Türkiye bash ministiri bilen xitay mu'awin bash ministiri otturisidiki uchrishishta Uyghur mesilisi kün tertipke kelgen

Türkiye mu'awin bash ministiri memet shimshek ependi 3-noyabir küni xitay mu'awin bash ministiri wang yang bilen körüshti. Ular, türkiye-xitay hökümetler ara hemkarliq komitétining birinchi qétimliq yighinida körüshken idi.

Xitay xelq jumhuriyitining mu'awin bash ministiri wang yang bügün resmiy ziyaret üchün türkiyening enqere shehirige yétip kelgen bolup, türkiyening “Milliyet” gézitide bügün élan qilin'ghan xewerge asaslan'ghanda, wang yang özining 11-ayning 3-künidin 5-künigiche dawamlishidighan ziyaritining birinchi künide aldi bilen türkiye bash ministir mu'awini memet shimshek ependi bilen birlikte türkiye bilen xitayning hökümetler ara hemkarliq komitétining birinchi nöwetlik yighinigha ishtirak qilghan.

Ishenchlik menbelerdin igiligen melumatlargha asaslan'ghanda, yighinda ikki dölet otturisidiki siyasiy mesililer, bixeterlik we térrorizmgha qarshi küreshte hemkarliq élip bérish mesilisidin bashqa yene ikki dölet otturisidiki iqtisadiy we medeniyet munasiwetliri toghrisidimu muzakire élip bérilghan. Muzakirilerdin kéyin, xitay mu'awin bash ministir wang yangni türkiye bash ministiri binali yildirim ependi qobul qilghan. Her ikkila uchrishishta abduqadir yapchan mesilisi kün tertipke kelgen.

Türkiye rehberliri bilen xitay rehberliri otturisidiki uchrishishlarda burun iqtisadiy we medeniy munasiwetler aldinqi orunda turatti, emma bu qétimqi uchrishishta ikki dölet otturisidiki siyasiy mesililer, bixeterlik we térrorizmgha qarshi küreshte hemkarlishish mesililiri aldinqi orun'gha qoyulghan.

Buning bundaq bolushidiki sewebler heqqide öz köz qarashlirini bayan qilghan türkiye istratégiyelik chüshenche institutining türkiye-xitay munasiwetliri mutexessisi doktor erkin ekrem ependi öz pikirlirini otturigha qoydi.

Sherqiy türkistan ma'arip we hemkarliq jem'iyiti re'isi hidayetulla oghuzxan ependi türkiye bash ministiri binali yildirim we bash ministir mu'awini memet shimshekning xitay mu'awin bash ministiri bilen bolghan uchrishishlirida Uyghur mesilisining küntertipke kelgenlikini ilgiri sürdi.

Doktor erkin ekrem ependi hazir türkiye saqchi idarisining tutup turush ornida tutup turuluwatqan abduqadir yapchan mesilisining choqum küntertipke kelgenlikini ilgiri sürdi.

Hidayetulla oghuzxan ependi istanbul baqirköy sot idarisining abduqadir yapchanni xitay bergen ispatni “Yétersiz” dep qoyup bergenlikini, shunga türkiyening uni xitaygha bermeydighanliqini ilgiri sürdi.

Doktor erkin ekrem ependimu türkiyening yapchanni qayturup bermeydighanliqini ilgiri sürdi.

Doktor erkin ekrem ependi xitay hökümitining bu xil ziyaretlerde türkiyege iqtisadiy jehettin menpe'et bérish arqiliq Uyghur dewasini yoq qilishqa tirishiwatqanliqini, emma buning mumkin emeslikini ilgiri sürdi.

Xewerlerde körsitilishiche, türkiye dölet re'isi rejep tayyip erdoghan 11-ayning 4-küni istanbulda wang yangni qobul qilghandin kéyin, wang yang 5-chésla türkiyedin ayrilidiken.