Rabiye qadir xanim yaponiye ichki kabinétining yéngidin teshkillen'genlikini tebriklep tebrik xéti yollighan

5 - Awghust dunya Uyghur qurultiyining re'isi rabiye qadir xanim yaponiye bash weziri shinzo abé bashchiliqida yéngidin teshkillen'gen yaponiye ichki kabinétini tebriklep tebrik xéti yollighan.

Yaponiye Uyghur birliki teshkilatidin igilishimizche, dunya Uyghur qurultiyining re'isi rabiye qadir xanim yaponiye bash weziri shinzo abé bashchiliqidiki yéngidin teshkillen'gen yaponiye ichki kabinétini tebriklep tebrik xéti yollighan.

3 - Awghust yaponiye bash weziri shinzo abéning yéngidin teshkillen'gen kabinéti 19 neper ichki kabinét ezasini yéngidin wezipige teyinligen bolup, yéngidin wezipige teyinlen'genler ichide 2012 - yili 5 - ayda yaponiye bash weziri shinzo abé bashchiliqida qurulghan “Yaponiye parlaménti Uyghur dostluq guruppisi” ning ezaliridinmu xéli köp sandiki kishiler muhim wezipilerge qoyulghan.

Bu qétimqi yéngidin wezipige qoyulghanlar qatarida 2012 - yili 5 - ayda tokyoda chaqirilghan 4 - nöwetlik dunya Uyghur qurultiyigha ishtirak qilghanlardin eyni chaghdiki yaponiye parlamént ezasi inada tomomi xanim yaponiye dölet mudapi'e ministiri, sé'ichi éto ependi yaponiye bash wezir yardemchilikige teyinlen'gen we undin bashqa “Uyghur dostluq guruppisi” ning ezalirimu muhim wezipilerge qoyulghan.

Ziyaritimizni qobul qilghan yaponiye Uyghur birliki teshkilatining re'isi doktor turmuhemmet hashim rabiye qadir xanimning tebrik xétini munasiwetlik orunlargha yetküzüp bergenlikini bayan qildi.

Dunya Uyghur qurultiyining re'isi rabiye qadir xanim özining yaponiye ichki kabinétining yéngidin teshkillen'genlikini dunya Uyghur qurultiyi namidin tebrikleydighanliqini bildürdi.

Rabiye qadir xanim sözide yaponiye dölet mudapi'e ministirliqigha teyinlen'gen inada tomomi xanim we bash wezir yardemchisi sé'ichi éto ependining Uyghur kishilik hoquq mesilisige uzundin buyan köngül bölüp kéliwatqanliqini we özining her qétimliq yaponiye sepiride ular bilen köpligen uchrishishlarni élip barghanliqini bildürdi.

Doktor turmuhemmet hashim rabiye qadir xanimning hazirghiche bolghan yaponiye ziyaritide bir qisim ministirlar bilen élip barghan uchrishishlirini we shundaqla yéngidin wezipe teyinlen'gen dölet mudapi'e ministiri inada tomomi xanim bilen bolghan söhbetlirini eslep ötti.

Dunya Uyghur qurultiyining re'isi rabiye qadir xanim yéngidin teshkillen'gen yaponiye ichki kabinétidin özining Uyghur kishilik hoquq mesiliside bir qanche tereplerde zor ümidlerni kütidighanliqi toghrisida toxtaldi.

Yaponiye Uyghur birliki teshkilatidin igilishimizche, rabiye qadir xanim pat yéqinda yaponiyede ziyarette bolidiken we bu ziyaritide yéngidin teshkillen'gen ichki kabinéttiki bir qisim erbablar bilen uchrishish élip baridiken.

Yuqiriqi awaz ulinishidin tepsilatini anglang.