Хитай парашутчи қисимлири давамлиқ русийәдин өгәнмәктә

Мухбиримиз үмидвар
2013.06.25
Share on WhatsApp
Share on WhatsApp
rusiye-xitay-awiamatka-urush-ayropilani.jpg Русийәдин елип келинип 9 йил ремонт қилинип, пүтүшкә аз қалған Varyag маркилиқ авиаматка пат-арида хитайниң уруш әслиһәлирини тошумақчи. 2011-Йили 26-апрел, лявниң.
Imaginechina

Русийә билән хитайниң истратегийилик шериклик мунасивәтлириниң күчийишигә әгишип, икки мәмликәтниң һәрбий саһәләрдики һәмкарлиқлириму барғансери қоюқлашмақта. Икки тәрәп бирләшмә һәрбий маневирларни давамлиқ өткүзүштин башқа йәнә бир-бириниң һәрбий қурулуш саһәсидики тәҗрибилирини давамлиқ алмаштурмақта.

Хитай парашутчилири ризан шәһиридә

Нөвәттә, җуңго хәлқ азадлиқ армийисиниң һава күчлириниң, болупму парашутчи қисимлириниң һәрбий-техника, җәңгиварлиқ, қорал-ярақ вә тактика қатарлиқ саһәләрдә көплигән йетәрсизликләргә игә болғанлиқи үчүн давамлиқ русийә билән болған алақиләрни күчәйтип, русийә һава армийисиниң тәҗрибилирини өгиниватқанлиқи һәмдә давамлиқ илғар күрәшчи вә тошуғучи айропиланларни сетивеливатқанлиқи мәлум.

Москвадин тарқитилидиған “русийә авази” радиосиниң хәвәр қилишичә, 5-айниң ахирида җуңго хәлқ азадлиқ армийисиниң парашутчи қисимлириниң бир вәкилләр өмики мәхсус төт күн русийәдә зиярәттә болуп, русийә парашутчи қисимлириниң тәҗрибилирини өгәнгән.

Хәвәрдә ейтилишичә, мәзкур өмәккә хитай парашутчи қисимлири 15-корпусиниң қомандани, генерал майор ли феңбав йетәкчилик қилған.

Русийәниң “һәрбий санаәт” гезитиниң хәвәр қилишичә, мәзкур өмәк русийәниң ризан шәһиридә болған. Улар, русийә парашутчи қисимлириниң парашутчи әтрәтләр вә броневик-танкиларни һавадин ташлишини тәйярлаш усули, парашутчи қисимларниң атқучи қораллириниң тактикилиқ вә техникилиқ хусусийәтлири билән тонушушни мәқсәт қилған.

“русийә авази”ниң хәвәр қилишичә, җуңго парашутчилириниң вәкиллири ризан шәһиридики русийә парашутчи қошунлириниң офитсерлар мәктипи, алаһидә қисимларниң мәшиқ мәркизи қатарлиқ орунларни зиярәт қилған болуп, русийә тәрәп өзлириниң маһарәтлири вә техника алаһидиликлирини көрсәткән.

Анализда баян қилинишичә, русийә истратегийә вә техника анализ мәркизиниң мутәхәссиси василий кашин “хитай парашутчи қисимлири йеңи тәрәққият басқучиға кирди вә өзиниң көзлигән мәқситигә йетиш үчүн, чәтәлниң тәҗрибисини қобул қилиши зөрүр”, дәп көрсәткән.

Русийәниң тәсири астидики хитай парашутчилар қошуни

Мәлумки, җуңго хәлқ азадлиқ армийисиниң һава армийиси 1949-йилидин кейин, совет иттипақиниң ярдими билән дуняға кәлгән. Әйни вақитта йеңи җуңгониң һава күчлири вә йетәрлик айропиланлири болмиғанлиқи үчүн совет иттипақи һава армийиси шүҗов қатарлиқ җайларда база қуруп, шаңхәй, бейҗиң қатарлиқ җайларниң һава мудапиәсини зиммисигә алған һәмдә зор сандики һәрбий айропиланларни бериш вә учқучиларни тәйярлаш арқилиқ җуңго азадлиқ армийисиниң һава қошунини қуруп бәргән иди. Әнә шу 1950-йили, совет иттипақи хитайға бир парашутчилар бригадиси қуруп бәргән болуп, әнә шуниңдин тартип һазирғичә җуңго парашутчи қисимлири йерим әсирдин артуқ мусапини баштин кәчүрди. Шуниңдин тартип, хитай һава армийиси русийәдин өгиниш вә русийә қораллири билән қораллиниш һалитини давамлаштурмақта.

“русийә авази” радиосиниң анализида көрситилишичә, әйни вақитта хитай парашутчи қисимлири пүтүнләй йеник қораллар билән қоралланған болуп, хитай парашутчи қисимларниң һавадин ташлайдиған броневик вә танкилирини ясашқа тиришқан болсиму, мувәппәқийәт қазиналмиған. Җуңго парашутчи қисимлири узундин буян пәқәт дөләт ичидила һәрикәт қилидиған һәрикәтчан пиядә қисим ролини ойниған болуп, кәң көләмдә парашутчи қисимларни һавадин ташлаш иқтидари болмиған.

Җуңго 1990-йилларда русийәдин 4 данә il-76 типлиқ еғир типтики тошиғучи айропилан сетивалғандин кейин парашутчи қисимларниң һәрикәтчанлиқи ашқан.

2000-Йилидин башлап, хитай парашутчи қисимлири өзиниң “WZ506” типлиқ парашутчилар броневикигә игә болған һәмдә тез тәрәққий қилиш йолиға киргән. 2005-Йилидин етибарән русийә билән 34 данә il-76 типлиқ тошуғучи айропилан вә 78 данә һавада май қачилиғучи айропилан сетивелиш келишими түзгән. 2010-2011-Йиллири хитай мустәқил дөләтләр һәмдостлуқидин парашутчи қисимларниң 76 данә ремонт қилинған тошуш айропилани сетивалған һәмдә йеңи тохтамлар давамлиқ түзүлгән.

Мана мушуларниң нәтиҗисидә хитай парашутчи қисимлириниң иқтидари һәссиләп ашқан болуп, хитай һава армийиси зор сандики парашутчи қисимларни көзлигән нишанға бирақла тошуш, еғир қоралларни тошуш имканийитигә игә болған. Һазир, җуңго парашутчи қисимлириниң уруш қилиш иқтидари давамлиқ ашқан болуп, тибәт қатарлиқ егиз тағлиқ районларда җәң қилиш мәшиқлирини елип барған.

Һәрбий һәмкарлиқтин көзләнгән мәқсәтләр

Парашутчилар 15-корпуси нөвәттә хитайниң әң илғар вә муһим парашутчи қошуни һесаблиниду. Әмма, хитай парашутчи қисимлири йәнила һавадин еғир типтики қоралларни ташлаш вә зор сандики парашутчилар армийисини тошуп, һавадин ташлаш қатарлиқ тәрәпләрдә аҗиз һесаблиниду. Хитай парашутчи қисимлири һәтта русийә парашутчи қисимлири илгирила узун мәзгил ишләткән адәттики механикилиқ бихәтәрлик үскүнилиригә игә әмәс, шуңа кәң көләмлик даиридә һавадин парашутчиларни ташлап җәң қилишта зиян көп көрүлүши мумкин икән.

Хитайниң русийә билән болған һәрбий саһәдики һәмкарлиқларни күчәйтиши бу йил март ейида җуңго дөләт рәиси ши җинпиң русийәни зиярәт қилғанда, йәнә бир қетим тәкитләнгән болуп, һәтта русийә тәрәп өзиниң баш қоманданлиқ штабиниң уруш қилиш мәркизини ши җинпиңниң зияритигә ечип бәргән иди.

Көзәткүчиләр, қорал-ярақ содиси җәһәттә алдинқи орунни игиләйдиған русийәниң хитайни өзиниң илғар қорал-ярақлирини сатидиған базарға айландуруватқанлиқи, бейҗиң үчүн керәк болғини өз армийисини заманивилаштуруп, дунядики һәқиқий қудрәтлик қошунға айландуруш, москва үчүн бәкрәк керәк болғини оз тәҗрибилирини өгитиш әмәс, бәлки әмәлийәттә қораллирини сетиш елан-сәнити қилиш икәнликини анализ қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.