Türkiyediki Uyghurlar rozi héytini matem ichide ötküzdi

Pütün dunyadiki musulmanlar “11 Ayning sultani” dep atalghan muqeddes ramizan éyini ibadet we saxawet bilen tamamlap, rozi héytini shad - xuramliq ichide kütüwalghan bolsimu, türkiyediki Uyghurlar matem ichide kütüwaldi.

Del roza héyt qutluqliniwatqan peytlerde qeshqerning yeken nahiyeside qanliq toqunush yüz bérip, köpligen Uyghurlarning étip tashlan'ghanliqi xewer qilin'ghan idi.

Bu heqte toxtalghan d u q mu'awin re'isi séyit tümtürk xitay hökümitining zorawanliqini eyibleydighanliqini bildürdi.

Türkiyening jumhur re'isi abdullah gül, bash ministir rejep tayyip erdoghan we herqaysi siyasiy partiye bashliqliri téléwiziye, gézit we radi'olar arqiliq bayanat bérip, pütün islam dunyasining rozi héytini tebriklimekte.

Héyt munasiwiti bilen 3 kün tetil qoyuwétilgen türkiyening chong - kichik sheher we yéziliri héyt xushalliqigha chömdi.

Halbuki, türkiyediki Uyghurlarmu rozi héytni Uyghur örp - adetliri boyiche ötküzgen bolsimu, ikki kündin béri yekende arqa - arqidin qanliq toqunushlar yüz bergenliki we weqede köpligen kishilerning ölgenliki heqqide gheyriy resmiy uchurlar tarqalghandin kéyin türkiyediki Uyghurlarning rozi héyti matemge aylandi.

Qeyseride pa'aliyet élip bériwatqan sherqiy türkistan medeniyet we hemkarliq jem'iyiti re'isi séyit tümtürk ependi arqa - arqidin bayanat élan qilip, xitayning bu qirghinchiliq siyasitini qattiq eyiblidi.

Türkiyediki chong - kichik axbarat wasitiliri bu xewerge keng kölemde orun berdi.

Ziyaritimizni qobul qilghan dunya Uyghur qurultiyining mu'awin re'isi séyit tümtürk ependi Uyghurlar bir yerge jem bolup olturaqlashqan qeyseridiki Uyghurlarning héytning birinchi künini shad - xuramliq ichide ötküzgenlikini, ikkinchi küni yekende bolghan weqedin kéyin pütün mehellining musibetke chömgenlikini éytti. Xitayning Uyghurlarning yilda bir kélidighan bayriminimu ötküzüshige ruxset qilmay qan tökkenlikini qattiq eyibleydighanliqini bayan qildi.