Amérika ikki xitay kishilik hoquq pa'aliyetchisining iz déreksiz yoqap ketkenlikidin qayghurmaqta

Amérikining béyjingdiki bash elchixanisi bayanatchisi jüme küni amérikining olimpik musabiqisidin burun we musabiqe mezgilide ikki neper xitay kishilik hoquq pa'aliyetchisining iz déreksiz yoqap ketkenlikidin qayghuruwatqanliqini bildürdi.
Muxbirimiz erkin xewiri
2008.08.22

 Amérika elchixanisining bayanatchisi suzan stéwénsonning eskertishiche, bash elchi klark randt yéqinda xitay tashqi ishlarministirliqi emeldarliri bilen ötküzgen söhbette béyjingdiki bir yer asti chérkawining popi xu'a xuychi we eydiz bimarlirining hoquqini qoghdighuchi zat xu jyaning ayali zéng jinyenning iz déreksiz yoqap kétish weqesini otturigha qoyghan. Kishilik hoquq teshkilatlirining eskertishiche, zéng jinyen 8 ‏ - awghust küni béyjing olimpik musabiqisining échilish murasimidin burun iz déreksiz yoqap ketken.

Zéng jinyen yoqap kétip 3 kündin kéyin mexpiy saqchilar xu'a xuychini prézidént bushning yekshenbilik ibadetke qatnishidighan chérkawgha kétiwatqanda tutup ketken. Bayanatchi suzan stéwénson " biz xitay hökümitining olimpik mezgilide kishilik hoquqqa jümlidin pikir erkinliki we diniy erkinlikke hörmet qilish semimiyiti körsitishke chaqirimiz " dep tekitligen.

Lékin amérika, bash elchisining xitay tashqi ishlar ministirliqidiki emeldarlar bilen ötküzgen söhbitining tepsiliy ditallirini ashkarilashni ret qilghan. Kishilik hoquq teshkilatlirining xitayni olimpik mezgilide kishilik hoquqni, axbarat erkinlikini yaxshilash toghrisida bergen wediside turmidi, dep eyiblewatqanliqi kishilerge sir emes. Lékin xitay bu türdiki tenqidlerni ret qilip kelmekte idi.

Yéqinda xitay j x da'irilirining olimpik mezgilide namayish qilish rayoni qilip békitken béyjingdiki bir baghchida namayish qilish iltimasi sun'ghan biri 74 yash, yene bir 77 yashlardiki ikki momaygha emgek bilen özgertish jazasi bergenliki dunya metbu'atlirida ghulghula qozghighan idi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.