Qazaqistan Uyghurliri noruz bayrimini tebriklidi

24-Martta almata shehiride orunlashqan dostluq öyide qazaqistan Uyghurlirining jumhuriyetlik milliy-medeniyet merkizining uyushturushi bilen noruz bayrimini tebriklesh murasimi bolup ötti. Uninggha qazaqistan parlaménti aliy kéngishi ezaliri, qazaqistan xelqi assambléyesi hem her xil Uyghur jem'iyetlik birleshmiliri wekilliri, ziyaliylar, yurt-jama'etchilik qatnashti.

Murasimni achqan jumhuriyetlik medeniyet merkizi re'isining orunbasari, “Uyghur awazi” gézitining bash muherriri yérshat esmetof pütkül yurt-jama'etchilikni qazaqistan parlaménti aliy kéngishining ezasi, qazaqistan xelqi assambléyesi kéngishining ezasi, merkez re'isi shahimerdan nurumof namidin noruz bayrimi bilen tebriklep, mezkur murasimgha qatnashqan wekillerni tonushturdi. Sözge chiqqan qazaqistan xelqi assambléyesining ezasi, qazaqistan kurdliri birleshmisining re'isi knyaz mirzoyéf, qazaqistan xelqi assambléyesining almata shehiri boyiche re'isining orunbasari qazbék mansurof, astana sheherlik Uyghur medeniyet merkizining re'isi rustem abdusalamof, jumhuriyetlik medeniyet merkizi yénidiki yigit bashliri kéngishining re'isi abduréshit mexsutof, shundaqla nahiyilik Uyghur medeniyet merkezliri, xanim-qizlar kéngeshliri wekilliri we bashqilar milletler dostluqi, tinchliq, razimenlik heqqide öz pikirlirini otturigha qoydi.

Radi'omiz ziyaritini qobul qilghan almata shehiri gorniy gigant mehelliside yashawatqan péshqedem yurt aktipi sabit hajim yüsüpof noruz bayrimi heqqide toxtilip, mundaq dédi: “Burun ata-bowilirimiz mushu bayramni daghdughiliq bilen ötküzetti. Chünki yéngi yilning bashlinishi chong bayram hésablinatti. Bu qedimidin kéliwatqan noruzni jumhuriyetlik medeniyet merkizi namidin ötküzüwatimiz. Pütkül dunya türkiy xelqlirini mushu noruz bayrimi bilen chin dilimdin tebrikleymen. Hemmiside ittipaq, birlik bolsun! bayriminglar mubarek bolsun!”.

Ziyaritimizni qobul qilghan “Tinchliq dunyasi” xelq'ara qazaq ijadiy birleshmisining mu'awin prézidénti tursun roziyéf qazaqistan musteqilliq alghandin buyan noruz bayrimini tebrikleshning omum xelq tentenisige aylan'ghanliqini, 2002-yildin tartip dostluq öyide bu bayramning resmiy nishanlinip kéliwatqanliqini, shundaqla her yili Uyghurlarning jem'iyetlik birleshmilirining bu bayramni atap ötüshte her xil pa'aliyetlerni uyushturuwatqanliqini tekitlep, mundaq dédi: “Uyghur milliy birleshmisi bu qétimda köp küch chiqardi. Men medeniyet merkizi qurulghan birinchi kündin tartip ishlewatimen. Sheherlik medeniyet merkizi sheherde ishlise, he, jumhuriyetlik medeniyet merkizini bizning wilayetlerde kütüp turidu. Hazir mehellilerde medeniyet öyliri, kutupxanilar yéngiwashtin échiliwatidu. Ulargha kitablar yétishmeywatidu. Shuninggha medeniyet merkezliri köngül bölse.”.

Tursun roziyéf Uyghurlar yashawatqan her bir sheher, her bir nahiyide téxi hel bolmaywatqan milliy mesililerning mewjut ikenlikini, shularni bir terep qilishning alliqachan waqti yetkenlikini tekitlidi.

Ziyaritimizni qobul qilghan jumhuriyetlik Uyghur medeniyet merkizi yénidiki “Nuraniy anilar kéngishi”ning re'isi jahan'gir muratowa pütkül Uyghur jama'etchiliki hemde türkiy xelqlerni noruz bayrimi bilen chin qelbidin tebriklep, mundaq dédi: “Noruz bayrimida dostluqimizni kücheytip, qazaqistanda téximu yaxshi yashayli. Bizning ussulchi, naxshichi, dutarchi qizlirimiz jiq iken. Shuningdin paydilinip, men "bahar" ansambilini qurdum. Bügün dostluq öyide ikki naxsha éytip berduq. Hemmisi yaxshi alqishlar bilen qarshi aldi”.

Igilishimizche, noruz bayrimigha béghishlan'ghan her xil pa'aliyetler Uyghurlar zich olturaqlashqan almata wilayitining talghir, emgekchiqazaq, Uyghur, panfilof we bashqimu nahiyiliride 21-marttin bashlap atap ötüldi. Ulargha Uyghurlar bilen birlikte qazaq, tatar, türk, ezerbeyjan oxshash her xil millet wekillirimu qatnashti. Mezkur pa'aliyetlerni Uyghur medeniyet merkezliri, yigit bashliri yerlik hakimiyet organliri bilen birlikte uyushturdi.