Ramazan éyida enqerede Uyghurlar duchar boliwatqan diniy bésim anglitildi

Enqerening sinjan rayonluq hökümetning yighin zalida élip bérilghan pa'aliyettin bir körünüsh

Muqeddes rozi éyida dunyaning herqaysi jayliridiki musulmanlarning dert - peryatlirini anglitish üchün türkiyide her xil pa'aliyetler uyushturulmaqta. Bulardin biri 14 - iyul küni axsham enqerening sinjan rayonluq hökümetning yighin zalida ötküzüdi.

Yighinda shimaliy iraqtiki türkmenler bilen Uyghurlar uchrawatqan bésim anglitildi. Ülke ojaqliri teshkilati sinjan shöbisi uyushturghan yighinning riyasetchilikini milletchi heriket partiyisining bash meslihetchisi prof. Dr. Rejayi joshqun ependi qildi. Yighinda iraq türkmenliri medeniyet we hemkarliq jemiyiti enqere shöbisining mes'uli mexmut qasapoghlu iraqtiki türkmenler duchar boliwatqan bésim siyasitini, sherqiy türkistan medeniyet we hemkarliq jemiyiti enqere shöbisi bashliqi xeyrullah efendigil ependi bolsa nuqtiliq halda xitayning musulman Uyghurlargha élip bériwatqan diniy bésim siyasitini anglatti. U nutqida muqeddes ramizan éyida Uyghurlarning eqelliy diniy ibaditinimu qilalmaywatqanliqini, türk musulmanlirining namizida Uyghurlarning baldurraq erkinlikke érishishi üchün du'a qilip qoyushini telep qilidighanliqini éytti.

Yighin axirida bu yighini uyushturghan sinjan ülkü ojaqliri teshkilati re'isi eysa alper doghu ependige mikroponimizni uzattuq. U bu pa'aliyetning intayin muweppeqiyetlik ötkenlikini bayan qilip mundaq dédi:

Men aldi bilen ramazan éyining türk islam dunyasigha xeyirlik bolushini tileymen. Yighinimizning ismi “Sherqiy türkistan bilen kerkükning ötmüshi, bügüni we kélecheki” idi. Yighinda sherqiy türkistanning hazirqi weziyiti toghrisida yéngi melumatlargha ige bolduq. Yighin axirlashqandin kéyinla 500 etrapida yighin ehlige iptar ziyapiti berduq, ziyapet jeryanidimu sherqiy türkistan heqqide söhbetler boldi. Meqsitimiz sherqiy türkistanliq musulman Uyghur qérindashlirimizning derdige ortaq bolush, ularning erkinliki üchün du'a qilish idi, emelge ashti.

U Uyghurlarning axiri bir kün erkinlikke érishidighanliqini tekitlep mundaq dédi:

Men shuni démekchimenki, musulman dunyasida zulum bar. Emma pelestin, misir, demeshiqteki musulmanlar rozi tutalaydu. Öz tilini ishliteleydu. Epsuski bügün sherqiy türkistandiki musulman Uyghur qérindashlirimiz, normal diniy ibaditini qilalmaywatidu. Xitay xata siyaset élip bériwatqan bolghachqa Uyghurlargha qarita bundaq éqilgha sighmaydighan bésim siyasitini élip barmaqta. Uyghur türkliri tarixta nechche qétim musteqilliqini yoqitip qoyup, qayta qolgha keltürgen.