Yaponiye Uyghur birliki teshkilatining okinawa shöbisi quruldi

Ixtiyariy muxbirimiz haji qutluq qadiri
2016.11.04
yaponiye-uyghur-birliki-okinawa-shobisi-2016.jpg Yaponiye Uyghur birliki teshkilatining re'isi turmuhemmet hashim okinawa wilayitide pa'aliyetchiler bilen bille
RFA/Haji Qutluq Qadiri


3 - Noyabir yaponiye Uyghur birliki teshkilati yighin chaqirip mezkur teshkilatning okinawa shöbisi qurulghanliqini qarar qildi.

Yaponiyening okinwa wilayiti bolsa xitay bilen yaponiye arisida uzundin buyan igilik hoquq mesilide talash - tartish élip bériliwatqan xitaylar dyawyü, yaponlar sénkaku dep ataydighan aral orun alghan shundaqla bu yerge amérika armiyesining yaponiyediki asasliq herbiy bazisi jaylashqan istratégiyelik jehettin tolimu muhim rayon hésablinidu.

Yaponiye Uyghur birliki teshkilatidin igilishimizche, mezkur teshkilat yéqinda yighin chaqirip yaponiyening okinawa wilayiti naha shehiride mexsus shöbisini tesis qilghanliqini qarar qilghan. Shöbe teshkilatqa naha shehiridiki yapon wetenperwerliri teshkilatining rehberliridin tano mariko mes'ulluqqa we kuga shintaro yardemchilikke teyyinlen'gen.

Bu heqte ziyaritimizni qobul qilghan yaponiye Uyghur birliki teshkilatining re'isi turmuhemmet hashim okinawa wilayitining naha shehiride shöbe teshkilat qurushning ehmiyiti we uning Uyghur dawasini yaponiyege anglitishtiki roli heqqide toxtaldi.

Yaponiye Uyghur birliki teshkilati okinawa shöbisining mes'uli tano mariko ziyaritimizni qobul qilip:“Men ikki yildin buyan naha shehiride wetenperwerlik pa'aliyiti bilen shughulliniwatimen. Tarixta sherqiy türkistan dep atalghan, hazir bolsa xitay kompartiyesi teripidin Uyghur aptonom rayoni déyiliwatqan bu diyardiki Uyghurlarning ehwalidin ilgiri az - tola xewirim bolsimu, lékin bu heqte etrapliq chüshenchem yoq idi. 2013 - Yili 6 - ayda Uyghurlarning rehbiri rabiye qadir xanim naha shehirige kélip Uyghur kishilik hoquq mesilisi toghrisida doklat berdi. Men doklattin kopligen nersilerni öginish bilen birge,bizge oxshash insan süpitide yashawatqan Uyghurlarni xitay kompartiyesi assimiliyatsiye qilip yoqitish üchün küchining bériche basturush élip bériwatqanliqini hés qildim we yaponiyediki Uyghur teshkilatliri bilen alaqiliship Uyghur mesilisige hesse qoshush üchün Uyghurlarning dawa sépige qoshuldum” dédi.

Tano mariko sözide:“Uyghurlarning dawa sépige qoshulushum we shöbe teshkilatning mes'ulluqini üstümge élishim hergiz xitay dölitige nepret bildürüsh emes, belki xitay kompartiyesining Uyghurlar üstidin élip bériwatqan basturush siyasitige we xitaydiki kishilik hoquq depsendichilikige qarshi turushtin ibaret” dédi.

Yaponiye Uyghur birliki okinawa shöbisining ezaliridin kuga shintaro shöbe teshkilat heqqide toxtilip:“Yaponiye xelq'ara mesililerde dunya xelqi bilen bir septe turup kelgenliki üchün, hazrqi waqitning özide dunya duch kéliwatqan musulman köchmenler mesiliside xelq'ara jem'iyet bilen ortaqlishishni nishan qilghan halda köchmenlerdin belgilik derijide özige qobul qildi we birleshken döletler teshkilatigha bu mesilide iqtisadiy jehettin yardemde boliwatidu. Shunga men Uyghur mesilisinimu xelqara mesililerdin biri dep tonup Uyghur teshkilatliri bilen öz - ara hemkarlishishni layiq kördüm. Elwette, yapon we Uyghur xelqining ortaq düshmini bolghan xitay kompartiyesi hakimiyitige birlikte ortaq taqabil turushimiz lazim dep oylaymen” dédi.

Kuga shintaro sözide yene:“Okinawagha xitay döliti türlük tehditlerni sélish arqiliq sénkaku arili mesilisini bahane qilip turup, herbiy küch bilen bu zéminni bésiwélishni oylishiwatidu. Shunga biz okinawa xelqige Uyghur mesilisini anglitish arqiliq ularni oyghitish, xitayning iqtisadiy yardemlirige aldanmasliqini meqset qilghan halda bu heqte köprek teshwiq élip bérishimiz kérek” dédi.

Turmuhemmet hashimning éytishiche, yaponiye Uyghur birliki teshkilati yéqin kelgüside osaka we kyoto sheherliridimu shöbe teshkilatlirini tesis qilidiken.

Igilishimizche, yaponiye Uyghur birliki teshkilatining tunji shöbisi ötken ayda kyu ölkisining fuku'oka shehiride qurulghan bolup, bu qétimqi okinawaning naha shehiride qurulghan shöbisi mezkur teshkilatning ikkinchi shöbisi bolup hésablinidiken.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.