Dawut oghlu: men türkiyining teqdirining shangxey hemkarliq teshkilati bilen ortaq ikenlikini jakarlaymen

Türkiye tashqi ishlar ministiri exmet dawutoghli bilen shangxey hemkarliq teshkilati bash katipi dmitri mézéntséw, “Di'alog ortaqliqi”liq toxtamnamisige qol qoydi.

Emet dawut oghlu muxbirlargha “Emdi biz bu toxtamnamigha qol qoyghandin kéyin ming yildin béri birlikte yashighan döletlerdin terkip tapqan bir a'ilige eza bolghanliqimiz üchün nahayiti xursenmen. Men türkiyining teqdirining shangxey hemkarliq teshkilati bilen ortaq ikenlikini jakarlaymen” dédi.

Qazaqistanning almata shehirige resmiy ziyaret üchün barghan exmet dawutoghlu shangxey hemkarliq teshkilati bash katipi dmitry mézéntséw bilen uchrishish élip barghan. Uchrishishta türkiye bilen shangxey hemkarliq teshkilati otturisidiki hemkarliq heqqide muzakire élip bérilghan. Axirida “Di'alog ortaqliqi” toxtamnamisi tüzülgen.

Exmet dawutoghlu muxbirlargha bergen bayanatida, bu toxtamnamining türkiye bilen shangxey hemkarliq teshkilatining mürini - mürige tirep mangidighan uzun seperning bashlinishi ikenlikini tekitlidi.

U almatada muxbirlargha bergen bayanatida yene, ötken yili 6 - ayda béyjingda chaqirilghan shangxey hemkarliq teshkilatigha eza döletler rehberliri aliy yighinida türkiyige “Di'alog ortaqliqi” salahiyiti bérilgenlikini körsetti.

Tashqi ishlar ministiri exmet dawutoghluning bu bayanati türkiyidiki Uyghurlar arisida yene ghulghula peyda qildi.

Türkiye shangxey hemkarliq teshkilatigha eza bolalamdu? bolghan teqdirde, Uyghur dewasigha qandaq tesir körsiter? Uyghurlarning ensirishi orunluqmu? dégen su'allargha jawab tépish üchün amérika mishigén uniwérsitéti oqutquchisi proféssor doktor timur qoja'oghlu we istratégiyilik chüshenche instituti oqutquchi dr. Erkin ekrem ependiler bilen söhbet élip barduq.

Proféssor doktor timur qoja'oghlu türkiye shangxey hemkarliq teshkilatigha eza bolsa xitayning teshkilattiki küchining ajizlaydighanliqini ilgiri sürse doktor erkin ekrem ependi xitay bilen rusiyining türkiyeni shangxey hemkarliq teshkilatigha almaydighanliqini ilgiri sürdi.