Uyghurlar istanbulda zhurnalist we yazghuchilargha ziyapet berdi

Muxbirimiz erkin tarim
2016-12-16
Élxet
Pikir
Share
Print
Istanbuldiki zhurnalist we yazghuchilar
Istanbuldiki zhurnalist we yazghuchilar
RFA/Erkin Tarim


Türk xelqi qérindash Uyghur xelqighe dawamliq hésdashliq qilip kéliwatqan bolsimu, 15-iyulda yüz bergen herbiy özgirishke urunush weqesidin kéyin, Uyghur mesilisi türkiyening kün tertipidin chüshüp qalghan bolsimu, ikki aydin béri türkiyening normallishishigha egiship qaytidin türk axbarat wasitiliride orun élishqa bashlidi. Istanbuldiki Uyghur xewer we tetqiqat merkizi xadimliri Uyghur mesilisini kün tertpke élip kéliwatqan zhurnalist, muxbir we mutexessislerge rehmet éytish üchün 12-ayning 10-küni aqsham istanbul "Méhman" réstoranida ulargha chong ziyapet berdi. Ziyapetke bezi téléwiziye programmisi riyasetchiliri, yazghuchilar, tarixchilar we zhurnalistlar ishtirak qildi. Dunya insan heqliri küni ötküzülgen ziyapetke benggu türk téléwiziyesining programma riyasetchisi adwokat hesen besri ependi, zhurnalist we téléwiziye programma riyasetchisi memet fatih jan ependi, t w 24 téléwiziyesining "An we tarix" namliq programmisining riyasetchisi koray sherbetchi ependi, zhurnalist, yazghuchi faruq köse ependi, "Osmanli arxiplirida sherqiy türkistan" namliq eserning yazghuchisi tarixchi süreyya atilla saghlamchubukchu ependi, zhurnalist, neshriyatchi akif öztürk ependi we adwokat turan babayigit qatarliq kishiler ishtirak qildi. Uyghur xewer we tetqiqat merkizi mes'ulliridin hamit göktürk ependi uyushturghan ziyapetke yene, istanbulda pa'aliyet élip bériwatqan sherqiy türkistan ammiwiy teshkilatlirining bashqurush hey'iti ezaliri we bezi ziyaliylar ishtirak qilghan.

Hamit göktürk ependi kéyinki 3 ay ichide Uyghurlar toghrisida türkiyede 4-5 programma tarqitilghanliqini, bulargha rehmet éytish üchün bu ziyapetni bergenlikini bayan qildi.

Uyghur xewer we tetqiqat merkizining tor gézitide maqalisi élan qiliniwatqan doktor perhat tengritaghli ependi bu pa'aliyetning nahayiti yaxshi ötkenlikini bayan qildi.

Hamit göktürk ependi zhurnalist, téléwiziye programma riyasetchiliri, tarixchi we yazghuchilar shundaqla istanbuldiki bezi Uyghurlar ishtirak qilghan ziyapette Uyghur dewasini türkiyede qandaq qilghanda téximu yaxshi élip barghili bolidighanliqi toghrisida teklip-pikirlerning chüshkenlikini bayan qildi.
turkiye-instanbul-zhurnalist-yazghuchilar-2016.jpg
Ziyapetke ishtirak qilghan t w 24 téléwiziye qanalining programma riyasetchisi koray sherbetchi ependi ziyaritimizni qobul qildi. U, "Ziyapette, Uyghur dewasini türkiyede qandaq anglitish toghrisida muzakire élip bériliptu, sizche qandaq anglitish kérek?" dégen so'alimizgha mundaq jawab berdi: "Tebi'iyki, bu mesilini anglitish kérek. Jem'iyette eng köp qollinilghan ijtima'iy taratqular arqiliq anglitish kérek. Ikkinchidin, sherqiy türkistan mesilisini peqetla xitay zulmi arqiliqla emes, türk dunyasining sherq qel'esi ikenlikini, néme üchün muhim ikenlikini anglitishimiz kérek. Medeniyet jehettinmu anglatsaq téximu tesirlik bolidu. Simwollar arqiliq anglitishimiz kérek. Mesilen, kök bayraq, men bezi yashlargha kök bayraqni körsetken waqtimda körüp heyran qaldi. Men kök bayraq arqiliq anglatsam, téximu bek yadida qaldi. Qisqisi ata yurtimiz sherqiy türkistandiki mesililerni her jehettin anglitishimiz kérek."

Perhat tengritaghli ependi Uyghurlarning peqetla zulumgha uchrawatliqi jehettinla emes, her jehettin tonulushi kéreklikini tekitlidi.

Qimmetlik radiyo anglighuchilar, türkiyidiki radiyo, téléwiziye we gézit, zhurnallarda Uyghurlar duchar boluwatqan bésim siyasiti anglitilipla qalmastin, Uyghurlarning örp-adetliri we medeniyitimu anglitilmaqta.

Toluq bet