Қазақистанниң уйғур наһийисигә қарашлиқ юрт-җамаәтчилик актиплири баш қошти

Ихтиярий мухбиримиз ойған
2016-12-23
Елхәт
Пикир
Share
Принт
Қазақистандики җумһурийәтлик уйғур миллий мәдәнийәт мәркизи әзалири хатирә сүрәттә. 2014-Йили май.
Қазақистандики җумһурийәтлик уйғур миллий мәдәнийәт мәркизи әзалири хатирә сүрәттә. 2014-Йили май.
RFA/Oyghan

Уйғур наһийәлик уйғур мәдәнийәт мәркизи, йигит башлири, ханим-қизлар кеңәшлири, ақсақаллар кеңиши, яшлар комитетиниң уюштурушида таштиқара йезисиниң «нурниса» ристоранида өткән юрт-җамаәтчилик актиплириниң бу баш қошушида тәшкилий ишлар, миллий өрп-адәтләр, мәдәний-маарип, мәтбуат вә башқиму мәсилиләр муһакимә қилинди. Униңда шундақла илгири вә йеңидин сайланған наһийилик мәдәнийәт мәркизи рәиси вә баш йигит беши, йеза актиплири тонуштурулди.

Мәзкур учришишни ачқан наһийилик уйғур мәдәнийәт мәркизиниң рәиси мирзахмәт җәмийеф бу йиғилишниң мәқситини чүшәндүрүп, мәркәз алдида турған вәзипиләрни тонуштурди. Униңға қатнашқан қазақистан уйғурлириниң җумһурийәтлик етно-мәдәнийәт мәркизи йенидики йигит башлири кеңишиниң рәиси абдурешит мәхсүтоф башлиқ алмата шәһириниң достлуқ вә заря востока мәһәллириниң чоң йигит башлири, шундақла уйғур наһийилик баш йигит беши абдукерим сәйдуллайеф, наһийилик ханим-қизлар кеңишиниң рәиси шеринбүви җәлилова вә башқилар мәдәнийәт мәркәзлири вә йигит башлириниң уйғур җәмийитидики роли, уларниң һөкүмәт органлири вә юрт-җамаәтчилик билән бирликтә елип бериватқан ишлири, наһийә миқиясида һәл қилинмайватқан иҗтимаий мәсилиләр, орун еливатқан кәмчиликләр һәққидә өз пикирлирини билдүрди.

Радийомиз зияритини қобул қилған йигит башлири кеңишиниң рәиси абдурешит мәхсүтоф җумһурийәтлик йигит башлири кеңиши қурулғандин буян қазақистанниң барлиқ шәһәр,йезилиридики уйғур йигит башлириниң беши қошулуп, миллий маарип, мәдәнийәт, мәтбуат вә башқиму йөнилишләрдә көплигән ишларниң қилинғанлиқини, шундақла хәйрихаһлиқ паалийәтлириниңму елип берилғанлиқини илгири сүрүп, мундақ деди: «бүгүн пүтүн уйғур районидики йигит башлири билән баш қошуп, учришиш өткүзүп кәлдуқ. Биринчидин уларни келиватқан йеңи йил, шундақла қазақистан мустәқиллиқиниң 25 йиллиқи билән тәбриклидуқ. Алдимизда қилидиған ишлар тоғрилиқ сөз болди. Мәсилән, пүтүн қазақистан йигит башлириниң бешини қошуп, бәгләр мәшрипини уюштурмақчимиз. Бу йәрдә юрт-юртларда болуватқан йеңилиқлар, һәр түрлүк мәсилиләр һәққидә сөз болиду.»

А. Мәхсүтоф бу йили қазақистан уйғурлириниң чоң утуқларға йәткәнликини, шуларниң бири уйғур тиятириға академийилик униванниң берилгәнликини, йигит башлири вә пүткүл уйғур җамаәтчилики бириксә, келәчәктә йәниму көп муваппәқийәтләргә йетишини үмид қилидиғанлиқини билдүрди.

Учришиш қатнашқучилири қазақистан уйғур җәмийитиниң болупму ханим-қизлар кеңәшлириниң қиливатқан ишлириға юқири баһа бәрди. Миллий мәктәпләргә бала топлаш, яшларни тәрбийиләш, той-төкүн вә нәзир-чирақлардики миллий әнәниләрни сақлаш охшаш ишларда уларниң роли барғансери ашмақта икән.

Уйғур наһийилик ханим-қизлар кеңишиниң рәиси шеринбүви җәлилованиң тәкитлишичә, дәсләп қетим уйғур наһийисидә 1986-йили уйғур мәдәнийәт мәркизи ечилған болуп, уни һәр хил кишиләр башқурған. Кейинки 21 йил мабәйнидә униңға закир мәмироф рәһбәрлик қилған. Бу җәрянда ана тилини, миллий өрп-адәтләрни, маарипни сақлаш, мәдәнийәтни раваҗландуруш йөнилишлиридә көплигән ишлар елип берилған. Ш. Җәлилова йәнә, з. Мәмироф саламәтлики сәвәбидин орнидин кетип, бәш йил униң орунбасари лавазимини атқурған мирзахмәт җәмийефниң бир еғиздин мәркәз рәисликигә сайланғанлиқини илгири сүрди. У йеңи рәисниң йеза-йезиларға чиқип, һакимийәт органлири билән бирликтә актипларни, шу җүмлидин наһийилик ханим-қизлар, анилар кеңәшлирини, йеза аяллар кеңәшлирини башқидин тәшкиллигәнликини, мундақ ишларниң илгири болуп бақмиғанлиқини тәкитлиди. У аяллар кеңиши ишиниң хелила җанланғанлиқини көрситип, мундақ деди: «өлүм-йитим, той-төкүн ишлирини аяллар йеқиндин билидикән. Шуниң билән һәр бир йигит бешиға бир ханим-қизни сайлаш керәк икән. Шу вақитта аяллар керәк һәммә нәрсидин хәвәрдар болиду. Биз әҗдадлиримиздин келиватқан яхши өрп-адәтлиримизни сақлап қелишимиз керәк.»

Ш. Җәлилова ханим-қизларниң йигит башлири билән тәң дегидәк юртниң барлиқ ишлириға йеқиндин арилишип, кейинки әвладлар пәхирләнгидәк яхши әнәниләрни қалдурушта, заманға лайиқ әвладларни тәрбийиләштә ролиниң муһим икәнликини тәкитләп, йәнә мундақ деди: «бизниң мәқситимиз әң алди билән ана тилимизни йоқатмаслиқ. Пүтүн әнәнилиримиз, тарихимиз, сәнитимиз, маарипимиз ана тилимиз арқилиқ маңса, улар йоқимайду. Мушу йеңи йилдин тартип йигит башлириға йеникчилик чүшиду дәп ойлаймән. Сәвәби өйдә йолдишиға аяли қандақ ярдәм қилса, сиртта мушу сайланған ханим-қизлар йигит башлириға шундақ ярдәм қилимиз.»

Таштиқарида болуп өткән бу учришиш давамида җәмийәтлик ишларда алаһидә актиплиқ көрсәткәнләр мәдәнийәт мәркизиниң пәхрий ярлиқлири билән тәқдирләнди.

Радийомиз зияритини қобул қилған чонҗа йезиси базар участкисиниң йигит беши һүсән җәлилоф мәдәнийәт мәркизиниң йеңи рәиси сайлинип көп вақит өтмәйла наһийилик баш йигит башлиқи болуп абдукерим сәйдуллайефниң сайланғанлиқини, униң дәсләпки күнләрдин башлапла пүткүл наһийә, йезилиридики әһвални уқуп, йигит башлириниң бешини қошуш қарариға кәлгәнликини тәкитләп, мундақ деди: «уйғур мәдәнийити мәркизи, йигит башлири вә ханим-қизларниң башлири қошулди. Анилар кеңишиниң рәиси зүләйха җәлилова өрп-адәтләр бойичә он мәсилини қойди. Шуларниң һәммисини тәстиқлидуқ.»

У, йеңи йигит беши сайланғандин буян көплигән ишларниң әмәлгә ашқанлиқини, һазир йигит башлири вә ханим-қизлар ичидә той-төкүн вә нәзир-чирақларда орун еливатқан кәмчиликләрниң алдини елиш, яхши әнәниләрни сақлап қелиш бойичә қарар қобул қилинип, униң қошна әмгәкчиқазақ, панфилоф вә башқиму уйғурлар зич олтурақлашқан наһийәләрниң актиплири билән бирликтә муһакимә қилиш вә бир пикиргә келиш мәсилилириниң қариливатқанлиқини илгири сүрди. Һүсән җәлилоф таштиқарида өткән паалийәттин көплигән йигит башлириниң қайтидин ойғинип, ишқа актип киришкәнликини билдүрди.

Пикирләр (0)
Share
Толуқ бәт