Türkiye qeyseridiki Uyghurlar térrorgha lenet oqudi

Türkiyening qeyseri shehiridiki Uyghurlar qollirida bayraq kötürgen halda térrorluq hujum yüz bergen meydan'gha bérip térrorgha lenet oqudi. 2016-Yili 19-dékabir.

12-Ayning 19-küni türkiyening qeyseri shehiride pa'aliyet élip bériwatqan sherqiy türkistan medeniyet we hemkarliq jem'iyiti mu'awin re'isi emrullah efendigil ependi bashchiliqidiki Uyghurlar qollirida bayraq kötürgen halda térrorluq hujum yüz bergen meydan'gha bérip térrorgha lenet oqudi.

Yéqindin béri, türkiyede térror weqesi künsayin köpeymekte. 12-Ayning 10-küni istanbulning béshiktash rayonidiki putbol sariyining etrapida ikki yerde saqchilargha élip bérilghan özini partlitish hujumida 36 saqchi, 8 puqra bolup jem'iy 44 kishi hayatidin ayrilip qalghan idi. Arqidin 12-ayning 17-küni etigen Uyghurlar eng köp olturaqlashqan qeyseri wilayitidiki erjiyes uniwérsitétining aldida türkiye armiyesige térrorluq hujum élip bérilip 13 herbiy shéhit boldi, köp sanda puqra yaridar boldi. 12-Ayning 19-küni kechqurun rusiye fédératsiyesining enqerede turushluq bash elchisi karlos resim körgezmisining échilish murasimida 22 yashtiki bir térrorchining hujumida hayatidin ayrildi.

Türkiyede künsayin köpiyiwatqan bu xil térrorluq hujumgha lenet oqush üchün we hayatidin ayrilip qalghan shéhitlerni xatirilesh üchün kishiler weqe yüz bergen yerlerni ékskursiye qilmaqta. 12-Ayning 19-küni qeyseride térrorluq hujum yüz bergen yerde muxbirlargha bayanat bérish pa'aliyiti ötküzüldi. Qeyseri waliyliqi uyushturghan pa'aliyetke, ammiwi teshkilatlar, wilayetning her qaysi idare, jem'iyetlirining her derijilik kadirliri, erjiyes uniwérsitétining oqutquchi we oqughuchiliridin bolup köp sanda kishi ishtirak qilghan. Pa'aliyetke qeyseride pa'aliyet élip bériwatqan sherqiy türkistan medeniyet we hemkarliq teshkilatining mu'awin re'isi emrullah efendigil ependi bashchiliqidiki bashqurush hey'iti ezaliri we Uyghurlar ishtirak qilghan. Ular qollirida ay yultuzluq kök bayraq bilen türkiye bayriqini kötürgen halda, térrorgha we zorawanliqqa lenet oquydighanliqini ipadileshken. Biz bu heqte melumat igilesh üchün, bu pa'aliyetke qatnashqan emrullah efendigil, abdughéni békin we istratégiyilik chüshenche instituti mutexessisi doktor erkin ekrem ependiler bilen téléfon söhbiti élip barduq.

Emrullah efendigil ependi qeyseride tunji qétim bundaq bir térror weqesining yüz bergenlikini, buning türkiyening muqimliqini, xelqning rahet turmushini buzush üchün élip bérilghanliqini, qeyseridiki Uyghurlar namidin buninggha lenet oquydighanliqini bayan qildi.

Sherqiy türkistan medeniyet we hemkarliq jem'iyiti bashqurush hey'iti ezasi abdughéni békin ependi Uyghurlarning türkler bilen birlikte qeyseride yüz bergen térrorluq hujumigha lenet oqughanliqini, hayatidin ayrilip qalghanlargha du'a qilghanliqini bayan qildi.

Türkiyede térrorluq hujumning köpiyip kétishi jem'iyette ensizlik peyda qilmaqta. Bezi siyasiy analizchilar süriye, iraq we türkiyediki bezi térror teshkilatlirining türkiyede ichki urush peyda qilghanliqini ilgiri sürse, yene bezi analizchilar, bu ishni türkiyening rusiye we xitay bilen yéqinlishishidin bi'aram bolghan bezi dölet we guruhlarning qilduruwatqanliqini ilgiri sürmekte. Bu heqtiki so'alimizgha jawab bergen doktor erkin ekrem ependi türkiyening jughrapiyilik alahidiliki tüpeyli etrapida boluwatqan urushning tesirige uchrawatqanliqini bayan qildi.

Doktor erkin ekrem ependi türkiyede hazirche ichki qalaymiqanchiliq chiqish éhtimalining yoqluqini ilgiri sürdi.

Qeyseri türkiyening ottura rayonigha jaylashqan bolup, türkiye térror bilen küresh qiliwatqan 35 yildin béri, bu yerde térrorluq weqe yüz bérip baqmighan iken. 12-Ayning 17-küni xelq aptobusi bilen bazargha kétiwatqan herbiylerge hujum qilish weqeside 13 kishining hayatidin ayrilishi türkiyede qattiq endishe peyda qildi.