Amérika bilen hindistanning atom énérgiye kélishimi xelq'araliq qollashqa érishti

Amérika bilen hindistan arisida tüzülgen puqralarning turmushi üchün ishlitishni meqset qilghan atom - yadro kélishimi yéqinda wi'énada ötküzülgen atom - yadro matériyalliri bilen teminleydighan döletler guruhining yighinida testiqtin ötken bolup, 45 dölettin terkip tapqan bu teshkilatning ichide peqet az sandiki döletlerla qarshi chiqqan.
Muxbirimiz ümidwar xewiri
2008.09.07

Nöwette, amérika bilen hindistan arisida tüzülgen bu kélishim yene amérika dölet mejlisining testiqidin ötüshini kütmekte iken.

Amérika awazining hindistan iqtisadiy gézitidin neqil keltürüshiche, atom - yadro matériyalliri bilen teminleydighan döletler guruhining yighinida amérika bilen hindistanning bu kélishimining testiqtin ötüshige nisbeten xitay terep türlük usullar bilen tosqunluq qilghan, shu sewebtin hindistan terepmu narazi bolghan iken.

Birleshme agéntliqining xewer qilishiche, hindistan bilen amérika arisidiki bu kélishimning testiqtin ötüshi hindistan üchün zor paydiliq bolup, 34 yildin buyan hindistan'gha qoyulghan yadro matériyalliri sodisi cheklimisige xatime bérilidiken. Bu munasiwet bilen amérika prézidénti bush we hindistan bash ministiri sink bir - birini tebrikligen.

Amérika - hindistan arisidiki yadro kélishimi xelq'ara tereptin testiqlan'ghan bu künlerde hindistanning qoshnisi, yeni xitayning yardimige érishiwatqan yadro döliti pakistanda prézidént saylimi bolup, sabiq pakistan öktichi partiye rehbiri, suyiqest bilen öltürülgen butto xanimning éri asif zerdari shenbe küni pakistan prézidéntliqigha saylandi.


Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.