“Yawropa sherqiy türkistan birliki” ning saylimi ötküzüldi

• Ixtiyariy muxbirimiz ekrem
  2019-01-14

13-Yanwar küni merkizi gérmaniyening myunxén shehiridiki “Yawropa sherqiy türkistan birliki” ning 21-nöwetlik saylimi ötküzüldi. Saylamgha teshkilat rehberliri, mezkur teshkilatqa eza bolghan myunxén shehiride yashawatqan bir bölük Uyghur jama'iti we d u q ning rehberliri qatnashti.

Melum bolushiche, “Yawropa sherqiy türkistan birliki” d u q ning sabiq re'isi erkin aliptékin bashchiliqida 1990-yili myunxénda qurulghan bolup, bu teshkilat eyni zamanlardiki “Dunya Uyghur yashliri qurultiyi”, “Sherqiy türkistan (Uyghuristan) milliy qurultiyi” hemde bügünki d u q ning qurulushida sahipxanliq wezipisini ötigen. Bu teshkilat her 2 yilda bir qétim saylam ötküzüsh qa'idisige bina'en bu qétim 21-nöwetlik saylimini élip barghan. 

Saylamdin ilgiri teshkilatning kona rehberlik hey'iti sehnidin orun élip, aldi bilen ötken 2 yilliq xizmetliri toghrisida doklatlar teqdim qildi. Xizmet doklatidin kéyin maliye doklati teqdim qilindi. 

Saylamgha d u q re'isi dolqun eysa ependi bashliq 3 kishilik bir hey'et riyasetchilik qildi. Saylam démokratik prinsiplargha asasen bélet tashlap awaz bérish usulida teshkilat re'isini saylap chiqti. D u q ning yawropagha mes'ul wekili esqerjan ependi mezkur teshkilatning re'islikige saylandi.

Re'islik saylimidin kéyin teshkilatning 2 neper mu'awin re'isi, katipi, maliye mudiri we ijra'iye hey'et ezaliri saylap chiqildi. “Yawropa sherqiy türkistan birliki” ning sabiq re'isi turghunjan alawudun ependi neq meydanda ziyaritimizni qobul qilghanda bu qétimqi saylamning netijilik bolghanliqini mu'eyyenleshtürdi.
“Yawropa sherqiy türkistan birliki” teshkilatining yéngi re'isi esqerjan ependimu ziyaritimizni qobul qilip, bu qétimqi saylamgha bolghan köz qarishini otturigha qoyup ötti. Saylamdin köpchilik qana'etlen'genlikini ipade qilishti. 
D u q ning re'isi dolqun eysa ependi teklipke bina'en saylamdin kéyin yépilish nutqi sözlep, Uyghur jama'itini wetenperwerlik terbiyisige yüksek derijide ehmiyet bérishke chaqirdi we bu terbiyini her bir a'ilidin bashlap ching tutushni telep qildi.