Türk dunyasi balilar tentenisi pa'aliyitide Uyghur ösmürler numur körsetti

Ixtiyariy muxbirimiz arslan
2017-05-27
Élxet
Pikir
Share
Print
22- Nöwetlik türk dunyasi balilar tentenisi pa'aliyitidin bir körünüsh
22- Nöwetlik türk dunyasi balilar tentenisi pa'aliyitidin bir körünüsh
RFA/Arslan


Türk dunyasi tetqiqat merkizi wexpining orunlashturushi bilen 24-we 25-may künliri istanbulning baghchilar olimpik tenterbiye zalida ötküzülgen 22-nöwetlik türk dunyasi balilar tentenisi pa'aliyitige Uyghurlargha wakaliten sherqiy türkistan ma'arip we hemkarliq jem'iyiti teripidin teshkillen'gen 15 neper Uyghur ösmür qatniship, Uyghurlarning milliy medeniyitini ipadileydighan numurlarni körsetti.

Bu pa'aliyetke afghanistan, ezerbeyjan, qazaqistan, qirghizistan, shimaliy qibris türk jumhuriyiti, kosuwa, tataristan, bulghariye, qirim, süriye, iraq, gagawuz, daghistan, sherqiy türkistan, ahiska türkliri qatarliq türk xelqlerning ösmürliridin terkib tapqan 22 guruppa, 400 etrapida oqughuchi, 60 etrapida yétekchi oqutquchi qatnashti.

Bu pa'aliyetke qatnashqan 15 neper Uyghur ösmürler milliy kiyimliri bilen ay yultuzluq kök bayraqni lepildetken halda "Uyghur dégen moshundaq" témida shé'ir oqudi we usul oynap qatnashquchilirining qizghin alqishigha irishti.

Charshenbe küni ettigen sa'et 10:00 da baghchilar olimpik tenterbiye zalida bashlan'ghan bu pa'aliyet t r t awazi téléwiziye qanli arqiliq neq meydandin biwasite tarqitildi.

Peyshenbe künidiki ösmürler pa'aliyitide, qazaqistan, qirghizistan, ezerbeyjan, türkmenistan, afghanistan, makadoniye, kosuwa, gagawuz qatarliq türk dunyasining her qaysi jayliridin kelgen ösmürler türk dunyasi tetqiqatliri wexpining re'isi közxan yazghan ependining bashchiliqida istanbul waliyliqigha bérip waliy wasip shahinni ishxanisida ziyaret qildi. Uyghur ösmürler istanbul waliysi wasip shahin ependige Uyghur toni, doppa teqdim qildi we xatire resimge chüshti.

Waliy wasif shahin ependi türk dunyasigha alaqidar söz qilip mundaq dédi: "Biz eger tonushmisaq, bir-birimiz bilen chüshinish hasil qilmisaq, öz-ara qelblirimizni yéqinlashturmisaq dunyada yalghuz qalimiz. Eslide biz nahayiti küchlük we nahayiti alijanap bir milletning mensupliri. Dunyaning oxshimighan jughrapiyliride, emma oxshash meqsette, oxshash hés tuyghular bilen oxshash köz-qarashta yüreklirimiz soquwatqan bir millet. Bizmu waliyliq bolush süpitimiz bilen türk dunyasi ösmürler pa'aliyitini qolimizdin kélishiche qollaymiz. Siler bilen birge ikenlikimizni ipadileymiz. Istanbulgha kélip bek yaxshi qildinglar, qaytqanda özengler yashawatqan yurtlardiki qérindashlirimizgha istanbul waliyiliqining we istanbul xelqining salamini yetküzünglar, ularni yaxshi köridighanliqimizni, ularni hörmet qilidighanliqimizni bildürünglar, ular shuni bilsunki, xuddi silerning yürikinglar biz üchün soqqan'gha oxshash, bu yerde ular üchün soqidighan yürekler bar, biz oxshimighan jughrapiyelerde yashawatqan bolsaqmu, yüreklirimiz oxshash shekilde soqidu. Men istanbulgha kelgenlikinglar üchün alahide teshekkür éytimen."

Axirida istanbul waliyisi wasif shahin ependi türk dunyasi ösmürliri bilen xatire resimge chüshti.

Pa'aliyet axirida türk dunyasi tetqiqat merkizi wexpi mes'ulliri sherqiy türkistanliq ösmürlerning yénigha kilip ularni alahide tebriklidi we "Eng güzel hediyeni siler teqdim qildinglar" dédi.

Biz bu pa'aliyet toghrisida we Uyghurlar toghrisida pikir qarashlirini élish üchün pa'aliyetni uyushturghan türk dunyasi tetqiqatliri wexpining re'isi közxan yazghan ependi bilen söhbet élip barduq.

Közxan yazghan ependi, bu pa'aliyetni uyushturushtiki meqsitini ipadilep, bu pa'aliyetni türk dunyasining ösmürlirini bir yerge jem qilip öz-ara tonushturush, tarix we millitimizning bir ikenlikini chüshendürüsh, qérindashliqni kücheytish, netije étibari bilen türk dunyasining munasiwetlirini kücheytish meqsitide uyushturghanliqini ipadilidi we türk dunyasi ösmürler tentene pa'aliyitini 22 yildin buyan her yili bir qétim ötküzüp kéliwatqanliqini bildürdi.

Közxan yazghan ependi sözide yene, Uyghurlarni bu pa'aliyetke qatnashturushta, Uyghurlarning nahayiti éghir ehwal astida ikenlikini, ularning mesililirini küntertipke keltürüsh, Uyghur mesilisini dunya jama'itige anglitish meqsitide bu pa'aliyetke Uyghur ösmürlernimu teklip qilip qatnashturghanliqini we qatnashqan Uyghur ösmürlerdin memnun bolghanliqini bildürdi.


Toluq bet