Pakistanning xitay re'isi shi jinpingni tonushturup mexsus zhurnal neshr qilghanliqigha qarita inkaslar

Ixtiyariy muxbirimiz ekrem
2016.02.22
Share on WhatsApp
Share on WhatsApp
pakistan-shi-jinping-kitab.jpg Pakistanning re'isi shi jinpingni tonushturup yazghan tunji kitabi “2015-Yilliq siyasiyon ‏- shi jinping” ni tarqitish murasimi. 2016-Yili féwral, islam'abad.
news.cn

Xitay axbarat wasitiliri 19-féwral küni “Pakistan tekshürgüchi géziti” neshr qilghan “2015-Yilliq siyasiyon ‏- shi jinping” bash témisidiki renglik mexsus zhurnalni tarqitish murasimi ötküzgenlikini xewer qildi.

Xitayning “Xelq tori” we “Tengritagh tori” qatarliq hökümet axbarat wasitilirining 19-féwral küni shinxu'a agéntliqi xewiridin neqil élishiche, 18-féwral küni pakistan paytexti islam'abadta pakistandiki moda éqimdiki in'glizche gézit “Pakistan tekshürgüchi géziti” neshr qilghan “2015-Yilliq siyasiyon ‏- shi jinping” bash témisidiki 100 betlik renglik mexsus zhurnalni tarqitish murasimi ötküzülgen bolup, murasimda pakistan bash ministirining tashqi ishlar meslihetchisi eziz bu zhurnalning tarqitilghanliqini qizghin tebrikligen.

Xewerde bayan qilinishiche, murasimgha junggoning pakistanda turushluq bash elchisi sün wéydung we pakistan-junggodiki herqaysi sahelerdiki zatlardin bolup, 200 din artuq kishi qatnashqan. Pakistan bash ministirining tashqi ishlar meslihetchisi eziz murasimda söz qilip mundaq dégen: “Shi jinping bir yiraqni körer, bilimi mol, közge körün'gen siyasiyon. U junggo we dunyaning tereqqiyati üchün nurghun yéngi idiye we tonushlarni otturigha qoyghan. U otturigha qoyghan ‛bir belwagh, bir yol‚ teshebbusi keng we parlaq tesirge ige boldi. ‛junggo-pakistan iqtisad karidori‚ bir belwagh, bir yoldiki bayraqdar tür bolush süpiti bilen, pakistan we pütün rayonning qiyapitini özgertishte ghayet zor rol oynaydu.”

Xewerde tilgha élinishiche, “Mexsus zhurnal 100 betke yéqin bolup, süret bilen yéziq kirishtürülüp, shi jinpingning junggoning dölet rehbiri bolush süpiti bilen ichki siyaset we diplomatiye qatarliq jehetlerdiki döletni idare qilish istratégiyesi we gewdilik töhpisi shundaqla uning ösüp yétilish jeryani hemde a'ile turmushi herxil nuqtidin omumyüzlük tonushturulghan.”

Xewerde yene, xitayning pakistanda turushluq bash elchisi sün wéydung: “Pakistan tekshürgüchi géziti” ning pakistanda elrayi tekshürüshi élip bérip, re'is shi jinpingni 2015-yilliq siyasiyon qilip tallishi hemde bu heqte mexsus zhurnal neshr qilishi pakistandiki her sahening junggoning rehbirige bolghan yüksek qayilliqini toluq ipadilep berdi, junggo-pakistan dostluqining keng da'iride étirap qilinishqa we qollashqa ériship, mustehkem elrayi asasigha ige bolghanliqini namayan qildi” dégen.

Bu munasiwet bilen biz, d u q bayanatchisi dilshat réshit, gérmaniyediki Uyghur diniy ölimaliridin turghunjan alawudunhajim we xitayning pakistan elchixanisining sabiq diplomati, hazir shiwétsariyede yashawatqan Uyghur ziyaliysi kérem shérip qatarliqlar bilen söhbet élip bérip, ularning qarashlirini igiliduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.