Японийәниң чиба шәһиридә уйғур мәдәнийити вә тарихий тоғрисида доклат сөзләнди

29 - Сентәбир японийәниң чиба шәһиридики мәдәнийәт мәркизи залида уйғур мәдәнийити вә тарихий тоғрисида мәхсус доклат сөзләш паалийити елип берилған.

Уйғур мәдәнийити вә тарихий тоғрисида доклат сөзләш паалийити чиба шәһәрлик мәдәнийәт мәркизиниң залида елип берилған болуп, доклат чүштин кейин саәт икки йеримдин төт йеримға қәдәр икки саәт давам қилған.Доклатқа һәр саһә кишилиридин көплигән кишиләр қатнашқан.

Японийә уйғур бирлики тәшкилатидин игилишимизчә, чиба шәһәрлик “н п о мунбири уюшмиси”ниң орунлаштуруши мәзкур уюшма әзалириға уйғур мәдәнийити вә тарихий тоғрисида доклат сөзләш паалийити елип берилған болуп, паалийәткә японийә уйғур бирлики тәшкилатиниң рәиси турмуһәммәт һашим алаһидә тәклип билән қатнишип доклат бәргән.

Зияритимизни қобул қилған турмуһәммәт һашимниң билдүрүшичә, у доклатиниң биринчи бөликидә алди билән хитай компартийисиниң һакимийәт түзүлмиси билән япон дөлитиниң һакимийәт қурулмисини селиштуруш арқилиқ бир партийилик хитай дөлитидә уйғур, тибәтләрниң зулумға учраватқанлиқини илгири сүргән.

Турмуһәммәт һашимниң ейтишичә, у доклатиниң иккинчи бөликидә уйғурларниң будда мәдәнийити тоғрисида тохталған. Доклатниң үчинчи бөликидә болса уйғурларниң қараханилар дәвридики мәдәнийити тоғрисида тохталған.

Турмуһәммәт һашим доклатниң төтинчи бөликидә уйғурларниң йеқинқи заман тарихий тоғрисида тохтилиш арқилиқ уйғур хәлқиниң әркинлик вә һөрлүккә болған интилишини билдүргән.

Доклат сөзләш паалийитини уюштурған чиба шәһәрлик нпо форам уюшмисиниң рәиси ушияма әпәндим доклат һәққидә тохтилип:“биз доклаттин хитай дөлитини вә уйғурларниң мәдәнийитини чүшүниш билән биргә хитай комартийисиниң тибәт вә уйғур районлирида елип бериватқан сиясәтлири вә бу районлардики омумий вәзийәт һәққидиму бәлгилик мәлуматларға игә болдуқ”деди.

Доклат иштиракчилиридин иши әпәдим зияритимизни қобул қилип:“доклат наһайити яхши елип берилди. Болупму, доклатқа қатнашқан кишиләр соал қоюш арқилиқ хитай компартийәсиниң бәзи бир сиясәтлиридики бизгә чүшүниксиз болған тәрәплирини айдиңлаштурвалди.Уйғур тарихий вә мәдәнийити тоғрисида көп билимләргә игә болдуқ”деди.

Мәлум болушичә, чиба шәһиридики“н п о мунбири уюшмиси”японийә ташқи ишлар министирлиқиниң мәслиһәтчиси илгири 40 нәчә йил бирләшкән дөләтләр тәшкилатида хизмәт қилған ушияма әпәндим тәрипидин қурулған болуп, уюшминиң асаслиқ әзалири сабиқ японийә дипломатлири,караханичилар вә тәтқиқатчилардин тәркип тапқан икән.

Юқириқи аваз улинишидин тәпсилатини аңлаң.