Японийә уйғур җәмийити уйғур мәдәнийитини тонуштуруш паалийити елип барди

9 - Апрел, японийә уйғур җәмийити токйода уйғур мәдәнийитини тонуштуруш паалийити елип барған. Паалийәт шу күни чүштин кейин саәт икки йеримдин бәш йеримға қәдәр давамлашқан болуп, паалийәткә көплигән японлар иштирак қилған.

Японийә уйғур җәмийитидин игилишимизчә, 9 - апрел токйодики идабаши районидики т к п йиғин залида мәзкур җәмийәтниң тәшкиллиши билән уйғур мәдәнийитини тонуштуруш паалийити елип берилған.

Уйғур мәдәнийитини тонуштуруш паалийитидә японийә уйғур җәмийитиниң рәиси илһам маһмут уйғурларниң мәдәнийити тоғрисида тәпсилий тохталған болуп, зияритимизни қобул қилған илһам маһмут бу қетимқи паалийәтниң елип берилиши һәққидә тохталди.

У,бу қетимқи уйғур мәдәнийитини тонуштуруш паалийитидә асаслиқ уйғур елида ишләнгән көп қиисмлиқ 12 муқам филимидин арийәләр көрситиш арқилиқ, филимдә тәсвирләнгән уйғурларниң түрлүк әнәнивий адәтлири һәққидә қисқичә чүшәнчә бәргәнликини билдүрди.

Уйғур мәдәнийитини тонуштуруш паалийитигә иштирак қилған ватанаби бүгүнки паалийәт һәққидә тохтилип:“биз бүгүн уйғурларниң сиясий әһвалидин әмәс, бәлки мәдәнийити тоғрисидики дәсләпки чүшәнчиләргә игә болдуқ, болупму уйғур таамлири, уйғур нахша - усуллири һәққидә. Паалийәт һәқиқәтән көңүллүк вә қизиқарлиқ болди” деди.

Илһам маһмут уйғур мәдәнийитини тонуштуруш паалийитидә, японларни һәммидин бәкрәк қизиқтурған мәдәнийәт җәһәттики бәзи бир нуқтиларни әскәртип өтти.

Ахирида, зияритимизни қобул қилған паалийәт иштиракчилиридин като өз тәсиратини баян қилип:“һазирғичә японийә уйғур җәмийити японларға уйғурларниң хитай һокумити тәрипидин қаттиқ бастурулуватқанлиқидин ибарәт уйғурларниң сиясий һаятидин мәлумат берип келиватқан иди, лекин бүгүн өзгичә усул билән уйғур мәдәнийитини тонуштурушни асас қилған һалда мәдәнийәт паалийити елип берип, көпчиликкә уйғурларниң әнәнивий турмуш өрп - адәтлирини, болупму той - төкүн мәрикилирини чүшәндүрүш арқилиқ бизниң уйғур мәдәнийитигә болған қизиқишимизни техиму ашурди. Мән бу хилдики паалийәтләрниң давамлиқ елип берилишини чин дилимдин үмид қилимән” деди.

Японийә тарихий мәнбәлиридә көрситилишичә, японийәдә уйғур мәдәнийити тәтқиқати 1910 - йилидин башланған болуп, бу дәвирдә тәтқиқатчилар асаслиқи хитай тарихий язмилиридики язмиларға асасән уйғурларға аит тәтқиқатларни елип бериш билән биргә уйғурчә ядикарлиқларниму тәтқиқ қилған.

Юқириқи аваз улинишидин тәпсилатини аңлаң.