Rabiye qadir xanim: ramizan harpisida dunyani Uyghur xelqining soriqini qilishqa chaqirdi

Bu yil ramizan Uyghur ilining weziyiti oxshashla intayin nazuk bir mezgilde yétip keldi. Bu munasiwet bilen rabiye qadir xanim 17‏-iyun radiyomizda ramizanliq söhbet élan qilip, diniy cheklime Uyghurlarning imani, iradisini kücheytse kücheytiduki, ularning étiqadini sunduralmaydu, dédi. U, bu sözni Uyghur xelqining ramizan éyini tebriklesh bilen bashlidi.

Rabiye qadir: men pütün dunyadiki musulman qérindashlirimning ramizan éyini tebrikleymen hem ulargha yalqunluq salam yollaymen. Dunyaning hemme yéride sergerdan bolup yashawatqan, türme ichi-téshidiki , weten ichi-téshidiki barliq sherqiy türkistanliq qérindashlirimning mubarek ramizanlirini tebrikleymen.
30 Kün ramizanni shundaq yaxshi tutushini, 30 kün ramizanda allahtin tiligen tileklirining hemmisi ijabet bolushini, shu qatarda türmide yétiwatqan, erkinlikke muhtaj boluwatqan, dunyada sergerdan boluwatqan qérindashlirimizning shu ramizanda tileklirini tilep, shularning saq-salamet öz öylirige qaytip chiqishini, öz makanlirini tépishini, pütün meqsetlirining emelge éshishini soraymen.

Muxbir: yéqinda xitay hökümiti chiqarghan bezi belgimilerge qarisaq, Uyghurlarning ramizan éyidiki ibadet pa'aliyiti we ish-herikitining barghanséri tariyip kétiwatqanliqini köriwatimiz. Mesilen, ramizan éyidiki diniy pa'aliyetlerni bashqurush belgilimiliride ibadetke alaqidar shundaq konkrét belgilimilerni chiqardi. Siz bulargha qandaq inkas qayturisiz?

Rabiye qadir: bu bir cheklime. Lékin bu bizning ulugh roza -ramizanimizgha, bizning xelqimizning allahgha bolghan telpünishige yaki xelqimizning ramizan'gha bolghan hörmiti, étiqadi, roza tutushigha hergiz tosalghu bolalmaydu.
Chünki, u tutquzmighan teqdirdimu, u shunchila zulum salghan teqdirdimu, bir zalim diktator hakimiyet astidiki Uyghur xelqining mushu ramizanda ashundaq qoshlap qiyinchiliqlar bilen, qoshlap azap-oqubet we qoshlap bésimlar bilen ramizanni qarshi élishi, ulargha hessilep sawaplarni élip kélidu. Allah ularning qelbide tutqan ramizanlirini qobul qilidu, dep qaraymen.

Muxbir: emma xitay hökümiti ramizanda kündüzi échilmighan résturan-ashxanilargha éghir jerimane qoyidighanliqini, tijaret kinishkisini bikar qilidighanliqini agahlandurup, yéngi belgilimilerni chiqardi. Bu xil ehwal musulmanlarning héssiyati nuqtisidin qandaq tesir körsitidu jem'iyetke?

Rabiye qadir: xitay hökümiti Uyghurlarning herikitini cheklisimu, uning qelbidiki étiqadini chekliyelmeydu. Xitayning élip barghan bu zulumi, bu tétiqsiz qiliqi, bu siyasiti xelqning rohini küchlendüridu, gheyriti, étiqadini ashuridu, hergiz xelqning iradisi, étiqadini cheklep qalalmaydu.
Xitay hökümiti buningda nahayiti xata ishlarni qiliwatidu. Meyli ashxanini achquzsun, meyli haraqni xelqning béshigha élip kélip tökiwetsun, meyli xelqning jeynimazlirini tartiwélip ikki qolini baghlap qoysun, xelqning qelbini allah chüshinidu. Xelq öz qelbining, öz étiqadining, öz erkinlikining, öz imanining arqidin mangidu.
Shuning üchün xelqimning qiliwatqan her bir ishi ularning étiqadigha hésab bolidighanliqini bilimen we shuninggha ishinimen.

Muxbir: xitay hökümiti bir tereptin muqimliqni tekitlewatidu. Lékin yene bir tereptin, ramizan éyida xelqning kündilik konkrét diniy ibadet pa'aliyetlirige qol tiqiwatidu.  Bu ehwal öz ‏- ara zididiyettek qilamdu, qandaq?

Rabiye qadir: xitay hökümiti muqimliqni arzu qilmaydu. Xitay hökümitining muqimliq dégini mutleq yalghan. Uyghur xelqining sherqiy türkistandiki her millet xelqi bilen ittipaq , xatirjem ötüshini xitay hökümiti hergiz arzu qilmaydu. Muqimsizliqni özi keltürüp chiqiriwatidu. U hem Uyghur xelqini ghidiqlaydu hem urush, jidel -majiragha chaqiridu hem intiqam élishqa chaqiridu.

Muxbir: ramizan musulmanlarning meniwiy dunyasida allahgha eng yéqinlishidighan, rohiy dunyasi küchlinidighan ibadet éyi. Mushundaq ulugh ayda köngülsiz weqeler yüz béridighan boldi. Ötken yili yekende élishqu weqesi yüz berdi ramizanda, bügün shi'en poyiz istansisida saqchilar bir Uyghur balini étiwetti. Xitay hökümiti bu weqeni térrorluqqa baghlaydighandek bisharet bériwatidu. Bu weqege néme deysiz?

Rabiye qadir: xitay hökümiti bikardin-bikar qatnash bikette bilet éliwatqan bir balini saqchilirini chiqirip, bozek étip, urup tillap qilghandin kéyin, u bala bir chalma étip qoysa étip tashlidi. Bu, xitay hökümitining roza ‏- ramizanda Uyghur xelqighe bergen signali. Qozghal, sen bilen biz soqushimiz, dep Uyghur xelqini urush,majiragha chaqirghanliq. Meqsiti ramizanda jidel-majira peyda qilish. Xitay hökümiti ashu bir bala bilen Uyghur xelqighe jawab bersun. Men pütün dunyani shuninggha chaqirimen. Mushu étilghan balining soriqini qilish pütün Uyghur xelqining soriqini qilish. Amérika hökümiti, pütün dunya xelqi, islam dunyasining bu mesililerde qarap turmasliqini, dunyaning uyqusini échishini ümid qilimen.

Xitay hökümiti bu yil yene, bezi tedbirlerni yolgha qoyup, ramizanda bezi diniy ibadet pa'aliyetlirini chekligen.

Jing nahiyesi uqturush chiqirip, nahiyediki barliq musulman ashxana we résturanlarning kündüzi tijaret toxtatmasliqini telep qilghan. Maralbéshi nahiyeside, partiyelik kadirlar din'gha ishenmeslik, diniy pa'aliyetke qatnashmasliq, ramizanda roza tutmasliq heqqide aghzaki we yazma til xet bergen.