Метин қилич: уйғурлар өзлири яшаватқан әлләрдә зор төһпә қошмақта

Ихтиярий мухбиримиз фирузә
2017-11-23
Елхәт
Пикир
Share
Принт
Түркийә җумһурийитиниң қирғизистанда турушлуқ баш әлчиси метин қилич әпәнди(солда) қирғизистан уйғур «иттипақ» җәмийитиниң рәиси артиқ һаҗийеф әпәнди билән. 2017-Йили ноябир, бишкәк.
Түркийә җумһурийитиниң қирғизистанда турушлуқ баш әлчиси метин қилич әпәнди(солда) қирғизистан уйғур «иттипақ» җәмийитиниң рәиси артиқ һаҗийеф әпәнди билән. 2017-Йили ноябир, бишкәк.
RFA/Firuze

Түркийә җумһурийитиниң қирғизистанда турушлуқ баш әлчиси метин қилич әпәнди, түрк милләтләрниң һәмкарлиқ вә тәрәққият идарисиниң баш мәслиһәтчиси камил қоллабаш қатарлиқ кишиләр қирғизистан уйғурлириниң «иттипақ» җәмийитини зиярәт қилип, уйғур хәлқи тоғрисида иссиқ нутуқларни изһар қилишти.

Мәзкур мурасимда метин қилич әпәнди нөвәттики уйғур вәзийити һәққидә сөзләп, уйғурлар өзлири яшаватқан дөләтләрдә садиқ вәтәндашлар болуп, һәр қайси җәһәтләрдин зор төһпиләрни қошуп келиватқанлиқини оттуриға қойди.

«Уйғурлар наһайити әпсус бүгүнки күнләрдә юртидики вәзийәтниң қийинлиқидин һәр қайси дөләтләргә тарқилип кетипту, уйғурлар өзлири яшаватқан дөләтләргә садиқ вәтәндашлар болуп турмақта. Улар сиясий, иқтисадий вә мәдәнийәт җәһәтләрдә зор төһпиләрни қошмақта. Уйғурлар қәдимий тарихқа игә бир милләт болғачқа бүгүнму өзлири туруватқан дөләтләрниң мәдәнийитигә зор төһпиләрни қошуватқанлиқини өз көзүм билән көрдүм. »

«Иттипақ» җәмийитиниң рәиси артиқ һаҗийеф түркийә җумһурийити вә баш әлчи метин қилич әпәндигә көрсәткән ярдәмлири үчүн рәһмәт ейтти. Арқидин баш әлчигә уйғурларниң әнәниви миллий тони, доппа вә «еһсан» медали тәқдим қилди.

«Еһсан» медали қирғизистан уйғурлириниң «иттипақ» җәмийитиниң тәшәббускалиқида тәсис қилинған медал болуп, қирғизистан дөлитигә хизмәт көрсәткән уйғурларға вә уйғур хәлқиниң тәрәққиятиға төһпиләрни қошқан шәхсләргә тарқитилиду. Зияритимизни қобул қилған камилҗан ниязоф, «еһсан» медалиниң илгири кимләргә берилгәнлики вә немә сәвәбтин түркийә әлчисигә тәқдим қилиниватқанлиқи һәққидә өз қарашлирини изһар қилди.

Биз йәнә ақсақаллар кеңишиниң рәиси абабәкри хатибақийефни зиярәт қилдуқ. У сөзидә метин қилич әпәндиниң қирғизистандики уйғур җамаитигә қилған ярдәмлиригә рәһмәт ейтти.

Мәзкур паалийәткә қатнашқан түркийә җумһурийити ташқи түркләр һәмкарлиқ вә тәрәққият идарисиниң баш мәслиһәтчиси камил қоллабаш әпәнди бүгүнки күндә уйғурлар дуч келиватқан қийинчилиқлар һәққидә сөз қилип, уйғур хәлқиниң түрк хәлқигә қериндаш хәлқ икәнликини түркийә җумһурийитиниң мумкинчилик болған тәқдирдә уйғурларға ярдәм қилидиғанлиқини билдүрди.

Метин қилич 2012-йилидин буян түркийәниң қирғизистандики баш әлчилик вәзиписини өтәп кәлгән болуп, бу йил униң хизмәт муддити тошқан. Өткән 4 йил җәрянида у қирғизистандики көплигән маддий вә мәниви ярдәмләрни көрсәткән иди. У ахирида сөз қилип, қирғизистандики уйғур хәлқиниң меһмандостлуқини унтумайдиғанлиқини вә бу достлуқни түркийәдә давамлаштуридиғанлиқини изһар қилди.

Пикирләр (0)
Share
Толуқ бәт