Mutexessisler qazaqistanda muddettin burun ötküzülidighan prézidént saylimi heqte toxtaldi

Qazaqistanda 26-aprél küni, muddettin burun ötküzülidighan prézidént saylimigha teyyarliqlar qizghin kétip barmaqta. Yerlik ammiwi axbarat wasitilirining xewer qilishiche, yéqinda qazaqistan jumhuriyiti merkiziy saylam komissiyisi 2015-yil 26-aprélda ötküzüsh belgilen'gen qazaqistan jumhuriyiti prézidéntining nöwettin tashqiri saylimigha teyyarliq qilish we saylam ötküzüsh boyiche asasiy chare-tedbirlerning kaléndarliq pilanini testiqlidi.

Prézidéntliqqa namzadlarni körsitish 26-féwralda bashlan'ghan bolup, 15-martta ayaghlashmaqchi. Qazaqistan qanuni boyiche royxetke élin'ghan jumhuriyetlik ijtima'iy birleshmiler we puqralar özlirini namzadliqqa körsitish hoquqigha igidur. Saylighuchilarning prézidént namzadlirini qollap-quwetlishi ularning imzasini toplash arqiliq gewdilendürülidu. Imzalar sani wilayetlerning we astana hem almata sheherlirining kem dégende üchtin ikki qismigha oxshash wakaletlik qilidighan saylighuchilarning omumiy sanining bir pirsentidin kem bolmasliqi kérek. Prézidént namzati bolidighan kishi merkiziy saylam komissiyisining hésabatigha 1 milyon 60 ming tengge miqdarida saylam bedilini tölishi hajettur.

Kéyinki melumatlargha qarighanda, 2-marttin 9-martqiche bolghan ariliqta 14 adem öz namzadlirini körsitishke iltimas sun'ghan bolup, türlük seweblerge asasen merkiziy saylam komitéti ularning bezilirini qobul qilishtin bash tartqan. Emdi bügün, 11-martta, astana shehiride memliket prézidénti nursultan nazarbayéfning re'islikide “Nur otun” partiyisining 16-qurultiyi bashlandi. Ikki minggha yéqin kishi qatnashqan mezkur qurultayda prézidéntliq saylamgha nazarbayéfning namzatliqi körsitildi.

Jumhuriyetlik “Uyghur awazi” gézitide élan qilin'ghan “Muddettin ilgiridiki prézidént saylimi: mutexessisler pikri” namliq maqalidiki melumatlargha qarighanda, 2015-yili 26-féwralda qazaqistan ijtima'iy siyasiy tetqiqatlar instituti memliketning barliq rayonliridin iqtisadchilar, siyasetshunaslar, jem'iyetshunaslar, hökümetke tewe emes teshkilatlarning wekilliridin terkib tapqan 76 mutexessisning muddettin ilgiriki prézidént saylimigha baghliq pikirlirini sorap bilgen. Uning netijiliri boyiche, mutexessislerning 93 pirsenti “Muddettin ilgiriki prézidént saylimining ötküzülüshini muhim”, 92 pirsenti “ Waqit teleplirige jawab béridu”, 95 pirsenti “ Siyasiy jehettin toghra”, 94 pirsenti “Hazirqi iqtisadiy shara'itta zörür”, 94 pirsenti “Qazaqistan jumhuriyiti asasiy qanunining teleplirige muwapiq”, 98 pirsenti “Shexsen memliket we xelq menpe'etlirige muwapiq” dep hésablighan.

Ularning 98 pirsenti bolsa, dölet rehbirining prézidént saylimini 2015-yiligha yötkesh qararini qollap-quwwetligen.

Prézidéntliqqa öz namzadliqini körsetken bu 14 ademning derijisi qandaq? ular mundaq chong wezipige öz namzadlirini körsitishke layiqmu?

Radiyomiz ziyaritini qobul qilghan “ Altérnatiwa ” kélechek tetqiqatliri merkizining mudiri andréy chébotaryéf we siyasetshunas ghalim agélé'u'of bu heqte öz qarashlirini bildürdi.