Ақсарай: америка хитайниң наразилиқиға әмәс, кишилик һоқуқиға көңүл бөлиду

 Ақсарайниң баянатчиси дана пәрино җүмә күни президент бушниң мәйн штатидики қоруқида мухбирларға баянат берип, " биз уларниң тәнқиди пикридин көпрәк, кишилик һоқуқ саһәсидики һәрикитигә көңүл бөлимиз " дәп көрсәтти.

Пәрино, " биз уларниң кишилик һоқуқ, әркинлик вә демократийидә өз дөлитиниң әһвалини яхшилиши шундақла президент бушниң бу мәсилидики мәйданини тонушини көрүшни халаймиз" шундақла, " мениңчә биз президентниң өктичи затлар билән көрүшкәнликигә уларниң немиләрни дегәнликидин көпрәк, хитайниң ичидә немә ишларниң йүз бериватқанлиқиға қизиқимиз," дәйду.

Хитай ташқий ишлар министирлиқи президент бушниң алдинқи күни ақсарайдики туралғусида рабийә қадир ханим вә төт нәпәр хитай демократчи зат билән көрүшкәнликини тәнқид қилип, "бу җуңгоға қарши дүшмән күчләргә хата сигнал бәргәнлик" дәп әйиблигән иди.

Президент буш бу кишиләр билән көрүшкәндә өзиниң олимпик мурасимиға барғанда уларниң әркинлик тоғрисидики пикир тәләплирини хитай дөләт рәиси ху җинтавға йәткүзүшкә вәдә бәргән. Рабийә қадир ханим, бушниң уйғур сиясий мәһбусларға өлүм җазасини тохтитиш, террорлуқ вә олимпикни баһанә қилип, уйғурларға зәрбә бәрмәслик, диний ибадәт әркинлики, олимпик баһанисида қолға елинғанларни қоюветиш... Қатарлиқларни оттуриға қоюшини тәләп қилған.