsért heqqide pikrini mundaq dep bildürdi: “Omumen konsért yaman emes. Manga birla yaqmighan yéri, ussullar yoq. Hemmisige rehmet. Möminjan abdullamdek talantliq bolup ösiwersun.”

Konsértta möminjan ablikim “Intizarmen”, “Qeyerde sen”, “Uyghur”, “Dunya”, merdan ablikim “Senem”, “Yadinggha yetmidim”, abdulla abduréhim “Qemberxan”, “Oqughin”, ablehet ablékim “Bar”, “Gülüm” qatarliq naxshilarni orunlap, tamashibinlarning alahide alqishigha sazawer boldi. Tamashibinlar bu konsérttin rohiy ozuq alghanliqini, bolupmu Uyghur élining nurmuhemmet tursun, dilber yunus, abdulla abduréhim, möminjan ablikim qatarliq dangliq naxshichilirining qazaqistan Uyghurlirigha yaxshi tonush ikenlikini bildürdi. Shularning biri, almata shehirining turghuni aliyem hasanowamu öz qarishini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.