Türkiyediki musapir Uyghurlar: türkiye hökümiti bizge puqraliq berse

Türkiyediki musapir Uyghurlarning perzentliri

Gheyriy resmiy sanliq melumatlargha qarighanda, 2014 - yilining otturiliridin 2015 - yilining axirighiche bir nechche ming Uyghur musapir türkiyege kelgen bolup, bularning köp qismi istanbul we qeyseri sheherlirige yerlikleshken.

Dunya xelqi 2015 - yil axirlashturup, 2016 - yilning 1 - künini kütüwalghan bir peytte, türkiyede yashawatqan Uyghur musapirliridin dilshat ependi we adil abdughopur ependiler radi'omiz ziyaritini qobul qilip, türkiyege yétip kelgendin kéyin, türkiye hökümiti, Uyghur we türk qérindashlirining yardimi bilen herqaysi jehetlerdin xatirjem bolghanliqini ipadilidi. Ular yene özliri nöwette duch kéliwatqan bezi emili mesililer heqqidimu toxtaldi we türkiye hökümitidin özlirige puqraliq bérishni telep qildi.

Dilshat ependi 2016 - yilidin némilerni kütisiz? dégen so'alimizgha mundaq jawab berdi: “2016 - Yilida türkiye hökümitidin, türkiye xelqidin we türkiye parlaméntidin kütidighinimiz biz türkiyede yashaymiz dep kelduq, shunga 2016 - yilida türkiye hökümitining bizge puqraliq bérishini tileymiz. Bizge bir puqraliq berse bizmu öz aldimizgha bir ishlarni qilip, türkiye dölitige puqraliq burchimizni ada qilsaq. Türkiye hökümiti bizni öyge orunlashturdi, emma téxighiche turush kinishkilirimiz toluq chiqip bolalmidi. Shunga men qeyseride yashawatqan 180 a'ile Uyghurgha wakaliten türk hökümitining baldurraq bizge puqraliq bérishini tileymen.”

Arqidin istanbulda turuwatqan Uyghur musapir adil abdughopur ependi bilen téléfon söhbiti élip barduq. U, 2015 - yili qandaq ötti dégen so'alimizgha, 2015 - yilida minglighan Uyghurning öz wetinidin mal - mülkidin ayrilip türkiye chiqqanliqini, köp nersisini yoqitip qoyghan bolsimu, xitayning bésimidin qutulup, erkin dunyagha chiqip, oy - pikrini erkin bayan qilish, erkin ibadet qilish hoquqigha ige bolghanliqini bayan qildi.

Uyghur musapir adil abdughopur ependi 2016 - yilida Uyghur dewasining küchiyishini kütidighanliqini, Uyghur xelqining erkinlikke érishishini kütidighanliqini bayan qildi.