Шветсийә адил абдулһекимниң сияси панаһлиқ илтимасини рәт қилди
Мухбиримиз әркин хәвири
2008.06.20
2008.06.20
Шветсийә көчмәнләр идарисиниң баянатчиси кристер лийк пәйшәнбә күни көчмәнләр даирилириниң мәзкур илтимас тоғрисидики қарарини елан қилип, " биз адил абдулһекимниң шветсийидә қелишқа еһтияҗи йоқлуқини қарар қилдуқ. Чүнки униңға аллибурун албанийидә панаһлиқ берилгән," дәп көрсәтти.
Бу йил 33 яшлардики адил абдулһеким 2006 - йили май ейида америка даирилири тәрипидин гүәнтанамода 4 йил тутуп турулғандин кейин албанийигә йолға селинған. Лекин адилниң адвукати стән де геер, көчмәнләр даирилириниң адилни рәт қилиш сәвәбигә қошулмайдиғанлиқини билдүрди. У франсийә агентлиқиға бәргән баянатида адил абдулһекимниң албанийидә хизмәт қилиш, сиңиш, яки аилисини елип келиш келәчики йоқлуқи, мана бу сәвәбләрдин шветсийидә панаһлиқ тилигәнликини әскәртти.
Адил абдулһеким буниңдин бир қанчә ай илгири шветсийидә чақирилған бир хәлқара кишилик һоқуқ йиғиниға қатнишиш үчүн стокһолимға кәлгән болуп, йиғиндин кейин албанийигә қайтмайдиғанлиқини, шветсийә даирилиридин панаһлиқ тиләп бу йәрдики һәдиси билән җәм болуш арзуси барлиқини билдүргән иди.
Лекин адил абдулһекимниң адвукати адилниң сот мәһкимисигә әрз сунидиғанлиқини билдүрди. Сот мәһкимиси адилниң әрзини көрүп чиқиши үчүн бирәр йил вақит кетиши мумкин.