Rabiye qadir xanim bashchiliqidiki dunya Uyghur qurultiyi hey'iti yaponiyede ziyarette bolmaqchi

Ixtiyariy muxbirimiz haji qutluq qadiri
2017.02.11
rabiye-qadir-duq-yaponiye-2017.jpg Rabiye qadir xanim dunya Uyghur qurultiyi yighinida
RFA/Haji Qutluq Qadiri


Mushu ayning 11-künidin 17-künige qeder rabiye qadir xanim bashchiliqidiki dunya Uyghur qurultiyi hey'iti yaponiyede mexsus ziyarette bolidiken.

Ziyaritimizni qobul qilghan yaponiye Uyghur birliki teshkilatining re'isi turmuhemmet hashim bu heqte uchur berdi.

Yaponiyede ziyarette bolidighan rabiye qadir xanim bashchiliqidiki dunya Uyghur qurultiyi hey'itini kütiwélish teyyarliq komitétining mes'ulliridin yaponiye démokratik sotsiyal uyushmisining hey'et ezasi kojima ependi bu heqte toxtilip:“Xelq'ara weziyette jiddiy özgrish boluwatqan,amérika prézidénti donald tramp yéngidin wezipige teyyinlen'gen bir waqitta, rabiye qadir xanim bashchiliqidiki dunya Uyghur qurultiyi hey'itining yaponiyede ziyarette bolushi, méningche, zor tarixiy ehmiyetke ige dep qaraymen. Chünki, yéqindin buyan sherqiy jenubi asiya weziyitide shundaqla amérikining xitaygha bolghan tashqi siyasitide zor özgirishler yüz bériwatidu. Teywen musteqilliq herikiti küchiyiwatidu. Mana mushundaq nazuk bir siyasiy weziyette, rabiye qadir xanimning yaponiyege ziyaretke teklip qilinishini, elwette, melum bir tereplerning aldin orunlashturghan bezi bir pilanliri bolsa kérek dep oylaymen” dédi.

Ötken yili Uyghur kishilik hoquq mesililiri boyiche mexsus qarar hazirlap yaponiye parlaméntigha doklat sun'ghan kanagawa ölkisi kamakura sheher parlamént ezasi u'ixata ependi, yaponiyede ziyarette bolidighan rabiye qadir xanim bashchiliqidiki dunya Uyghur qurultiyi hey'itining yaponiye ziyariti toghrisida toxtilip:“Ötken yili rabiye qadir xanim kamakura sheher parlaméntida Uyghur kishilik hoquq mesililiri boyiche doklat bergen idi. Elwette, bu qétimqi yaponiye ziyaritidimu parlaméntta alahide doklat bérishke teklip qilish qarar qilindi. Ishinimenki, rabiye qadir xanimning sheher parlaméntida bergen bu doklatliri yéqin kelgüside miwe bergüsi” dédi.

Yaponiye Uyghur birliki teshkilatining re'isi turmuhemmet bu qétimqi yaponiyede ziyarette bolidighan dunya Uyghur qurultiyi hey'iti ezalirining her qaysi döletlerdiki Uyghur kishilik hoquq pa'aliyetchiliridin teshkillen'genlikini ilgiri sürdi.

Rabiye qadir xanimning tokyodiki doklat bérish pa'aliyetlirige riyasetchilik qilish wezipisini üstige alghan yaponiye takukoshoko uniwérsitétining proféssori, tonulghan xelq'ara mesililer mutexessisi fuji génki ependi ziyaritimizni qobul qilip:“Yaponiye jama'iti rabiye qadir xanimning bu qétimqi ziyaritidin némilerni kütidu?” dégen so'allimizgha jawab bérip:“Yaponiye jama'iti,siyasiyonliri we metbu'atliri rabiye qadir xanimdin xitay kompartiyesining Uyghur musteqilliq heriketlirini qandaq shekilde basturwatqanliqining heqqiy mahiyitini ashkarilap bérishni ümid qilidu” dédi.

Igilishimizche, rabiye qadir xanim bashchiliqidiki dunya Uyghur qurultiyi hey'iti yaponiyede ziyarette bolush jeryanida yaponiyediki bir qisim kishilik hoquq teshkilatlirining mes'ulliri bilenmu mexsus söhbetlerde bolidiken.

Melum bolushiche, sürgündiki tibet hökümitining bir qisim rehberlirimu mushu ayning 5-künidin bashlap yaponiyede mexsus kishilik hoquq mesililiri boyiche ziyarette bolidiken.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.