Қирғизистан алий кеңишигә икки уйғур вәкили әза болди

Қирғизистан алий кеңишигә әза болуп сайланған пәрһат рози оғли иминоф

28 - Өктәбирдә қирғизистан алий кеңишиниң 6 - йиғиниға әза болуп сайланғанлар өзлириниң биринчи мәҗлисидә қирғизистан җумһурийитигә садиқлиқида, мәмликәтниң асасий қануниға әгишиштә, өз вәзипилирини хәлқ мәнпәәтидә орунлашта, әлниң мустәқиллиқини вә пүтүнлүкини қоғдашта қәсәм бәрди. Шуларниң арисида икки уйғур вәкилиму болди.

Игилишимизчә, өткән айда қирғизистан алий кеңишигә өткән сайламға 14 партийә вәкиллири қатнашқан болуп, пүткүл мәмликәт бойичә икки милйон йәттә йүз миңдин ошуқ сайлиғучи тиркәлгән иди. Қирғизистан мәркизий сайлам комитетиниң мәлуматлириға қариғанда, сайлам нәтиҗилири бойичә алдинқи орунни 26,88 пирсәнт билән қирғизистан сотсиял - демократик партийиси, андин кейинки орунларни “ата - юрт республика”, “қирғизистан”, “онугуу - прогресс”, “бир бол”, “ата - макан” партийилири вә башқилар игилигән.

Радиомиз зияритини қобул қилған қирғизистан уйғурлириниң “иттипақ” җәмийитиниң рәиси артиқ һаҗийеф мәзкур сайлам һәққидә тохтилип, мундақ деди: “4 - өктәбир күни қирғизистан мәмликитимиздә чоң сиясий паалийәт өтти. Қирғизистан һөкүмитиниң юқириқи кеңишигә әзалар сайланди. Униң ичидә бизниң уйғур җамаитидин төрт бала чиқти. Қирғизистан сотсиял - демократик партийисидин баяхуноф нурмуһәммәт, “ата - макан” партийисидин исмайилоф сәйдәхмәт, “ата - юрт” республикилиқ партийисидин пәрһат тулендибайеф билән пәрһат иминоф чиқти. Мушу сайламда икки бала әзалиқ гуваһнамисигә игә болди. Бу пәрһат иминоф вә пәрһат тулендибайеф. Биз, қирғизистанда яшаватқан аз санлиқ милләт, чоң үмидләр билән мушу балиларға қараймиз. Бу балилар юқириқи кеңәшкә әза болуп қирғизистанғиму, уйғур миллитигә, қирғизистан хәлқигә чоң һәссә қошиду, дәп ишинимиз. Биз, қирғизистан уйғур җәмийити, буларни чақирип, чоң йолға чиққанлиқиға өзимизниң разилиқини билдүрүп, тәбриклидуқ.”

Қирғизистан алий кеңишигә әза болуп сайланғанлардин пәрһат рози оғли тулендибайеф 1960 - йили қирғизистанниң һазирқи бишкәк шәһиридә туғулған болуп, мәмликәтниң әмгәк вә иҗтимаий тәрәққият министирлиқи йенидики иҗтимаий тәрәққият вә тиҗарәтчилик институтини тамамлиған вә иқтисадчи мутәхәссисликигә игә болған. Һазирқи вақитта у қирғизистан ташқи ишлар министирлиқи йенидики дипломатийилик академийидә хәлқара мунасивәтләр кәспи бойичә оқушни тамамлаш алдида турмақта. У шундақла кәң даиридики тиҗарәтчилик паалийити биләнму шуғуллинип келиватиду.

Әмди қирғизистан алий кеңишиниң нөвәттики әзаси пәрһат иминоф болса, 1975 - йили бишкәк шәһиридә туғулуп, васитичиләрниң алий мәктипини, андин мәмурийәтлик башқуруш мутәхәссислики бойичә чуй университетини тамамлиған. У 2008 - вә 2013 - йиллири бишкәк шәһәрлик кеңишиниң әзаси, мәзкур кеңәшниң хираҗәт вә малийә мәсилилири бойичә комиссийә рәисиниң орунбасари лавазимлирини атқурди. юқирида исми аталған қирғизистан алий кеңишиниң бу әзалири қирғизистан уйғур җамаәтчилики билән зич алақидә иш елип бармақчи.

Қирғизистан “иттипақ гезити” баш муһәрририниң орунбасари рәһим һапизи сайламниң демократик асаста өткәнликини алаһидә тәкитләп, төвәндики сөзләрни қилди: “бу сайламлар демократийиләлик рәвиштә очуқ өтти. Қирғизистан уйғур вәкиллиридин төрт киши намзат болуп, шуларниң ичидин икки киши алий кеңәшкә өтүп, әзалиқ гуваһнамилирини алди. Мән ойлаймәнки, мушу йили қирғизистан уйғурлири ичидә бир тарихий вәқә болди. Бурун қирғизистан алий кеңишигә бирдин әза болған иди. Һазир хәлқимизниң вәкиллири болуп икки әза алий кеңәшкә сайланди. Биз буниңдин хушал вә пәхирлинимиз. Әмди мушу немини билдүриду, испатлайду десиңиз, қирғизистандики болуватқан демократийә. Мәсилән, һәр бир адәм әза болимән десә, миллитидин қәтий нәзәр мана мушу йәрдә қирғизистанда һәқиқәтән демократийиниң алған сүргәнликини билимиз. Бизниң уйғур йигитлиримиз алий кеңәштә қирғизистанниң раваҗлинишида чоң паалийәтләрни йүргүзиду, дәп ойлаймиз. Буниңдин кейин биз йәнә ишинимизки, уйғур әзалиримиз қирғизистанниң һазирқи сиясий, иқтисадий вә башқиму җәһәтләрдики тәрәққиятиға өзлириниң мунасип һәссилирини қошиду, дәп һесаблаймиз.”