Москвада уйғур сәнәт кечилики өткүзүлди

Мухбиримиз әркин тарим
2016-10-30
Елхәт
Пикир
Share
Принт
Москвада өткүзүлгән уйғур сәнәт кечиликидин бир көрүнүш
Москвада өткүзүлгән уйғур сәнәт кечиликидин бир көрүнүш
RFA/Erkin Tarim


Русийә федератсийәсиниң пайтәхти москвада уйғур сәнәт кечилики өткүзүлди. 10 - Айниң 24 - күни ахшам өткүзүлгән уйғур сәнәт кечилики хәлқаралиқ уйғур тәтқиқати илмий муһакимә йиғининиң 2 - күни өткүзүлгән болуп, кечиликкә қазақистан җумһурийәтлик уйғур тиятириниң тонулған тәмбурчиси мурат норузов, дутарчи үмитҗан қасимов, қирғизистанлиқ тонулған уйғур нахшичи шөһрәт яқупоф қатарлиқлар алаһидә тәклип бойичә иштирак қилип, уйғур нахша - музикилиридин өрнәкләр көрсәтти.

Булардин сирт йәнә бәзи чәтәллик мутәхәссисләрму дутар челип нахша ейтип, усул ойнап йиғин әһлиниң қаттиқ алқишиға муйәссәр болди. Тонулған тәмбүрчи мурат норузов тәмбүр билән бир йүрүш музикиларни орунлиди.

Америка қошма штатлири индиана университетиниң доктор аспиранти андерсон әлиса ханим йеқинқи йиллардин буян уйғур диярида һәммә киши қизиқип аңлайдиған «барғум йоқ мениң, мәшрәп йоқ йәргә» дегән нахшини дутар билән тәңкәш қилип оқуп, йиғин әһлиниң юқири алқишиға еришти.

Уйғур сәнәт кечилики ахирлашқандин кейин, зияритимизни қобул қилған қазақистандики абай университети оқутқучиси доктор алимҗан һәмрайев әпәнди, чәтәллик уйғуршунасларниң уйғурларниң тили, әдәбияти, җәмийити вә уйғур мәсилисини тәтқиқ қилипла қалмастин, бәлки йәнә уйғурларниң сәнитиниму наһайити яхши өзләштүргинигә һәйран қалғанлиқини баян қилди.

Германийә гөтиңгән университети оқутқучиси доктор абләт сәмәт әпәнди уйғур сәнәт кечиликиниң яхши өткәнликини, өзиниң қаттиқ тәсирләнгәнликини баян қилди.

Доктор алимҗан һәмрайев әпәнди 24 - өктәбир күни ахшам өткүзүлгән уйғур сәнәт кечиликиниң дуняниң һәрқайси җайлиридин кәлгән мутәхәссисләрниң өзара чүшиниши үчүн зор әһмийәткә игә икәнликини баян қилди.

Доктор абләт сәмәт әпәнди чәтәллик уйғуршунасларниң уйғур тәтқиқатида мувәппәқийәт қазинишидики сәвәбләр тоғрисида тохталди.

Доктор алимҗан һәмрайев әпәнди русийә пәнләр академийиси шәрқшунаслиқ институтиниң мәсули дмитрий василйевниң зор күч чиқириши билән москвада өткүзүлгән бу қетимқи паалийәтниң уйғур тәтқиқатиниң келәчики үчүн зор әһмийәткә игә икәнликини баян қилди.

Бу паалийәтни шәрқшунаслиқ институти билән москвадики уйғур мәдәнийәт уюшмиси бирликтә өткүзди.

23 - Өктәбир күнидин 26 - өктәбир күнигичә давамлашқан хәлқаралиқ уйғур тәтқиқати илмий муһакимә йиғини җәрянида уйғур рәссамлири йәнә рәсим көргәзмисиму ачқан иди.

Пикирләр (0)
Share
Толуқ бәт