Türkiyening yawropa birliki ministirliqi uyushturghan yighinda Uyghur mesilisi anglitildi

Türkiye yawropa birliki ministiri wolqan bozqir ependi sözde

Türkiye yawropa birliki ministirliqi teripidin türkiyening qeyseri shehiride ötküzülgen “Yawropa birlikige maslishish” mawzuluq yighinda Uyghur mesilisi anglitildi. 2 - Ayning 24 - küni qeyseri shehiridiki qadir xas yighin zalida ötküzülgen mezkur yighinni türkiye yawropa birliki ministirliqi uyushturghan bolup, yighin'gha türkiyede pa'aliyet élip bériwatqan minggha yéqin ammiwi teshkilat mes'ulliri teklip boyiche qatnashqan.

Uyghur teshkilatliridin sherqiy türkistan medeniyet we hemkarliq teshkilati re'isi séyit tümtürk, mu'awin re'is emrullah efendigil ependi qatarliq kishiler qatnashqan.

Yighinda türkiye yawropa birliki ministiri wolqan bozqir ependi, qeyseri walisi, sheher bashliqi qatnashti we söz qilghan.

Sherqiy türkistan medeniyet we hemkarliq teshkilati re'isi séyit tümtürk ependi söz qilip, Uyghurlarning hazirqi weziyiti we Uyghurlarning yawropa birliki ministirliqigha bolghan telepliri heqqide toxtalghan.

Bu heqte ziyaritimizni qobul qilghan séyit tümtürk ependi, mezkur yighin'gha türkiye yawropa birliki ministiri wolqan bozqir bashchiliqida köp sanda rehberning qatnashqanliqini, yighinda özining söz qilip, Uyghur mesilisining insan heq we hoquqliri mesilisi ikenlikini, hazir xelq'ara mesilige aylan'ghanliqini, türkiye jumhuriyiti dölitining bu mesilini yawropa parlaméntida otturigha qoyushi kéreklikini otturigha qoyghanliqini bayan qildi.

U, nuqtiliq halda türkiye yawropa birliki ministirliqining sherqiy jenubi asiya döletliri arqiliq türkiyege kelgen musapirlargha yawropa birliki döletliri bilen birlikte ige chiqishi kérekliki telipini otturigha qoydi.

Séyit tümtürk yawropa birliki ministirliqi mu'awin ministiri aliy ependining 2015 - yili ürümchide élip barghan ziyaritide xitay rehberlerge Uyghurlar duchar boluwatqan insan heqliri depsendichilikini otturigha qoyghanliqini dégenlikini bayan qildi.

Qeyseri qadir xas yighin zalida ötküzülgen yawropa birliki ministirliqi teripidin uyushturulghan yighin'gha qatnashqan sherqiy türkistan medeniyet we hemkarliq teshkilati mu'awin re'isi emrullah efendigil ependi we abduqadir tümtürkler yighinning nahayiti yaxshi ötkenlikini, Uyghur mesilisining yawropa birliki ministirliqi arqiliq yawropa parlaméntida kün tertipke kélidighanliqigha ishinidighanliqini bayan qildi.

Türkiye 1960 - yili yawropa birlikige kirish üchün iltimas sun'ghan bolsimu, téxiche qobul qilinmighan. Türkiye yawropa birliki ministirliqi türkiyeni her jehettin yawropa birliki ölchemlirige yetküzüsh üchün tirishmaqta.