Nobél mukapatigha érishken eziz sanjarni Uyghurlarmu kütüwaldi

Türkler arisida tunji qétim ximiye mukapatigha érishken eziz sanjar ependi 14 - dékabir küni enqereni ziyaret qilish üchün kelgende esenbogha ayrodromida uni qarshi alghanlar qatarida Uyghurlarmu gül teqdim qilip kütüwaldi.

Enqerediki Uyghurlargha wakaliten mirkamil qeshqerli ependi bilen shé'ir déklamatsiye qilip dang chiqarghan kichik müjahit qeshqerli, qolida güldeste kötürgen halda eziz senjerning uruq - tughqanliri we dölet erbapliri bilen birlikte uni kütüwaldi. Uyghur perzenti kichik mujahit bilen mirkamil qeshqerli pütün Uyghurlarning tebrik we salimini uninggha bildürüp, Uyghur doppisi kiydürginide doktor eziz sanjar rehmet éytip kichik müjahitning mengzige söyüp qoydi.

Mirkamil qeshqerlining éytishiche, Uyghurlar teqdim qilghan güldestining üstige“Kök bayraqtin qizil bayraqqa salam” dégen jümle yézilghan bolup, güldestini qoligha élip, Uyghur doppisini béshigha kiygen doktor eziz sanjar ependi intayin xushal bolghanliqini bildürüp, Uyghurlargha otluq salimini yollaydighanliqini éytqan.

Proféssor doktor eziz sanjar ependi “D n a” üstide élip barghan tetqiqatlarda dewr bölgüch yéngiliq yaritip, ximiye penliri boyiche nobél mukapatigha érishken alimdur.

Proféssor doktor eziz sanjar ependi türkiye jumhur re'isi rejep tayyip erdoghanning alahide teklipige bina'en, shiwétsiyediki murasimda nobél mukapatini tapshurup alghandin kéyinla udul türkiyege yétip keldi. Bügün,yeni 15 - dékabir küni türkiye dölet re'isi rejep tayyip erdoghan, bash ministir exmet dawutoghlu ependi we türkiye armiyesi bash shitabi qomandani xulusi aqar ependiler uni ayrim - ayrim qobul qilip, tebriklidi we uning bilen ilim - pen tetqiqatliri we türkiyening mesililiri toghrisida sohbetleshken.

Amérikida“Türk öyi” achqan we ayali “Türk öyi”ning mudirilik wezipisini ötewatqan proféssor doktor eziz sanjar ependi türkiy jumhuriyetlerdin kelgen oqughuchilargha bolupmu, Uyghur oqughuchilargha yéqindin yardem qilghan iken.

Proféssor eziz sanjar ependi 1946 - yili türkiyening mardin wilayitide dunyagha kelgen bolup, u a'ilide 8 balining 7 - si iken. U bir qétimliq nutiqida, ata - anisining sawatsiz ikenlikini, biraq ma'aripqa nahayiti ehmiyet béridighanliqini éytqan. Eziz sanjar ependi 1971 - yili istanbul uniwérsitéti méditsina fakultétini püttürgendin kéyin bilim ashurush üchün amérikigha barghan. U méditsina fakultétini püttürgendin kéyin élip barghan tetqiqatliri netijiside amérika döletlik ilimler akadémiyesige qobul qilin'ghan 3 türkning biri iken. U, 1997 - yilidin tartip muqim halda amérika shimaliy karolina chapél hél uniwérsitéti hemde shimaliy karolina uniwérsitétida bi'o - ximiye we bi'o - fizika bölümide xizmet qilghan. Bu jeryanda u, 300ge yéqin ilmiy maqalisi we bu maqaliliridin élin'ghan 12000 üzünde bilen ilmiy tetqiqatlarda mislisiz muweppeqiyetlerge érishken. Uning “D n a” üstide élip barghan tetqiqatlarda qolgha keltürgen utuqliri dewr bölgüch yéngiliq dep qaralmaqta.

Eziz sanjar ependi türk yazghuchisi orxan pamuktin kéyinki nobél mukapatigha érishken ikkinchi türk alimidur.