B d t qatarliq teshkilatlar we dölet rehberliri türkiyediki herbiy özgirishke ipade bildürdi

Muxbirimiz méhriban
2016-07-18
Share
turkiye-herbiy-ozgurush.jpg Türkiyediki herbiy özgirish basturulghandin kéyin sotlan'ghan eskerlerni saqchilarning sot meydanidin élip chiqiwatqan körünüshi. 2016-Yili 16-iyul, istanbul.
AFP

7-Ayning 15-küni kéchide türkiye armiyisi ichidiki özini "Yurtta tinchliq komitéti" dep atiwalghan bir guruh herbiy türkiye dölet téléwiziyiside bayanat bérip, türkiyede herbiy özgirish élan qilghanliqini bildürgen. Emma 16-iyul shenbe küni etigen erdaghan hökümiti bayanat bérip, mezkur herbiy özgirishke urunush herikitining meghlup qilin'ghanliqini jakarlidi.

En'gliye b b s agéntliqining 17-18-iyul künliri bergen xewerliride mezkur herbiy özgirish weqesi sewebidin tutqun qilin'ghan we xizmitidin toxtitilghan herbiyler we edliye-sot, saqchi xadimliri toghriliq türkiye hökümet emeldarlirining bayanatidin neqil élinip xewer bérildi.

B b s agéntliqining 17-iyuldiki xewiride, weqedin kéyin türkiyening herqaysi jayliridin mezkur herbiy özgirish herikitige chétishliqi bar dep qaralghan générallarni öz ichige alghan 3000 dek herbining tutqun qilin'ghanliqi, 2700 neper sotchi we adwokatning wezipisidin qaldurulghanliqi tilgha élin'ghan bolsa, b b s agéntliqining 18-iyul düshenbe künidiki xewiride yene, türkiye hökümet emeldarining sözi neqil élinip, 19-iyulghiche tutqun qilin'ghanlarning 9000 gha yetkenliki, buning ichide 100 din artuq général barliqi, 8000 gha yéqin saqchining wezipisidin qaldurulghanliqi qatarliqlar xewer qilindi.

Türkiyede yüz bergen herbiy özgirishke urunush herikiti ayaghlashqandin kéyin, b d t, yawropa birliki qatarliq teshkilatlar we amérika qatarliq döletler rehberliri we hökümetliri ipade bildürüp, türkiyediki herbiy özgirish qilmishini eyibligen. Shuning bilen bille, nöwette türkiyede dawamlishiwatqan "Xa'inlarni jazalash" namida herbiy, edliye we saqchi xadimlirining türküm-türkümlep tutqun qilinish weziyitige diqqet qiliwatqanliqini bildürüp, erdughan hökümitini özini tutuwélishqa chaqirghan.

Türkiye t r t radi'osining 16-iyuldin 18-iyulgha qeder bérilgen xewerliride, xelq'araning mezkur weqeni eyibligen bayanatliri heqqide xewerler bérildi. T r t ning 16-iyuldiki xewiride birleshken döle'itler teshkilati bash katipi banki monning mezkur weqeni eyiblep, türkiyediki herbiy-siyasiy süyiqestni qobul qilish mumkin emeslikini eskertkenliki, weziyetni démokratik prinsiplar, qanun-belgilimiler we tinch yol bilen eslige keltürüshning zörürlükini tekitligenliki, yawropa ittipaqi tashqi munasiwetler we bixeterlik siyasiti aliy wekili fédériké moghérini bilen yawropa ittipaqi komitétining kéngiyish ishlirigha mes'ul komissari johanés hannning fethullahchi térrorluq teshkilati unsurlirining herbiy -siyasiy özgirish qozghash teshebbusini eyiblep ortaq yazma bayanat élan qilghanliqi, rusiye, giruziye, ukra'ina, shiwétsiye, pakistan qatarliq köp döletlerning bayanat élan qilip mezkur herbiy özgirishke urunush herikitini eyibligenliki we türkiye hökümitini qollaydighanliqini bildürgenliki, amérika hökümitiningmu mezkur herbiy özgirishke urunush herikitini eyibligenliki qatarliqlar bayan qilindi.

T r t ning 16-iyuldiki xewiride yene, amérika tashqi ishlar ministiri jon kerriyning kéler hepte türkiye tashqi ishlar ministiri mewlüt chawush'oghlu bilen körüshidighanliqi, türkiye dölet mudapi'e ministiri fikri ishiqningmu amérikida dölet ishliri ziyaritide bolup, bu qétimqi herbiy özgirishke urunush herikiti we ikki dölet munasiwitige alaqidar mesililerni muzakire qilidighanliqi xewer qilindi.

Xelq'ara taratqulardin amérika awazining bu heqte bérilgen xewiride, amérika prézidénti barak obamaning 15-iyul küni bayanat bérip, türkiyediki herbiy özgirishke urunush herikitide toqunush we qan tökülüshning aldini élishqa chaqirghanliqi, obamaning yene eyni chaghda moskwada ziyarette boluwatqan amérika tashqi ishlar ministiri jon kerriy bilen téléfonda körüshüp, türkiye weziyitining tereqqiyatini sürüshtürgenliki, amérika tashqi ishlar ministiri jon kerriyning 16-iyul shenbe küni bayanat bérip, " Amérikining türkiye bilen hemkarliship, herbiy özgirishke urunush herikitini tekshüridighanliqi" tilgha élindi.

Amérika awazining 17-iyuldiki xewiride yene shimaliy atlantik ehdi teshkilatiningmu mezkur weqe heqqide bayanat bérip, " Shimaliy atlantik okyan ehdi teshkilatining muhim ezasi bolghan türkiye hökümitini weqeni bir terep qilishta özini tutuwélishqa chaqirghanliqi" xewer qilindi.

Türkiye awazi radi'osining 16-iyuldin 18-iyulghiche bolghan xewerliride yene, yene amérika dölet ishliri ministiri jon kerrining chnn qanilida bayanat bérip, türkiye jumhur re'isi erdughan we bash ministir binali yildirim qatarliq hökümet emeldarliri teripidin mezkur herbiy özgirishke urunush weqeside perde arqisida yétekchilik rolini oynighan dep eyibliniwatqan fethullahchi térrorluq teshkilati katibéshi fethullah gülenning türkiyege qayturup bérilish telipige qarita inkas qayturup, nöwette amérikida turuwatqan fethullah gülenning türkiyege qayturup bérilish mesiliside türkiyedin kélidighan resmiy telep we pakitlargha qarap chiqidighanliqlirini bildürgenliki, shundaqla türkiye hökümet terepningmu mexsus bayanat bérip, türkiyening fethullahchi térrorluq teshkilati katibéshi gülenning bu qétimqi herbiy özgirishke urunush weqeside qoli barliqi heqqidiki matériyallarni eng qisqa waqit ichide amérika edliye tarmaqlirigha teqdim qilidighanliqini bildürgenliki xewer qilindi.

Türkiye t r t radi'osining xewiride yene, türkiye-amérika ikki dölet otturisida 1979-yili 7-iyunda imzalan'ghan, 1981-yili 1-yanwarda ijra qilinishqa bashlighan "Amérika qoshma ishtatliri bilen türkiye jumhuriyiti otturisida jinayetchilerni öz-ara qayturup bérish we jazalashta öz-ara yardemlishish kélishimi"ge asasen amérikining fethullah gülenni türkiyege qayturup bérishi kérekliki alahide eskertilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet