Qazaqistanning chélek yézisida yash talantlar féstiwali ötküzüldi

Ixtiyariy muxbirimiz oyghan
2016-05-18
Élxet
Pikir
Share
Print

15-May küni almata wilayitining emgekchiqazaq nahiyisige qarashliq chélek yézisidiki medeniyet öyide qazaqistan musteqilliqining 25 yilliqigha béghishlan'ghan "Hoshshere, yash talantlar" féstiwali bolup ötti. Emgekchiqazaq nahiyilik Uyghur étnomedeniyet merkizining uyushturushi, nahiyilik hakimiyetning we qazaqistan Uyghurlirining jumhuriyetlik étnomedeniyet merkizining qollap-quwwetlishi bilen ötken körneklik meripetchi hébibullam qaharof namidiki jumhuriyetlik 17-féstiwalgha almata shehiri we almata wilayitining Uyghur, panfilof, talghir we emgekchiqazaq nahiyiliridiki mekteplerdin 600ge yéqin oqughuchi qatnashti. Mezkur pa'aliyetni uyushturush ishlirigha bolupmu qaharoflar a'ilisi we chélek yézisidiki abdulla rozibaqiyéf namidiki ottura mektep kolléktipi, shundaqla xanim-qizlar kéngeshliri köp küch chiqardi.

Igilishimizche, féstiwalning asasiy meqsiti Uyghur mekteplirining bilim süpitini kötürüsh we kélechikidin ümid kütküzidighan balilarning öz bilimi we talantini namayan qilishigha imkaniyet yaritishtin ibaret bolup, on yette yil mabeynide buning arqisida köpligen Uyghur baliliri yuqiri pellilerge érishken.

Emgekchiqazaq nahiyilik Uyghur étnomedeniyet merkizi re'isining orunbasari aynisem waydénowaning péshqedem ustaz h. Qaharowning terjimihali we emgek pa'aliyiti heqqidiki doklatidin kéyin sözge chiqqan jumhuriyetlik Uyghur étnomedeniyet merkizi re'isining orunbasari, emgekchiqazaq nahiyilik Uyghur étnomedeniyet merkizining re'isi sulayman mexsütof, nahiyilik yashlar merkizining bashliqi, nahiyilik meslihet aliy kéngishining ezasi aybék ilibayéf, emgekchiqazaq nahiyisining hakimi bineli isqaq, nahiyilik meslihetning katipi békét axmétof, h. Qaharofning repiqisi gheyretbüwi seydalim qizi we bashqilar féstiwalning kelgüsi milletperwer, wetenperwer shexslerni terbiyileshtiki ehmiyiti heqqide toxtilip, uni uyushturghuchilargha minnetdarliqini bildürdi.

Radiyomiz ziyaritini qobul qilghan féstiwal qazilar komissiyisining ezasi, "Alamet" filim ishlesh merkizining mudiri qelbinur roziyéwa qazaqistanda Uyghur we bashqimu xelqlerning milliy alahidiliklirini saqlap, rawajlandurushigha barliq shara'itlarning yaritilghanliqini, bu qétimqi pa'aliyetning shuning yarqin bir misali ikenlikini ilgiri sürüp, mundaq dédi: "Tebi'itidin adil, dili pak, köngli aq, meripetchi h. Qaharof yash waqitliridin bashlap yashlirimizning kélechikige köngül bölgechke, mushundaq bir féstiwalni addiy bir mekteptin bashlighan iken. Mana bügünki künde shu atining izini basqan oghli meqsedjan akining teshebbusi we dawamlashturushi bilen bu féstiwal jumhuriyet miqyasida ötküzülüp kelmekte."

Féstiwal bilim, shahmat, teswiriy sen'et, shé'ir, dramiliq sehnileshtürülgen körünüsh, leper ijra qilish, milliy naxsha, milliy yekke ussul, milliy top ussuli we milliy saz yönilishliride dawam qildi. Iliya bextiya namidiki ottura mektepning ilmiy mudiri gülwira mengsürowa, talghir agrobiznés téxnikomining oqutquchisi azad nizamof, qazaqistan'gha xizmiti singgen ressam exmetjan ehedbaqiyéf, sha'ire we alime patigül mexsetowa, "Alamet" filim ishlesh merkizining mudiri qelbinur roziyéwa, "Asі'a plus rechords" studiyisining mudiri eherdin yüsüpof, q. Ghojamiyarof namidiki jumhuriyetlik dölet Uyghur muzikiliq komédiye tiyatiri artisi gülnisem sadiqowa we tiyatirning bedi'iy rehbiri niyaz tursunof teshkil qilghan Uyghur tiyatiri mudirining meslihetchisi sawutjan sonurof rehberlikidiki qazilar topi féstiwal ghaliblirigha pexriy yarliqlar we bahaliq soghilar tapshurdi.

Q. Roziyéwa Uyghur tilida bilim bériwatqan yigirmidin oshuq mektepler oqughuchiliri qatnashqan mezkur pa'aliyetning on bir sa'et dawam qilip, uningdin qattiq tesirlen'genlikini bildürdi: "Yash ghunchilirimizning naxshiliri, milliy saz eswablirida oynashliri, ussulliri, éytqan leperliri ta hazirghiche quliqimdin ketmey, jaranglap turidu. Men kélechikimizde yash ewladlirimizning senitimizni, edebiyatimizni, tilimizni saqlap, yenimu büyük choqqilargha yetküzidighinigha köz yetküzdüm."

Féstiwal méhmanliri Uyghur balilirining milliy kiyimlerde naxsha éytish, ussul oynash, ana tilida erkin sözlesh oxshash qabiliyetlirini körüp, chongqur hayajanlan'ghanliqini, mushundaq pa'aliyetlerning milliy kimlikni saqlap qélishtiki ehmiyitini alahide tekitlidi. Shularning biri maharet imirowaning éytishiche, h. Qaharof öz waqtida perzendlirige bu ishni yenimu dawamlashturushni wesiyet qilip, yashlarni kélechekke ümid bilen qarishi üchün mushundaq pa'aliyetlerni ötküzüp turushning muhimliqini eskertken. U mundaq dédi: "Qaharoflarning bu ishi yashlirimiz üchün chong bir köwrüktur. Méning éytmaqchi bolghan pikrim, biz asasen ussuldin, naxshidin musabiqiler ötküzimiz. Némishqa mundaq féstiwallarni matématika, fizika, ximiye penliridin ötküzmeymiz? kélechekte shundaq penlerdinmu balilirimiz birinchiliklerni, ikkinchiliklerni igilise..."

Toluq bet