Bezi Uyghurlarning xitay konsulxanisida yighin'gha qatnishishi Uyghurlar arisida ghulghula peyda qildi

Ixtiyariy muxbirimiz erkin tarim
2017.10.23
xitay-istanbul-konsulxanidiki-yighinda-uyghur.jpg Xitayning istanbuldiki bash konsulxanisida chaqirilghan yighindin bir körünüsh. 2017-Yil 18-öktebir, istanbul, türkiye.
Istanbuldiki xitay konsulxanisining tor bétidin élin’ghan

Xitay kommunist partiyesining 19-nöwetlik wekiller qurultiyining chaqirilghanliqini qutlash meqsiti bilen 18-öktebir küni Xitayning istanbuldiki bash konsulxanisida chaqirilghan yighinGha istanbulda yashawatqan bezi Uyghurlarning qatnashqanliqi Uyghurlar arisida ghulghula peyda qildi.

Bash konsulining ayali lu chi uyushturghan pa'aliyetke istanbulda pa'aliyet élip bériwatqan “Türkiye-xitay tijaret uyushmisi” ning mes'ulliri, türkiyediki bezi xitaylar bolup 30 etrapida kishi ishtirak qilghan.

Xitay konsulxanisining tor bétide 19-öktebir küni élan qilin'ghan xewerge asaslan'ghanda, bu pa'aliyetke “Xitay muhajir ayallar uyushmisi” ning re'isi mewlüde eziz qatnashqan we söz qilghan. U sözide ötken yili 15-iyul küni türkiyede herbiy siyasiy özgirishke urunush weqesi yüz bergende, köp sandiki xitay sayahetchiliri istanbul ayrodromida solinip qalghanliqi, bu waqitta xitay konsulxanisining ulargha yémek-ichmek apirip yardem qilghanliqini, shunga xitayliq bolghanliqi üchün pexirlinidighanliqini bayan qilghan.

Biz bu pa'aliyet heqqide melumat élish üchün mewlüde ezizge téléfon qilduq. 

Xemit göktürk ependi, xitay hökümiti Uyghurlarni pütünley yoq qilishqa tirishiwatqan bügünki künde xitay hökümitining chet'ellerde yantayaq izdewatqanliqini, bu qizlarning “Xitay ayal muhajirlar jem'iyiti” qurup, xitay üchün xizmet qiliwatqanliqidin qattiq ejeblen'genlikini, chünki mewlüde ezizni ilgiri “Sherqiy türkistan wexpi” oqush mukapati bérip oqutqanliqini bayan qildi. 

Xemit göktürk ependi türkiyede köp sanda Uyghurlarning barliqini, bu xil kishilerge türkiye qanunigha ri'aye qilghan halda inkas bildürüsh kéreklikini bayan qildi. 

Xitay hökümiti kéyinki yillarda türkiyede her xil ammiwi teshkilatlarni qurup pa'aliyetlirini kücheytmekte. Xitayning türkiyediki bir qisim Uyghurlargha bu xil teshkilatlarni qurghuzup pa'aliyet élip bérishidiki meqsiti zadi néme? enqerediki xajétepe uniwérsitétining dotsénti, istratégiye mutexessisi doktor erkin ekrem ependi xitayning milliy en'eniside “Özining yéghi bilen özining göshini qorush” dégen gépi barliqini, shunga xitayning chet'ellerde Uyghurlarning qoli bilen öz muddi'asigha yétishke urunuwatqanliqini bayan qildi. 

Doktor erkin ekrem ependi, mewlude ezizdek kishilerning bundaq qilishida köp seweblerning bolush éhtimali barliqini bayan qildi. 

Bu pa'aliyetke mewlüde ezizdin sirt, Uyghur oqughuchilargha wakaliten seyyare isimlik bir oqughuchimu qatnashqan. 2008-Yili türkiyede “Uyghur karxanichilar jem'iyiti” namida bir jem'iyet xitay bilen hemkarliship bir qanche qétim pa'aliyet élip barghan idi. Emdi bolsa “Xitay muhajir ayallar uyushmisi” xitay konsulxanisidiki pa'aliyetlerge qatnashmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.