Uyghurlar washin'gtonda ikki jumhuriyetni xatirilidi

9 - Noyabir küni kechte amérikidiki Uyghur jama'iti washin'gton shehiri yénidiki falis church rayonida 1933 - yili qeshqerde élan qilin'ghan sherqiy türkistan islam jumhuriyitining 80 yilliqi bilen 1944 - yili ghuljida élan qilin'ghan sherqiy türkistan jumhuriyitining 69 yilliqini tentenilik tebriklidi.

Shundaqla bu pa'aliyette yene amérika Uyghur birleshmisining qurulghanliqining 15 yilliqimu xatirilendi. Falis church rayonidiki bir réstorantda ötküzülgen mezkur xatirilesh yighinigha dunya Uyghur qurultiyining bezi döletlerde turushluq mes'ulliri, amérika Uyghurliri birleshmisining mes'ulliri, washin'gton etrapida yashaydighan Uyghurlardin bolup köp sanda kishi qatnashti. Xatirilesh yighini istiqlal marshini oqush bilen bashlandi. Yighinning kün tertipige bina'en xatirilesh yighinigha riyasetchilik qilghan amérika Uyghur jem'iyiti re'isi alim séyitof ependi ikki jumhuriyetning musteqilliqi üchün jénini pida qilghan shéhitlerni xatirlep nutuq sözlidi.

Alim séyitof ependi échilish nutiqida ikki jumhuriyetni xatirilesh pa'aliyitini ötküzüshtiki meqsiti heqqide toxtaldi we dunya Uyghur qurultiyining re'isi rabiye qadir xanimning Uyghur dewasigha qoshqan töhpisige yuqiri baha berdi.

Murasimda d u q ning sabiq re'isi erkin aliptékin ependi bügün Uyghurlar élip bériwatqan dewaning ikki jumhuriyetni qurush üchün élip barghan dewaning dawami ikenlikini bayan qildi.

Arqidin péshqedem pa'aliyetchi, amérika Uyghur birleshmisining qurghuchi ezaliridin biri, ghulamidin paxta ependi özining sherqiy türkistan islam jumhuriyiti qurulghan 1933 - yili qeshqerde tughulghanliqini, 3 - jumhuriyetnimu körüshni janabi alladin tileydighanliqini tekitlidi.

D u q ijra'iye komitéti mudiri dolqun eysa ependimu söz qilip, Uyghurlarni öz dewasigha ige chiqishqa aktip awaz qoshushqa dewet qildi.

Murasim pa'aliyiti jeryanida yene d u q ning mu'awin re'isliridin ilham mexmut, ümit agayi, esqer jan we sherqiy türkistan medeniyet we hemkarliq jem'iyiti enqere shöbisi mes'uli xeyrullah efendigil ependiler söz qilip, ikki jumhuriyetni xatirilesh bilen bu jumhuriyetning Uyghur siyasiy hayatida oynighan roligha yuqiri baha berdi.

Pa'aliyette gollandiyidin kelgen Uyghur sen'etchi aygül hesen xanim naxsha orunlighandin kéyin washin'gtondiki Uyghur yashliri teyyarlighan sen'et numirilirini körsitildi shuningdek shé'irlar diklamatsiye qildi.

Sherqiy türkistan islam jumhuriyiti qurulghanliqining 80 yilliqi we amérika Uyghur birleshmisi qurulghanliqining 15 yilliqini xatirilesh pa'aliyitide yene dunyaning her qaysi jayliridin kelgen d u q ning wekillirige xatire boyumi tarqitildi.

Yighin axirida amérika Uyghur birleshmisining qurghuchiliridin biri bolghan turdi xoja bilen söhbet ötküzduq. U mezkur uyushmining tereqqiyati toghrisida toxtaldi.

Murasimgha qatnashqan bir Uyghur yash pa'aliyettin kéyin öz tesiratini bayan qilip, özining mezkur pa'aliyetke qatnishish arqiliq köp bilimlerni ögen'genliki we tesirlen'genlikini izhar qildi.

Sherqiy türkistan jumhuriyitining qurulghanliqining 80 yilliqini xatirilesh murasimi 12 - noyabir küni amérika dölet mejliside ötküzülüsh aldida turmaqta.