Türkiye bash ministirining ayali amine erdoghan'gha sherqiy türkistan bayriqi hediye qilindi

Amine erdoghan munewwer özUyghur xanim we xurshide xanimlar qatarliq Uyghur wekiller bilen xatire resimge chüshti. 2014-Yili yanwar, türkiye.

Türkiye bash ministiri tayyip erdoghanning ayali amine erdoghan xanim, “Milletning xushalliqi üchün xizmet qilmighan dölet zulum menbesige aylinidu”, dédi.

Istanbul sür'ichi jem'iyitining uyushturushi bilen “Istanbul xanimliri” namliq bir yighin ötküzüldi. Yighin'gha türkiye bash ministiri rejep tayyip erdoghanning ayali amine erdoghan sherep méhmini süpitide qatnashti we yighinda söz qilip, “Milletning xushalliqi üchün xizmet qilmighan dölet zulum menbesige aylinidu” dédi.

Yighin'gha alahide teklip qilin'ghan parlamént ezaliridin métin külunk, adalet we tereqqiyat partiyisining ayallar bölümi re'isi güldal aqshit, istanbul waliysining ayali, gül mutlu, istanbul sheher bashliqi qadir topbashning ayali özleyish topbash xanim, fatih sheher bashliqi mustafa demir qatarliq muhim shexsler we ijtima'iy jem'iyet hem ammiwi teshkilatlarning mes'ulliri yaki wekilliri bolup köp sanda kishi qatnashti.

Yighin'gha Uyghurlargha wakaliten sherqiy türkistan ma'arip we hemkarliq jem'iyitining ayallar bölümi mes'ulliridin munewwer öz Uyghur we xurshide xanimlar teklip bilen qatnashti hem bash ministirning ayali amine erdoghan'gha sherqiy türkistan bayriqi, etles sharpa we Uyghur doppisi hediye qildi.

Amine erdoghan xanim sehnide sherqiy türkistan bayriqini kötürüp Uyghur wekiller bilen xatire resimge chüshti. Héch qandaq bayraq qoyulmighan chong zalda ay yultuzluq kök bayraq pütün yighin ehlining diqqitini tartti.

Uyghur wekil munewwer özUyghur xanim, amine erdoghan'gha Uyghurlarning salimini yetküzdi we amine erdoghanning ötken yili ürümchi ziyariti Uyghurlarni xushal qilghanliqini hem ümid nuri chachqanliqini ipadilidi.

Amine erdoghan xanim, “Méning Uyghur qérindashlirim, istanbulgha merhaba! xushal keldinglar” dédi we ayyultuzluq kökbayraqni qoligha élip Uyghur wekiller bilen xatire resimige chüshti. Yighin'gha köp sanda axbaratchilarmu qatnashqan bolup, bu körünüshni bes-beste resimge tartti hem sin'alghugha aldi.

Yighinda “Sür ichi guruppi”ning bash katipi fatime akin xanim échilish nutqi sözlidi we bu yighinning yaxshi insanlarni yaxshi insanlar bilen uchrashturush shuningdek yaxshi ishlarni royapqa chiqirish üchün uyushturulghanliqini ipadilidi.

Kéyin bash ministirning ayali amine erdoghan xanim söz qilip mundaq dédi: insan dölet üchün emes dölet insan üchün mewjut bolushi kérek. Milletning xushalliqi üchün xizmet qilmighan dölet apparati zulum menbesi haligha aylinidu.

Amine erdoghan xanim sözide yene mundaq dédi: bizning tarix we medeniyet éngimizda insanni chetke qéqish yoq, del eksiche insan jem'iyetning, siyasetning we iqtisadning del merkizide bolidu. Insan dölet üchün emes dölet insan üchün mewjut bolidu. Milletning bext-sa'aditi üchün xizmet ishlimigen dölet apparati zulum menbesi halgha aylinidu. Cheksiz payda élish arzusini birinchi qatarda qoyghan tüzüm insanperwerlik bolmaydu.

Amine erdoghan xanim sözide yene milliti we tiligha qarap ayrimichiliq qilghanlar tinchliq üchün emes zulum üchün xizmet qilidighanliqini ipadilep mundaq dédi: küch we cheksiz payda élish arzusini birinchi qatarda qoyghan tüzüm insanperwer bolmaydu, wijdaniy bolmaydu, hem adil bolalmaydu, özlirini we bashqa millet we xelqlerni, özlirining qimmet qarashlirini, bolupmu özlirini we öz millitini bashqilardin üstün orunda qoyup mu'amile qilghanlar köngülni utalmaydu belki köngülni renjitidu. Insanlar arisida millitige, tiligha we medeniyitige we pikir-chüshenchilirige qarap ayrimichiliq qilghanlar, tinchliq we hemkarliq üchün emes zulumgha xizmet qilidu.

Amine erdoghan xanim sözide yene tarix ayrimichiliq qilghanlarni xatirilimeydighanliqini ipadilep mundaq dédi:
Bizning medeniyet chüshenchimiz, insanlar arisida ayrimichiliq uruqi chachqanlarni eslimeydu, tariximizgha qaraydighan bolsaq, mewlane jalalidin rumini, yünüs emirini, fatihni, mimar sinanni, mehmet akifni ulargha oxshash qanchilighan ulugh insanlarni esleymiz. Buzghunchiliq qilghanlarni emes, yasighanlarni, köngülni renjitkenlerni emes köngüllerni utqanlarni esleydu, insandin qalidighini peqet uning yaxshi ishliri, yaxshiliq bilen esleydighan xatirileydighan eserlerdur. Yétimning béshini silighan, kembeghelning öyini ziyaret qilghan, derdmen bilen dertlirige ortaq bolghan, mezlumlarning awazi bolghanlarni bu millet onutmaydu. Qelbi milliti we wetini üchün soqidighanlar eziz milletning könglidin choqum öchmeydighan orun alidu.

Biz bu yighin toghrisida téximu köp melumatqa érishish üchün bu yighin'gha qatnashqan sherqiy türkistan ma'arip we hemkarliq jem'iyitining ayallar bölümi mes'uli munewwer özUyghur xanim bilen söhbet élip barduq.

Munewwer özUyghur xanim, amine erdoghan'gha sherqiy türkistan bayriqini hediye qilip intayin xushal bolghanliqini, Uyghurlar üchün buningdin qimmetlik hediye bolmaydighanliqini ipadilidi.