Barak obama démokratlar partiyisining prézidént namzatliqini qobul qildi

 Obama amérika tarixida bu nöwetlik prézidéntliqni talishidighan ikki partiyining biri teripidin tunji qétim namzatliqqa körsitilgen afriqa irqidiki amérikiliqtur. U nutuqida her bir amérikiliqning amérika ghayisini emelge ashurushigha oxshash purset bilen teminleydighanliqi, amérika iqtisadidiki chékinishni ongshaydighanliqi we amérikining xelq'ara ornini tekrar tikleydighanliqini bildürdi.

Obama yene prézidént bushning siyasitini tenqid qilipla qalmay, jumhuriyetchiler partiyisining prézidént namzati jon mikéynni tenqid qilip, mikéyinning bush hakimiyet sorighan 8 yil jeryanida bushning siyasitining %90 ni qollighanliqini eyiblidi. U" ötkenki 8 yilda bizning ehwalimiz hazirqidin yaxshi bolushi kérek idi. Dölitimizning ehwali hazirqidin obdan bolushi lazim idi," dep körsetti.

Obamaning peyshenbe küni denwér shehiridiki inwesko tenterbiye meydanida sözligen nutqi amérika xelq hoquqi herikitining rehbiri martin lutér kingning 1963 ‏ - yili "méning bir ghayem" dégen meshhur nutuqini élan qilghan kün bilen oxshash bir kün'ge toghra keldi.

Obama bu nöwetlik saylamning tarixiy ehmiyitini eskertip " bu minutlar ‏ - bu qétimqi saylam biz üchün 21 - esirde amérika wedisining mewjutluqini saqlishimizdiki bir purset," deydu. Démokratlar riqabetchi partiye jumhuriyetchilerning döletlik qurultiyi kéler düshenbe küni minnésota shtatining mi'annapi'olis shehiride échilidu.