Qazaqistandiki emgekchiqazaq nahiyilik Uyghur medeniyet merkizi hésawat berdi

Ixtiyariy muxbirimiz oyghan
2015-10-30
Share
qazaqistan-uyghur-medeniyet-merkizi-2015.jpg Qazaqistandiki emgekchiqazaq nahiyilik Uyghur medeniyet merkizining hey'etliri
RFA/Oyghan

Bügünki künde qazaqistanning almata shehiri we uning etrapidiki xeshkileng, ili we jambul nahiyiliri, shundaqla almata wilayitige qarashliq talghir, emgekchi - qazaq, Uyghur we yarkent nahiyiliride zich olturaqlashqan Uyghurlarning öz tilini, milliy örp - adetlirini, ma'aripini, sen'itini saqlap qélishta we ularni terghip qilish we yenimu rawajlandurushta medeniyet merkezliri chong rol oynimaqta. Qazaqistanning ilgerki paytexti almata shehiride pa'aliyet élip bériwatqan qazaqistan Uyghurlirining jumhuriyetlik étno - medeniyet merkizi ene shu nahiyilerge qarashliq medeniyet merkezlirining béshini qoshup, Uyghurlarning medeniyet mirasini terghip qilishqa munasip hessisini qoshup kéliwatidu. Mezkur medeniyet merkezlirini asasiy jehettin Uyghur jama'etchiliki arisida abroy - ataqqa ige hem bilim sewiyisi yuqiri kishilerning bashqurup kéliwatqanliqi köpchilikke yaxshi melum. Ular arisida ziyaliylar, déhqanlar, ishchilar, tijaretchiler we bashqimu kesip igiliri bolup, ularning barliqini qazaqistan prézidénti nursultan nazarbayéf hem u bashqurghan qazaqistan xelqi assambléyisining qoyghan meqsetliri, pilanliri biriktüridu.

Igilishimizche, Uyghur medeniyet merkezliri yurt - jama'etchilik aldida élip barghan ish - pa'aliyetliri heqqide hésawat bérip, yighinlarni ötküzüp turidu. Ene shundaq hésawat - saylam yighinlirining biri 26 - öktebir küni almata wilayitining emgekchiqazaq nahiyisining merkizi ishikte shehiride ötti. Ilgerki chélek nahiyisini öz ichige alghan bu chong nahiyide Uyghurlar olturaqlashqan yézilar köp bolup, ularning her biri medeniyet merkezlirining shöbilirige ige. Ishikte shehiride ötken hisawat - saylam yighinigha almata sheherlik meslihitining ezasi exmetjan sherdinof, qazaqistan Uyghurlirining jumhuriyetlik étno - medeniyet merkizining re'isi shahimerdan nurumof, nahiye hakimi isqaq bineli abduqapas oghli, uning orunbasari axmétof békét, nahiye hakimchiliqi ichki siyaset bölümining bashliqi möminjan islamof, nahiyilik Uyghur medeniyet merkizining re'isi arsélin zulyarof, jumhuriyetlik yigit bashlirining re'isi abduréshit mexsutof we bashqilar boldi.

Yighinda nahiyilik medeniyet merkizining 2013 - we 2015 - yillardiki ish - pa'aliyiti merkez re'isining orunbasari aynisem waydinowa doklat oqudi.

Ziyaritimizni qobul qilghan nahiye turghuni, zhurnalist mehemmetjan hapizof mezkur yighin heqqide toxtilip, mundaq dédi: “Medeniyet merkizining re'isi arsélin zulyarof ten - salametlikige baghliq bu ishtin kétishni iltimas qilip, bu iltimas qana'etlendürüldi. A. Waydinowa bergen doklatta asasen axiriqi üch yilda medeniyet merkizi teripidin, shuning qollap - quwwetlishi arqiliq, shexsen özining uyushturushi bilen yürgüzülgen ishlar bir - birlep tekitlendi. Ularning ichide bolupmu wilayet derijiside ötküzgen Uyghur medeniyet künliride élip barghan ish - pa'aliyetliri, “Mektepke yol” teshebbusining ötküzülüshi qatarliq pa'aliyetler, rayonimizning maliway, chélek, awat yézilirida yazghuchi - sha'irlarning tewellutlirini ötküzüsh, ana tilida oqush mesilisi qarilip, jay - jaylarda komissiye teshkil qilinip, terghibat ishlirini yürgüzdi. Ma'arip sahesini yükseldürüshke, balilirimizni bilimlik oqutushqa özlirining bir kishilik hessisini qoshush arqiliq axiriqi yillarda mekteplerde yéngi - yéngi Uyghur sinipliri échilishqa bashlidi.”

M. Hapizofning éytishiche, nahiyilik medeniyet merkizining küch chiqirishi bilen buningdin tashqiri hébullam qahharof namida ötküzülgen shé'iriyet kéchiliki, yazghuchi we dramaturg exmetjan hashiriyning 75 yilliqigha béghishlan'ghan awat yézisida ötküzülgen tentenilik murasim, medeniyet, sen'et saheliride ötküzülgen bashqimu köpligen pa'aliyetler medeniyet merkizining qanchilik derijide aktip ishligenlikini namayish qilidu.

M. Hapizof sözini dawam qilip, yene mundaq dédi: “Yighinning qandaq ötkenliki heqqide péshqedem yéza égiliki xadimi, sabiq qazaqistan kéngishining ezasi bolghan iminjan nasirof, nahiyilik medeniyet merkizini bashqurghan ghojexmet sedwaqasof qatarliq kishiler özlirining inkaslirini bildürüp, hésawatni köpchilik bir éghizdin qana'etlinerlik dep qobul qildi. Ikkinchi mesile boyiche yéngi re'is bolup ilgiri nahiye hakimining orunbasari bolup ishligen sulayman shemshidin oghli mexsutof saylandi. Nahiye hakimi binel isqaq Uyghur xelqige nisbeten nahayiti yaxshi pikirlirini izhar qildi. Yashlirimizni oqushqa dewet qildi. Ish orunlirida Uyghur yashlirini yoqluqini, hazirqi ziyaliylarning ornini basidighan yashlarning kemlikini alahide tekitlep, buningdin kéyin ishlesh yollirini körsetti, prézidéntimizning shuninggha qattiq köngül bölüwatqanliqini éytip chüshendürdi. Her halda medeniyitimizge, ma'aripimizgha ghemxorluq qilish mejburiyitini öz üstige alghan medeniyet merkizining ishi qana'etlinerlik dep qobul qilindi.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet