Пакистан даирилири өмәр уйғурни “һиндистан җасуси” дегән гуман биләнму тәкшүрмәктикән

Мухбиримиз шөһрәт һошур
2018-01-26
Share
pakistan-omer-uyghur-wexpi.jpg Өмәр уйғур вәхпиниң “шәрқи түркистан җумһурийәтлирини хатириләш” паалийити
Photo: RFA

Ашкарилинишичә, пакистанда паалийәт елип бериватқан өмәр уйғурни хитайниң 19‏-қурултийи һарписида 9 күн тутқун қилған вә һелиһәм тәкшүрүватқан пакистан сақчилири уни “һиндистанға җасуслуқ қилиш” гумани биләнму сорақ қилған. Сорақ давамида сақчилар өмәр уйғурға униң һиндистанлиқ бир хадимдин бир нәрсә тапшуруп еливатқан көрүнүштики бир рәсимни пакит қилип көрсәткән. Өмәр уйғур бу рәсимниң фотошопта ясалғанлиқи вә хитай тәрипидин тәминләнгәнлик еһтималлиқини оттуриға қойған. Мәлум болушичә, һелиһәм давам қиливатқан бу тәкшүрүш өмәр уйғур аилисиниң тиҗаритини зор дәриҗидә ақсатқан.

Хитайниң 19‏-қурултийи һарписида бирқанчә машинида кәлгән пакистан сақчилири өмәр уйғурни тутуп 9 күн солап қойған. Шундин кейин кейин нәзәрбәнд қилинған өмәр уйғур тәкшүрүлүш давамида пакистан сақчилири тәрипидин “һиндистанға җасуслуқ қилиш” гумани биләнму сорақ қилинған. У дәсләптә тутулған күни пакистандики хитай баш әлчисини өлтүрүшни пиланлиғанлиқи илгири сүрүлгән бир уйғур гумандар билән четишлиқи сүрүштә қилинған. Өмәр уйғурда бу җәһәттә мәсилә көрүлмигәндин кейин, “һиндистанға җасуслуқ қилиш” гумани билән сорақ қилинған. Өмәр уйғур өзигә көрситилгән пакитниң, йәни һиндистанлиқ бир хадим билән биргә турған рәсимниң фотошопта ясап чиқилғанлиқини сезип, бу рәсимниң әсли нусхисини фейсбук һесабидин тепип сақчиларға көрситиш арқилиқ өзиниң гунаһсизлиқини дәлиллигән. Мәлум болушичә, мәзкур рәсимдә өмәр уйғурниң һиндистанниң афғанистандики бир хадимидин пул еливатқан көрүнүши ясап чиқилған икән.

Өмәр уйғурниң дейишичә, у алдинқи йили афғанистанға у йәрдики уйғурлар үчүн ана тил мәктипи қуруш вә афғанистандики уйғурларниң нөвәттики әһвали һәққидә дуня уйғур қурултийиға мәлумат топлаш үчүн барған. Бу җәһәттики барлиқ паалийәтлириниң ашкара вә қанун-түзүм даирисидә елип берилғанлиқини баян қилған өмәр уйғур, өзиниң һечқандақ бир һиндистанлиқ дөләт хадими билән алақә қилип бақмиғанлиқини, буниң пүтүнләй хитай әлчиханиси тоқуған һекайә икәнликини оттуриға қойди.

Узунға созулған вә һазирғичә ахири чүшмигән бу тәкшүрүш, униң йүрүш-туруш вә иҗтимаий алақә әркинликидин башқа, шәхсий тиҗаритигиму еғир тәсир көрсәткән. 30 Нәччә ишчиси болған бир йемәк-ичмәк фабрикисиниң саһиби болған өмәр уйғур, һазирға қәдәр бу фабрикидин қазанған тапавити билән өз аилә тавабиатлириниң турмушини қамдапла қалмастин, йәнә өз тәшкилатниң пакистан ичи-сиртидики паалийәтлириниңму хираҗәт мәнбәси болуп кәлгән. У түркийә сәпири бикар қилинған вә өзигә қоюлған саяһәт чәклимиси үстидин пакистанға әрз сунған чағдиму, мушу икки ишқила сәрп қилған 20 миң доллардин артуқ чиқимни әнә шу тиҗаритиниң күчи билән һәл қилған вә хитайниң һәр түрлүк тосуқлири үстидин ғалип келиватқан иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт