Amérika Uyghurliri 2018-yilni birlikte kütiwaldi

Amérikidiki Uyghur jama'itining 2018-yilni kütüwélish pa'aliyitide dunya Uyghur qurultiyining aliy rehbiri rabiye qadir xanim söz qilmaqta

2017-Yilning axirqi kéchisi amérikining washin'gton shehri we uninggha yéqin jaylardiki Uyghur jama'iti bir yerge jem bolup, yéngi yilni birlikte kütiwaldi. En'eniwi Uyghur naxsha-muzikiliri bilen janlan'ghan yéngi yilliq sorunda Uyghur pa'aliyetchiler söz qilip, yéngi yilning Uyghurlar üchün yéngi ümidlerdin dérek béridighanliqini bildürdi.

Muhajirettiki Uyghur jama'iti üchün Uyghurlar bir yerge jem bolidighan kolliktip pa'aliyet herqachan xoshalliq, tentene, didarlishish we Uyghurluq tuyghusidin tughulidighan iptixarliq hésliri bilen yughurulup kétidu. 2017-Yili 31-dékabir kechliki washin'gton shehridin anche yiraq bolmighan fals chérch shehride ötküzülgen yéngi yilliq pa'aliyet soruni bu nuqtini yene bir qétim namayen qildi.

Amérikidiki Uyghur jama'itining ammiwiy teshkilati bolghan “Amérika Uyghur birleshmisi” biwaste teshkilligen bu pa'aliyet ötken yillardikige oxshash köpligen Uyghurlarni, jümlidin köp sandiki Uyghur yashlirini özige jelp qilghanliqi melum. Bu qétimqi yéngi yilni kütüwélish pa'aliyiti üchün teyyarlan'ghan zalmu tézla Uyghur jama'iti bilen tolup, balilarning xoshal külkiliri bilen biraqla awatliship ketti.

Bu yilqi pa'aliyet kech sa'et sekkizde bashlinidighanliqi üchün alahide yémeklik buyrutulmighan idi. Emma bir qisim Uyghur a'ililiri xalis teyyarlap kelgen Uyghurche yémeklikler Uyghurlarning pidakarliqini shuningdek Uyghurlardiki hemdertlik rohini melum derijide eks ettürüsh bilen birge pa'aliyetke yéngi mezmun qoshti.

Yighilghan jama'et birer qur jayliship, ghizagha éghiz tégip bolghanda amérika Uyghur birleshmisining re'i'isi élshat hesen bügünki pa'aliyetning bashlan'ghanliqini élan qildi. Shuningdek köpchilikni orunliridin turup mezkur pa'aliyetning tunji mezmuni bolghan “Sherqiy türkistan dölet shé'iri” gha éhtiram bildürüshke chaqirdi. Shuningdin kéyin hemmeylen hayajan ichide orunliridin turup “Sherqiy türkistan dölet shé'iri” ni birlikte oqudi.

Shuningdin kéyin élshat hesen söz élip, bügünki pa'aliyet üchün alahide qedem teshrip qilghan dunya Uyghur qurultiyining aliy rehbiri rabiye qadir xanimni sözge teklip qildi.

Rabiye qadir xanim sehnige chiqip aldi bilen köpchilikning yéngi yilini qutlash bilen birge, özining hazir “Sherqiy türkistan dölet shé'iri” oqughan waqittiki hés-tuyghulirini köpchilik bilen ortaqlashti shuningdek Uyghurlarning nöwette tarixtiki eng xeterlik ehwalda ikenlikini eslitip ötti.

U sözining dawamida nöwette Uyghurlarning weziyiti bunche yamanliship kétiwatqan ehwalda Uyghurlar üchün xitay hökümitidin dawamliq shepqet kütüshning bihude arzu bolidighanliqini alahide tekitlidi.

Arqidin élshat hesen sözge chiqip, Uyghurlar öz wetinide hemmila nersidin ayrilip qélish xewpige duch kéliwatqan ehwalda muhajirettiki Uyghurlar arisida barliqqa kelgen netijilerni eslep ötti. Shu qatarda Uyghur milliy kimlikining eng muhim achquchi bolghan ana til saheside qolgha kéliwatqan utuqlargha yuquri baha berdi.

Uyghurlarning hayati bilen chemberches baghlinip ketken naxsha we muzikimu bu qétimqi pa'aliyette tégishlik orun aldi. Amérikidiki Uyghur yashliri bügünki yéngi yilliq pa'aliyiti üchün teyyarlighan sen'et nomurliridin Uyghurche ussul zaldikilerni hayajan'gha saldi. Shu qatarda yashlar “Gül ussuli” oynighach qizil gülni rabiye qadir xanimgha teqdim qilghanda pütün zalda alqish sadaliri kötürüldi.

Pa'aliyet axirida amérika Uyghur birleshmisining re'isi élshat hesen ayrim ziyaritimizni qobul qilip, muhajirettiki Uyghurlarning mushu xil pa'aliyetler arqiliq öz-özini téximu küchlendüreleydighanliqini alahide tekitlidi.

Kéche sa'et qongghuriqi nölge yéqinlashqanda köpchilik birlikte tetür sanaq sanap yéngi yilni birlikte kütüwaldi.