Uyghur medeniyitimu tonushturulghan “Türk dunyasi étnik tenterbiye we kültür féstiwali” muweppeqiyetlik axirlashti

Istanbulning küchükchekmeje rayonidiki bazirgan meydanida ötküzülgen “Türk dunyasi étnik tenterbiye we kültür féstwali” 28 - awghust yekshenbe küni mukapat tarqitish we hediye teqdim qilish bilen muweppeqiyetlik axirlashti. Uyghur wekiller türkiye yashlar we tenterbiye ministiri qatarliq rehberlerge Uyghur doppisi bilen ton kiydürdi we ay yultuzluq kök bayraq hediye qildi.

Yekshenbe küni kechte “Xelq'ara étnik tenterbiye we kültür féstiwali” pa'aliyitining yépilish murasimi ötküzülgen bolup murasimgha türkiye yashlar we tenterbiye ministiri, istanbul waliysi wasip shahin, dunya étnik tenterbiye fédératsiyisi re'isi bilal erdoghan, küchükchekmeje sheher bashliqi temel qaradéngiz qatarliq rehberlermu qatnashti.

Türk dunyasi en'eniwi tenheriket oyunlirini janlandurush meqsitide ötküzülgen dunya étnik tenterbiye medeniyet féstiwali 3 kün dawam qilghan bolup bu pa'aliyet jeryanida, at beygisi, chélishish we oqya étish musabiqiliri ötküzüldi, musabiqida derijiler boyiche birinchi, ikkinchi we üchinchi bolghanlar altun hem kümüsh médal bilen mukapatlandi.

At beygiside wan pamir qirghizlirining mahirliri bolghan kökböre guruppisi birinchi bolup mukapatqa érishti. Oqya étishta 280 métirdin nishan'gha tegküzgen dunya en'eniwi tenheriket konfédratsiyisi re'isi bilal erdoghan birinchi bolup mukapatqa érishti. Chélishish musabiqisida ilgiri dunya chémpiyoni bolghan bir türk chélishchi birinchi bolup mukapatqa érishti.

Mukapat tarqitish jeryanida türk dunyasining wekilliri bolghan Uyghur, qazaq, qirghiz, özbék, noghay, tatar we türkmen wekilliri, “Xelq'ara étnik tenterbiye we kültür féstiwali” pa'aliyitini uyushturghan we uyushturushqa hesse qoshqan türkiye yashlar hem tenterbiye ministiri akif chaghatay qilich, istanbul waliysi wasip shahin, dunya en'eniwi tenheriket fédiratsiyisi re'isi bilal erdoghan, küchükchekmeje sheher bashliqi temel qaradéngiz ependilerge hediye teqdim qildi.

Uyghur wekillerdin isma'il jén'giz, abdul'ehed abduraxman we munewwer özUyghur qatarliqlar, tenterbiye we yashlar ministir akif chaghatay qilich ependige, istanbul waliysi wasip shahin'gha hem türkiye jumhur re'isi rejep tayyip erdoghanning oghli bilal erdughan'gha ayrim - ayrim ton bilen Uyghur doppisi kiydürdi we alahide ishlen'gen “Sherqiy turkistan bayriqi” teqdim qildi.

3 Kün dawam qilghan bu pa'aliyette sherqiy türkistan ma'arip we hemkarliq jem'iyiti teripidin körgezme échilip Uyghurlarning milliy örüp - adetliri we medeniyiti tonushturuldi.

Yépilish murasimida söz qilghan dunya en'eniwi tenheriket oyunliri konfédratsiyisining re'isi bilal erdoghan bu pa'aliyet toghrisida toxtilip mundaq dédi: biz kelgüsimizge özimizning qimmetlik yadikarliqliri bilen, özimizning milliy tenheriketliri bilen we özimizning milliy medeniyet muzikiliri bilen yürüshni xalaymiz. Buning üchün qilidighan ishimiz en'eniwi tenheriketlirimizge téximu köp ehmiyet bérish, xelqimizning en'eniwi tenheriketler bilen waqit ötküzüsh üchün shara'it hazirlashtur, ministirliqlar, sheherlik hökümetler we dölet organlirining milliy en'eniwi oyunlargha téximu ehmiyet bérip qollap - quwwetlishini telep qilimiz.

Bilal erdoghan sözide yene bu tenheriket féstiwalda kishilerning türk dunyasining oxshimighan medeniyetliri bilen tonushup chiqqanliqini bildürüp mundaq dédi: ösmürlirimiz, anadoliyining, ottura asiyaning, balqanlarning bizge a'it bolghan en'eniwi medeniyetlirini kördi. Ösmürlirimiz bu yerde tunji bolup oqya étip baqti, atqa mindi, chéliship oynidi mushundaq dawam qilsa kelgüside téximu chong birlik - barawerlik barliqqa chiqidu.

Yépilish murasimda türkiye yashlar we tenterbiye ministiri akif chaghatay qilich ependi söz qilip bu xil pa'aliyetning dawam qilishi kéreklikini tekitlidi shuningdek “Türk dunyasi étnik tenterbiye we kültür féstiwali” ning 2 - qétimliqini téximu janliq we körkem ötküzüsh üchün tenheriket ministiri bolush süpiti bilen qollap quwwetleydighanliqini ipadilidi.

Ministir akif chaghatay qilich aldi bilen bu pa'aliyetlerde mukapatqa érishken pütün tenheriketchilerni tebrikleydighanliqini bildürüp mundaq dédi: milliy en'eniwi tenheriketlirimizni janlandurush, emeliyleshtürüsh üchün qilishqa tégishlik köp ishimiz bar, emma köp chiqim telep qilmaydighan biraq qisqa waqit ichide omumlashturghili bolidighan bir ish. Her qaysi sheherlerde buninggha alaqidar tenheriket merkezliri tesis qilishimiz bek muhim.

Biz bu pa'aliyet toghrisida pikir qarashlirini élish üchün pa'aliyette körgezme achqan sherqiy türksitan ma'arip we hemkarliq jem'iyitining ayallar komitéti bashliqi munewwer özUyghur xanim bilen söhbet élip barduq.

Biz yene bu pa'aliyet toghrisida pikir qarashlirini élish üchün pa'aliyetke qatnashqan qazaqistanda yashaydighan Uyghur wetenperwer yurt mötiwerliridin tursun haji arzuyuf ependi bilen söhbet élip barduq.