Sherqiy türkistan ma'arip we hemkarliq jem'iyitining mes'ulliri türkiye mu'awin bash ministiri qatarliqlar bilen uchrashti

2013 - Yili 5 - ayning 2 - küni sherqiy türkistan ma'arip we hemkarliq jem'iyitining re'isi hidayetullah oghuzxan, bash teptishi abdulhekimxan mexsum we doktor alimjan bughda qatarliq kishiler enqerege ziyaretke bardi we türkiye mu'awin bash ministiri bulent arinch, dölet ministiri bekri bozdagh qatarliq ministirlar bilen ishxanisida ayrim - ayrim uchrashti.

Uchrishishta ikki terep Uyghurlarning hazirqi weziyiti we kelgüsige alaqidar bir türküm xizmet - pa'aliyetler toghrisida pikir almashturdi. Uyghur hey'et Uyghurlargha alaqidar bir qisim teleplerni otturigha qoydi.

Biz bu uchrishishning meqsiti we tepsilati toghrisida melumatqa érishish üchün sherqiy türkistan ma'arip we hemkarliq jem'iyitining re'isi hidayetullah oghuzxan bilen söhbet élip barduq.

Hidayetullah oghuzxan bu qétimqi enqere ziyaritining meqsitini ipadilidi. Uning éytishiche, bu ömek Uyghur diyarida yüz bériwatqan weqelerning kélip chiqish sewebliri toghrisida xitay da'irilirining ishenchisiz uchur tarqitiwatqanliqi, weqening kélip chiqish seweblirining heqiqiti, Uyghurlarning xitaylar éytqandek térrorchi emes belki tinchliqperwer xelq ikenliki, Uyghur diyarida yüz bériwatqan pütün weqelerning xitayning bésim siyasiti sewebidin kélip chiqiwatqanliqini delil ispat bilen türkiye ministirlirigha anglitish qatarliqlarni meqset qilghan iken.

Melum bolushiche, ziyaret jeryanida sherqiy türkistan ma'arip we hemkarliq jem'iyitining mes'ulliri ministir bekir bozdaghqa Uyghur doppisi we chapan hediye qildi. Bekri bozdagh Uyghur doppa we chapanni kiyip Uyghur hey'et bilen xatire resimge chüshti.