Yaponiyeni qoghdash uyushmisi tor téléwiziyesining Uyghurche qanili resmiy tarqitish bashlidi

Mushu ayning 1-künidin bashlap tokyoda yaponiyeni qoghdash uyushmisi tor téléwiziyisi Uyghurche qanili resmiy tarqitish bashlidi.

Mezkur tor téléwiziyesini tokyoni merkez qilip pa'aliyet élip bériwatqan, yaponiyede tesiri bir qeder küchlük bolghan ammiwi teshkilatlardin yaponiyeni qoghdash uyushmisi tesis qilghan.

Yaponiyeni qoghdash uyushmisining mezkur tor téléwiziyisi yaponiyening ichki tashqi weziyiti shundaqla xitay we koréye yérim arilining weziyitige a'it xewer, analiz we siyasiy mulahizilerge da'ir programmilarni tarqitishni asas qilghan.

Mezkur tor téléwiziyisi hazirche ikki qanalni tesis qilghan bolup, buning biri Uyghur qanili, yene biri ming shya qanili. Ming shya qanili yaponiyede közge körün'gen xitay ishliri siyasiy obzorchisi ming shya xanimning mexsus qanilidur.

Uyghur qanilida asasliqi Uyghurlarning nöwettiki siyasiy hayati we weziyitige a'it xewer we mulahizilerni tarqitish asas qilin'ghan bolup, mezkur qanalning bu programmilirigha yaponiyede közge körün'gen Uyghur ziyaliysi doktor turmuhemmet hashim alahide teklip qilin'ghan.

Yaponiyeni qoghdash tor téléwiziyisi programma riyasetchilikini yayo'i kuristal xanim öz üstige alghan bolup,ziyaritimizni qobul qilghan kuristal xanim tor téléwiziyesining Uyghur qanilini tesis qilish heqqide toxtilip mundaq dédi:
-Méning nezirimde yer sharida birdin-bir térrorchi xitay kompartiyisidur. Uyghurlar hergizmu térrorchilardin emes. Sherqiy türkistan dölitining qaytidin baldurraq qurulushi üchün kichikkine bolsimu öz hessimizni qoshush yüzisidin Uyghur qanilini tarqitishni tesis qilduq. Men yaponiyeni qoghdash tor téléwiyesining namidin barliq Uyghurlargha salam yollaymen.

Téléwiziye programma ishligüchiliridin biri bolghan, emma özining nam sheripini ashkarilashni xalimighan bir xadim Uyghur qanilining programmiliri üstide öz tesiratini bayan qilip mundaq dédi:
-Metbu'atlarda Uyghurlarning ehwali toghrisida tepsiliy, éniq xewerler yéterlik emes. Shu sewebtin Uyghurlarning weziyitige a'it köpchilikke etrapliq uchur we xewerlerni yollash yüzisidin Uyghur qanilini tesis qilduq.

Mezkur téléwiziye qanilining opératorliridin biri yato Uyghur qanili heqqide toxtilip mundaq dédi:
-Xitayning yaponiyening okinawa ölkisini we sénkaku arilini bésiwélish üchün séliwatqan tehditi tolimu zor. Shu nuqtidin biz Uyghurlarning teqdiri we hazirqi ehwali toghrisida köplep uchur bérish arqiliq yaponlarning közini échish we Uyghurlarning mesilisini yapon jem'iyitige anglitishni oylap, ixtiyariy halda bu xizmetni ishlewatimiz.

Mezkur Uyghur qanili resmiy tarqitish bashlighandin buyan köpligen téléwizor körgüchilerning alqishigha érishken bolup,mezkur Uyghur qanilining programmiliridin huzur alghan noriko xanim bu heqte toxtilip mundaq dédi:
-Uyghur qanili Uyghurlarning siyasiy hayatigha a'it gézit-zhurnallardinmu oqup bilgili bolmaydighan bezi uchurlarni etrapliq chüshiniwélishimizgha tolimu paydiliq boldi.

Axirida biz mezkur tor téléwiziyisi toghrisida tepsiliy uchurlargha ige bolush üchün yaponiyeni qoghdash uyushmisi téléwiziyisi Uyghur qanilining tekliplik méhmini doktor turmuhemmet hashim bilen téléfon söhbiti élip barduq.

Awaz ulinishidin tepsilatini anglang.