Türkiyede arqa-arqidin yüz bergen üch térrorluq hujumida köp sanda kishi qaza tapti

Ixtiyariy muxbirimiz erkin tarim
2016.08.18
turkiye-terror-hujum.jpg Wanda yüz bergen partlash weqesidin körünüsh. 2016-Yili 17-awghust, türkiye.
RFA/Erkin Tarim

17-Awghust küni wanda, 18-awghust küni etigen elazigh wilayitide, chüshte bitlis wilayitining hizan nahiyiside yüz bergen térrorluq hujumida jem'iy 10 etrapida kishi hayatidin ayrilghan, köp sanda kishi yaridar bolghan.

Türkiyening sherq rayonidiki wan shehiride p k k térrorluq teshkilatining saqchi merkizige qarita élip barghan aptomobilgha bomba qachilap partlitish hujumida 1 saqchi shéhit boldi, ikki puqra hayatidin ayrildi. Saqchi idarisige qarita élip bérilghan mezkur hujumda 20 nepiri saqchi jem'iy 73 adem yarilandi. Jiddiy qutquzush aptomobilliri bilen doxturxanigha élip bérilghan yaridarlardin üchining éghir ikenliki bildürüldi. Weqedin kéyinla wan shehiri boyiche quruqluq we hawadin térrorchilargha zerbe bérish herikiti bashlinip, bomba qachilan'ghan aptomobilni saqchi idarisining aldigha élip kelgenliki ispatlan'ghan térrorchi éghir yaridar halette qolgha chüshürülgen.

Yuqiridiki térrorluq hujumdin kéyin 18-awghust küni etigen sa'et 9da elazigh saqchi idarisining aldida bomba qachilan'ghan bir aptomobil partlidi. Bomba qachilan'ghan aptomobil etigende saqchilar ishqa kéliwatqan waqtida partlitilghan bolup, hökümet da'irilirining bildürüshiche, 3 saqchi shéhit bolghan, 146 kishi yaridar bolghan bolup, buning ichidin 14 kishining ehwali éghir iken.

Elazigh wilayitidiki bomba qachilan'ghan aptomobil bilen hujum qilish weqesidin 4 sa'et ötkendin kéyin türkiyening sherqidiki bitlis wilayitining hizan nahiyeside térrorchilar kömgen bombining partlishi bilen 4 herbiy shéhit boldi.

Elazigh wilayiti türkiyening sherqiy jenubi rayonida térrorluq hujum bolup baqmighan rayon bolup, tunji qétim bundaq bir hujumning meydan'gha kélishi insanlarni oygha salmaqta. 24 Sa'et ichide arqa-arqidin 3 chong térrorluq hujumning yüz bérishi türk xelqining qattiq nepritini qozghimaqta.

Térrorluq hujumdin kéyin türkiye milliy mudapi'e ministiri fikri ishiqlar muxbirlargha bayanat bérip mundaq dédi: “ P k k ning 15-iyul herbiy siyasiy özgirishke urunush weqesidin kéyin élip bériwatqan xa'inliq hujum shekli p k k térror teshkilatining bizge melum bolghan heqiqiy ich yüzini ashkarilap berdi. Bu hujum weqesi p k k térror teshkilatining meqsitige yétish üchün herqandaq zorawanliq herikitini qilidighanliqini körsitip béridu. ”

Türkiyede burun körülüp baqmighan shekilde arqa-arqidin bundaq térrorluq hujumning köpiyip kétishidiki seweb néme? bezi mutexessisler dégendek türkiye süriyedek bolup kétermu? bu, türkiyediki Uyghur mesilisige qandaq tesir körsiter? dégen so'allargha jawab tépish üchün mutexessislerge mikrofonimizni uzattuq.

Tükiyede yashawatqan Uyghur ziyaliyliridin doktor erkin ekrem we doktor alimjan ependiler bu heqtiki so'allirimizgha jawab berdi.

Türkiye j x idarisining tor bétide élan qilin'ghan bayanatqa asaslan'ghanda, p k k térror teshkilati tunji qétim 1984-yili 8-ayning 15-küni hujum élip barghan bolup, ötken yilighiche bolghan 31 yil jeryanida 83 ming 500 qétim hujum élip barghan. P k k térror teshkilati ötken 31 yil jeryanida jem'iy 7000 etrapida puqrani öltürgen. 14 Ming etrapida puqra yaridar bolghan. Bu 31 yil jeryanida türkiye jama'et xewpsizlik küchliri 22 ming 374 térrorchini öltürgen.

Türkiyediki térrorluq hujum künsayin köpeymekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.