Putin türkiye ziyaritini mustapa kamalning qebrisini yoqlashtin bashlidi

Rusiye bilen türkiye munasiwetlirining künsayin qoyuqlishiwatqanliqi xewer qilinmaqta. Düshenbe küni rusiye prézidénti wladimir putin enqerede bir künlük dölet ziyaritide bolup, ikki dölet arisida köp sanda kélishimler imzalandi.

Soda miqdari jehette türkiyening gérmaniyedin qalsa ikkinchi orunda turidighan soda shériki rusiyening türkiye iqtisadiy üchün intayin muhim ikenliki melum. Rusiye hökümi qétim kéler yilidin bashlap türkiyege erzan bahada tebi'iy gaz bérishke maqul bolghan.

Qirimning qoshuwélinishi we sherqiy ukra'inadiki weziyet tüpeylidin izchil  gherbning qattiq iqtisadiy émbargosigha uchrap, gherb bilen soghuq munasiwet urushi keypiyatimda turuwatidu dep qariliwatqan rusiye üchün türkiyening roli néme bolushi mumkin.

Rusiye prézidénti wladimir putin, düshenbe küni türkiyede élip barghan bir künlük dölet ziyaritini aldi bilen türkiye jumhuriyitining qurghuchisi, mustapa kamal ata türkning qebrisini ziyaret qilish bilen bashlidi. Qebrini ziyaret qilish murasimidin kéyin, wladimir putin mustapa kamalgha atalghan  xatire deptirige söz qaldurup, “ Rusiyede türkiye jumhuriyitining qurghuchisini chongqur xatirileydu. Türkiyening tunji prézidéntining döletlirimiz arisida yaxshi qoshnidarchiliq munasiwetlirini ornitishqa qoshqan töhpisini yuqiri bahalaymiz” dep yazdi.

“Rossiyskaya gazéta”ning bu heqtiki xewiride qeyt qilinishiche, prézidént putin murasimdin kéyin türkiye prézidéntining yéngi sariyigha qarap atlandi. Saray aldida türkiye jumhuriyiti hörmet qarawulliri ikki dölet marshini orundap, daghdughiliq kütüwélish murasimi ötküzdi.

Murasimdin kéyin putin bilen erdoghan ikki dölet ministirlirini tonushturghandin kéyin, saraygha kirip, resmiy söhbitini bashlidi.

Undaqta, rusiye prézidéntining bu nöwetlik türkiye ziyaritidin néme netijiler körüldi we netijilerge érishti. Diqqitinglar bu tepsilatta bolsun.