Түркийәдә өткүзүлгән балилар байримида уйғур өсмүрләргиму орун берилди

Коҗаели шәһәрлик һөкүмәтниң уюштуруши билән дуня тинчлиқи үчүн үлгә болуш алаһидиликкә игә болған 23-апрел хәлқаралиқ балилар байрими дуняниң охшимиған җайлиридин кәлгән өсмүрләр коҗаели шәһиридә саәт мунаири алдидин шәһәрлик һөкүмәт алдиғичә йүрүш қилиш билән 20 апрел пәйшәнбә күни рәсмий башланди. Бу паалийәткә уйғур өсмүрлиригә вакалитән шәрқий түркистан маарип вә һәмкарлиқ җәмийитиниң орунлаштуруши билән оғул-қиз болуп 23 нәпәр өсмүр қатнашти.

41 Дөләт вә райондин шундақла түркийәниң һәр қайси шәһәрлиридин болуп, 1000 нәпәр өсмүр хоҗаели шәһиригә җәм болди вә өзлириниң миллий кийимлири билән байрақлирини ләпилдитип шәһәр мәркизидә йүрүш қилди.

Уйғур өсмүрләр қоллирида ай юлтузлуқ көк байриқини ләпилдитип, шәһәр мәркизидики йүрүшкә қатнашти. Уйғур өсмүрләр чимән доппа канва көңләк қатарлиқ миллий кийимлири билән кишиләрниң алаһидә диққитини тартти.

Паалийәтниң ечилиш мурасимида коҗаели шәһәр башлиқи ибраһим қараосманоғли, коҗаели валийси һәсән бәсри гүзәл әпәндиләр сөз қилди.

Шәһәр башлиқи ибраһим әпәнди мундақ деди: “көзимизниң нури балилар коҗаелигә хош кәлдиңлар! 23-апрел күни һеч бир өсмүр көз йеши қилмисун. 23-Апрел күни һеч бир өсмүр йиғлимайдиған, қорқмайдиған бир дуня қуруш тиришчанлиқ күнидур.”

Шәһәр башлиқи ибраһим қараосманоғли сөзидә йәнә дуняниң нурғун җайлирида уруш сәвәбидин һаятидин айрилған яки вәтинини тәрк етишкә мәҗбур болған өсмүрләргә көңүл бөлүш керәкликини тәкитлиди.

Шәһәр башлиқи ибраһим әпәнди сөзидә йәнә паалийәткә қатнашқан өсмүрләр хитаб қилип мундақ деди: “силәр бүгүн бу йәрдә басқан қериндашлиқ қәдәм билән дуня тинчлиқиға һәссә қошисиләр, аллаһ буйруса силәр чоң болғанда уруш вә сүргүн вәқәлири болмайду.”

Дуняниң охшимиған җайлиридин коҗаелигә кәлгән өсмүрләрни коҗаели хәлқидин һәр бир аилә иккидин өсмүр меһманни қарши елип, өйидә саһибханилиқ қилған болуп, коҗаели шәһәр башлиқи түркләрниң меһмандостлуқини йәнә бир қетим көрсәткән хәлқ аммисиға тәшәккүр ейтидиғанлиқини ипадилиди.

Кейин коҗаели валийси һәсән бәсри гүзәлоғли сөз қилип, дуняниң төт әтрапидин коҗаелигә кәлгән өсмүрләрниң кәлгүсидә тинчлиқ намида йеңи бир дуня қуруп чиқидиғанлиқиға ишәнч қилидиғанлиқини ипадилиди вә “дуняда уруш сәвәбидин азаб-оқубәткә муптила болған пүтүн өсмүрләргә салам вә сөйгү йоллаймән” деди.

Өсмүр балиларға йетәкчилик қилип паалийәткә қатнишиватқан шәрқий түркистан маарип вә һәмкарлиқ җәмийитиниң аяллар бөлүми башлиқи мунәввәр өзуйғур ханимниң билдүрүшичә, 20-апрел күнидики паалийәттә уйғур өсмүрләр шеир оқуди. Хоҗаели шәһәр башлиқи ибраһим қараосман уғлу вә коҗаели валийси һәсән бәсри гүзәл оғли әпәндигә уйғур миллий кийимлиридин доппа вә тон кийдүрүлүп, уйғур өсмүрләрни бу паалийәткә дәвәт қилғанлиқиға тәшәккүр билдүрүлди, шәрәп тахтиси тәқдим қилинди.

Бу паалийәт 9 йилдин бири коҗаелидә һәр йили бир қетим өткүзүп келиниватқан болуп, дуняниң һәр қайси җайлиридики балиларға өз-ара учришиш вә тонушуш пурсити яритип бериш вә улар арисидики меһри-муһәббәт вә сөйгүни күчәйтип, тинч болған дуняниң гүзәлликини һес қилдуруш мәқситидә өткүзүп келинмәктә икән.

Бу паалийәттә уйғур өсмүрләргә йетәкчилик қиливатқан мунәввәр ханимниң билдүрүшичә, уйғур пәрзәнтлири 23-апрел күни, хоҗаели шәһәр башлиқи вә валийси қатарлиқ муһим шәхсләр вә коҗаели хәлқи қатнишидиған чоң мурасимда шеир уқуп уйғур сама уссули көрситидикән, бу җәрянида уйғур өсмүрләр миллий мәдәнийәтни тонуштуруп һәр хил паалийәт елип баридикән.