Rabiye qadir xanim yuriko xanimning tokyogha ölke bashliqi bolghanliqini tebriklidi

Yaponiye Uyghur birliki teshkilatidin igilishimizche, dunya Uyghur qurultiyining re'isi rabiye qadir xanim 8-awghust küni yaponiye bash weziri shinzo abé bashchiliqidiki erkin démokratlar partiyesining gholluq ezasi, yaponiye parlaménti Uyghur dostluq guruppisining ezasi yuriko ké'iko xanimning tokyogha ölke bashliqi bolup teyinlen'genlikini tebriklep tebrik xéti yollighan.

31-Iyul yuriko ké'iko xanim tokyoda élip bérilghan ölke bashliqi saylimida özining küchlük riqabetchilirini yéngip eng yuqiri awaz bilen tokyogha ölke bashliq bolup saylan'ghan we yéqinda qesem bérip wezipe tapshurup alghan.

Yuriko ké'iko xanim ilgiri yaponiye hökümitide dölet mudapi'e ministiri, muhit ministiri qatarliq muhim wezipilerde bolghan. 2008-Yili yaponiye tarixida tunji qétim ayallardin yaponiye erkin démokratlar partiyesige re'isi bolup saylan'ghan shexs shundaqla yaponiyede tesiri bir qeder zor bolghan ayal siyasetchilerdin biri. U, 1993-yilidin 2016-yilighiche yaponiye parlaménti ezasi bolghan.

Yaponiyening ereb elliri bilen bolghan diplomatik munasiwetliride belgilik rol oynighan rehberlerdin biri dep qarilidighan yuriko xanim, ilgiri misirning qahire uniwérsitétida ereb tilliri boyiche bakalawrliq unwanigha érishken.

Ziyaritimizni qobul qilghan yaponiye Uyghur birliki teshkilatining re'isi turmuhemmet hashim rabiye qadir xanimning yuriko ké'iko xanimgha yollighan tebrik xétini munasiwetlik orunlargha yetküzüp bergenlikini bayan qildi.

Téléfon ziyaritimizni qobul qilghan dunya Uyghur qurultiyining re'isi rabiye qadir xanim tebrik xétide yuriko ké'iko xanimning saylam ghelibisini qutlighan we uning Uyghur mesilisige yéqindin köngül bölüp kéliwatqanliqigha heshqalla éytish bilen birge, uni nöwettiki shi jinping hakimiyitining Uyghur élida élip bériwatqan Uyghurlarni basturush siyasitige diqqet qilishqa chaqirghanliqini bildürdi.

Rabiye qadir xanim sözide, yuriko ké'iko xanimdek yaponiye rehberlirige tebrik xéti yollash arqiliq yaponiye hökümitide muhim wezipilerni ötewatqan rehberlerning Uyghur dawasigha yéqindin köngül bölüshini qolgha keltürüsh we bu arqiliq belgilik netijilerge érishishni ümid qilidighanliqini bildürdi.

Rabiye qadir sözide yene, 2020-yili tokyoda ötküzülidighan olimpik tenheriket yighini mezgilide Uyghur mesilisining yaponiyede keng anglitilishida yuriko ké'iko xanimning yéqindin qollishini arzu qilidighanliqini bildürdi.

Nurmuhemmet hashim 2020-yili tokyoda ötküzülidighan olimpik tenheriket yighini mezgilide Uyghur dawasini xelq'aragha anglitish üchün yaponiye Uyghur birliki teshkilatining bir qisim pa'aliyetlerni élip bérishni pilanlawatqanliqini bildürdi.

Yuqiriqi awaz ulinishidin tepsilatini anglang.

Bu maqalini iltebir tehrirlidi.